قازاقستان رەسەي مەن تۇركيانى وقىس وقيعاعا وراي سالقىنقاندىلىق تانىتۋعا شاقىرادى

استانا. قازاقپارات - قازاقستان رەسەي مەن تۇركيانى وقىس وقيعاعا وراي سالقىن قاندىلىق تانىتۋعا شاقىرادى. بۇل تۋرالى بۇگىن ۇكىمەت وتىرىسىنان كەيىن ب ا ق وكىلدەرىنە سۇحبات بەرگەن ق ر سىرتقى ىستەر ءمينيسترىنىڭ ورىباسارى ەرجان اشىقبايەۆ ءمالىم ەتتى،

 دەپ حابارلايدى قازاقپارات.

 «وزدەرىڭىزگە ءمالىم، بۇدان بۇرىن بولعان جاعدايعا قاتىستى ەكى مەملەكەتتىڭ اراسىنداعى شيەلەنىسكەن احۋال ەلباسىمىز نۇرسۇلتان ءابىش ۇلى نازاربايەۆتىڭ تىكەلەي ارالاسۋىمەن جاقسارعان بولاتىن. كەشە ورىن العان وقىس جاعدايدىڭ دا ەكى جاقتى قارىم- قاتىناسقا تيگىزەتىن تەرىس اسەرى بولۋى مۇمكىن. ءبىز ەكى تاراپتى دا سالقىنقاندىلىققا شاقىرامىز. ەكى تاراپتىڭ دا بۇل جاعدايعا بايلانىستى ۇستانىمدارىن كەلىسسوزدەر ارقىلى شەشۋ قاجەت»، - دەدى اشىقبايەۆ.

ايتا كەتەيىك، وتكەن جىلدىڭ 24- قاراشاسىندا تۇركيانىڭ جويعىش ۇشاعى سيريا شەكاراسى ماڭىندا رەسەيدىڭ بومبالاۋشى سۋ-24 ۇشاعىن اتىپ تۇسىرگەن بولاتىن. ر ف پرەزيدەنتى ۆلاديمير پۋتين مۇنى «ارقاعا جاساعان سوققى» دەپ اتاعان ەدى. وسىدان سوڭ رەسەي تۇركياعا ءبىرقاتار ەكونوميكالىق شەكتەۋلەر ەنگىزگەن. ال ماۋسىم ايىنىڭ سوڭىندا قازاقستان پرەزيدەنتىنىڭ ارا اعايىندىعىنىڭ ناتيجەسىندە ەكى ەلدىڭ اراسى جاقىنداپ، پۋتين تۇركيامەن ساۋدا- ەكونوميكالىق قاتىناس قايتا قالپىنا كەلە باستاعانىن مالىمدەگەن- ءدى. ال 19 - جەلتوقسان كۇنى رەسەي ەلشىسى انكارادا «رەسەي كالينينگرادتان كامچاتكاعا دەيىن» اتتى كورمەنىڭ اشىلۋىندا ءسوز سويلەۋ بارىسىندا اتىپ ءولتىرىلدى. اندرەي كارلوۆ تۇركياداعى ەلشىلىك قىزمەتىنە 2013 -جىلدىڭ 12 - ماۋسىمىندا كىرىسكەن ەدى. ەلباسى نۇرسۇلتان نازاربايەۆ رف پرەزيدەنتى ۆلاديمير پۋتينگە تۇركياداعى ر ف ەلشىسىنىڭ قازاسىنا بايلانىستى كوڭىل ايتتى.

 اۆتور: مارلان جيەمباي