اتىراۋلىق بۇلدىرشىنگە وڭتۇستىك كورەيادا تەگىن وپەراتسيا جاسالدى

استانا. قازاقپارات - قايىرىمدى جانداردىڭ ارقاسىندا اتىراۋلىق ءبۇلدىرشىن الميرا رىسماعامبەتوۆاعا وڭتۇستىك كورەيادا تەگىن وپەراتسيا جاسالدى.

 تۋابىتتى مۇگەدەك بالعىن سەگىز جاسقا تولعانشا ەركىن سويلەي الماعان. جۇرت قاتارلى مەكتەپكە بارىپ، قاتارىمەن ويناپ- كۇلۋدەن قالعان، دەپ حابارلايدى 24.kz.

 اتا- اناسىنىڭ جاعدايى بولماعاندىقتان دەمەۋشىلەر كومەگىمەن كىشكەنتاي الميراعا شەتەلدە ەم- دوم جاسالدى. قازىر ونىڭ احۋالى جاقسى، ەندى بىرنەشە كۇننەن سوڭ ەلگە ورالۋى ءتيىس. الميرانىڭ تۋابىتتى تاڭدايى جوق. وسىنىڭ سالدارىنان اۋىز قۋىسى دۇرىس بىتپەگەن. بۇل كەمىستىك دۇرىس سويلەۋگە دە، ءتىپتى كۇلۋگە دە مۇمكىندىك بەرمەي كەلگەن بولاتىن. ءوزى قاتارلى بالالاردىڭ كەلەمەج ەتەتىندىگىنەن ابدەن قاجىعان ءبۇلدىرشىن مەكتەپتەن باس تارتقان. ال شەتەلدىك بىلىكتى ماماندار ءبۇلدىرشىننىڭ باستى ارمانىنىڭ ورىندالۋىنا مۇمكىندىك بەردى. جاناشىرلىق بىلدىرگەن وتاندىق تۋريستىك كومپانيا وكىلدەرى مەن وڭتۇستىك كورەيالىق دارىگەرلەر قولدان كەلگەن كومەكتەرىن اياعان جوق.

 «الميرانىڭ جاعدايىنا قانىققان سوڭ قول قۋسىرىپ قاراپ وتىرا المادىق. كورەيالىق دارىگەرلەرمەن اقىلداسىپ، قالاي دا كومەك كورسەتۋ قاجەت دەپ شەشتىك. ولاردا ماسەلەمىزدى قايتارماي، ءوز كەلىسىمدەرىن بەردى. بەينەبايلانىس ارقىلى وسى جەردەن- اق بارلىق ماسەلەنى شەشىپ، وپەراتسيادان كەيىنگى قالپىنا كەلۋ مەرزىمىندە دە باقىلاۋعا الۋ، ەمدىك كۋرستاردى تولىق اياقتاۋعا كەلىستىك. پۋچحون قالاسىنداعى حالىقارالىق مەديتسينا ورتالىعى جوعارى ساناتتى، بىلىكتى دارىگەرلەرىمەن الەمگە ايگىلى. حيرۋرگتەر الميراعا وپەراتسيا جاساماس بۇرىن ونىڭ دەنساۋلىعىن كەشەندى تەكسەرۋدەن وتكىزدى. جان- جاقتى مەديتسينالىق تەكسەرۋلەر مەن ءبۇلدىرشىننىڭ ساۋىعىپ كەتۋگە دەگەن ەرىك- جىگەرىنىڭ مىقتىلىعى ارقاسىندا وپەراتسيا وتە ءساتتى ءوتتى دەدى بىزگە دارىگەرلەر»، - دەيدى تۋريستىك كومپانيا باسشىسى روزا بەكەنوۆا. ەندى بىرنەشە كۇننەن كەيىن دارىگەرلەردىڭ قورىتىندى شەشىمىنەن سوڭ الميرا اناسىمەن بىرگە ەلگە ورالماق.