18:45, 18 - جەلتوقسان 2016 | GMT +5
شورت-ترەكتەن تاعى ءبىر وتانداسىمىز الەم كۋبوگىنىڭ جۇلدەگەرى اتاندى
استانا. قازاقپارات - كورەيا ەلىنىڭ كاننىن قالاسىندا شورت-ترەك سپورتىنان الەم كۋبوگىنىڭ ءتورتىنشى كەزەڭى مارەسىنە جەتتى، دەپ حابارلايدى قازاقپارات ءتىلشىسى.
كورەيا ەلىنىڭ مۇز ايدىنى قازاقستاندىق شورت-ترەكشىلەر ءۇشىن وتە ءساتتى بولدى. بۇگىنگى سايىستا جەرلەسىمىز دەنيز نيكيشانىڭ قانجىعاسى كۇمىس جۇلدەمەن مايلاندى. دەنيز نيكيشا فينالدىق باسەكەدە الدىنا تەك قىتايلىق داتسزيندى جىبەرىپ الدى.
وسىعان دەيىن الەم كۋبوگىنىڭ ءۇش كەزەڭى ارتتا قالعان بولاتىن. سول كەزەڭدەردە دە نيكيشا 500 مەتر قاشىقتىقتا ءوزىن جاقسى قىرىنان كورسەتە بىلگەن ەدى. ءبىر كەزەڭدە فينالعا دەيىن جەتكەنى ەسىمىزدە.
ەستەرىڭىزگە سالا كەتەيىك، وسىعان دەيىن 500 مەتر قاشىقتىقتا ابزال اجىعاليەۆ باس جۇلدەنى ەنشىلەگەن ەدى.
اۆتور: كۇنسۇلتان وتارباي
