انكارا مەرى كارلوۆقا وق اتقان ەر ادام پوليتسەي بولعانىن راستادى
بۇعان دەيىن بۇقارالىق اقپارات قۇرالدارى شابۋىل جاساعان ادام فوتوكورمەگە پوليتسيانىڭ قىزمەتتىك كۋالىگىن پايدالانىپ كىرۋى مۇمكىندىگىن حابارلاعان بولاتىن.
«شابۋىل جاساعان - پوليتسەي»، - دەپ جازدى مەر «تۆيتتەردەگى» ءوزىنىڭ اككاۋنتىندا.
رەسەي ەلشىسى 19 - جەلتوقسان كۇنى انكارادا «رەسەي كالينينگرادتان كامچاتكاعا دەيىن» اتتى كورمەنىڭ اشىلۋىندا ءسوز سويلەۋ بارىسىندا اتىپ ءولتىرىلدى. تاپانشامەن قارۋلانعان ەر ادام ەلشىگە وق اتقاننان كەيىن «اللاحۋ اكبار! اللەپو تۋرالى ۇمىتپاڭدار! سيريا تۋرالى ۇمىتپاڭدار!»، دەپ ايعايلاعان.
فرانس پرەستىڭ جازۋىنشا، ۆيدەو مەن فوتوسۋرەتتەر جاريالانعاننان كەيىن الەۋمەتتىك جەلىلەردىڭ پايدالانۋشىلارى وق اتقان قىلمىسكەردىڭ تۇلعاسىن انىقتاۋعا كىرىسكەن. ال تۇرىك باسىلىمدارىنىڭ ءبىرى ەر ادام انكارادا پوليتسيا قۇرامىنداعى ارنايى جاساقتا قىزمەت ەتكەندىگىن جازدى.
مەر گەكچەك سونداي- اق، وق اتقان ادام فەتحۋللاح گۇلەننىڭ جاقتاستارى شوعىرلانعان عەتو توبىنىڭ (تۇركيا بيلىگىنىڭ سەنىمى بويىنشا) مۇشەسى بولۋى مۇمكىن دەگەن بولجام جاسادى. بيلىك وكىلدەرى گۇلەندى 2016 -جىلدىڭ جازىندا اسكەري توڭكەرىستى ۇيىمداستىردى دەپ ايىپتاعان ەدى.
انكارا مەرى «تۆيتتەردەگى» ءوزىنىڭ جازباسىندا، شابۋىل جاساعان ەر ادامنىڭ قىلمىستىق ارەكەتى 2016 -جىلدىڭ جازىندا عانا رەتكە كەلتىرىلگەن رەسەي مەن تۇركيا اراسىنداعى قارىم- قاتىناستى قايتا ۋشىقتىرۋ تالپىنىسى بولىپ تابىلاتىنىن ايتتى.
ر سەي س ءى م اندرەي كارلوۆتىڭ ولتىرىلگەنى تۋرالى اقپاراتتى راستاپ، ورىن العان جاعدايدى لاڭكەستىك ەكەندىگىن ايتتى. جانە بۇل ماسەلەنى ب ۇ ۇ قاۋىپسىزدىك كەڭەسىنىڭ تالقىسىنا شىعارۋعا ۋادە ەتتى. اندرەي كارلوۆ تۇركياداعى ەلشىلىك قىزمەتىنە 2013 -جىلدىڭ 12 - ماۋسىمىندا كىرىسكەن ەدى. ايتا كەتەيىك، سوڭعى كەزدەرى تۇركيادا سيرياداعى رەسەيلىك ساياساتقا قارسى اكسيالار ءجيى ءوتىپ تۇردى.
