15:30, 19 - جەلتوقسان 2016 | GMT +5
ۇستەل تەننيسىنەن ەل چەمپيوناتىندا باتىس قازاقستاندىقتار جەتى جۇلدە ولجالادى - فوتو
ورال. قازاقپارات - الماتى قالاسىندا ۇستەل تەننيسىنەن 1995 -جىلعى جانە ودان كىشى جاستار اراسىندا مارەگە جەتكەن ەل چەمپيوناتىندا ب ق و قۇراماسى تابىستى ونەر كورسەتتى، دەپ حابارلايدى «قازاقپارات» ح ا ا ءتىلشىسى.
ب ق و دەنە شىنىقتىرۋ جانە سپورت باسقارماسىنان تۇسكەن مالىمەتكە قاراعاندا، باتىس قازاقستاندىقتار 2 التىن، 3 كۇمىس جانە 2 قولا مەدالدى جەڭىپ الدى.
اتاپ ايتقاندا، جاستار اراسىندا جەكەلەي سىندا داستان كەنجەعۇلوۆ ەل چەمپيونى اتانسا، گاۋھار الماعامبەتوۆا كۇمىس، ايدوس كەنجەعۇلوۆ قولا جۇلدەنى يەلەندى. جۇپتىق سىندا السۋ ساپاروۆا مەن گاۋھار الماعامبەتوۆا قارسىلاس شاق كەلتىرگەن جوق. سونداي- اق اعايىندى داستان مەن ايدوس كەنجەعۇلوۆتار جۇپتىق سىندا ەكىنشى ورىنعا كوتەرىلدى. ارالاس سىندا ايدوس كەنجەعۇلوۆ پەن السۋ ساپاروۆا تاعى ءبىر قولا جۇلدەنى ەنشىلەدى. سونىمەن قاتار بوزبالالار اراسىنداعى كوماندالىق سىندا ب ق و قۇراماسى كۇمىس مەدالدى قانجىعاعا بايلادى.
اۆتور: ەلجان ەرالى
