جەلتوقسانشىلاردى جازالاعانداردىڭ ەسىمدەرى بەلگىلى بولدى
ەل تاۋەلسىزدىگىنىڭ 25 جىلدىعىنا جانە 1986-جىلعى جەلتوقسان وقيعاسىنىڭ 30 جىلدىعىنا وراي جارىق كورگەن كىتاپتىڭ راسىمىنە پارلامەنت سەناتىنىڭ دەپۋتاتى سارسەنباي ەڭسەگەنوۆ، ءماجىلىس دەپۋتاتى باقىتبەك سماعۇل، قازاق راديوسىنىڭ ديرەكتورى ماحات سادىق، جەلتوقسانشىلار، قوعام قايراتكەرلەرى، زيالى قاۋىم وكىلدەرى مەن جاستار قاتىستى.
شارا بارىسىندا اتالعان كىتاپتىڭ مازمۇنى، وندا قامتىلعان جاعداياتتار كەڭىنەن ءسوز بولدى. جيىندا اتاپ وتىلگەندەي، بولاتبەك تولەپبەرگەننىڭ «قاسيەتتىم - جەلتوقسان!» اتتى پۋبليتسيستيكالىق كىتابىندا 1986-جىلعى الماتى قالاسىنداعى جەلتوقسان كوتەرىلىسىنىڭ شىعۋ سەبەپ-سالدارى مەن وقيعانىڭ ءوربۋ بارىسى كەڭىنەن قامتىلعان. سونىمەن قاتار، وقيعاعا قاتىسقان جانە ودان كەيىنگى كەزدە ازاماتتىق ۇستانىمىن كورسەتكەن زيالىلارىمىزدىڭ، جاستارىمىزدىڭ قايسارلىعى تۋرالى سىر شەرتىلەدى.
بۇدان بولەك، جەلتوقسان كوتەرىلىسىنىڭ تۇتانۋىنا تۇرتكى بولعان جايتتاردان باستاپ، جەلتوقساندىق قاھارمانداردىڭ ءىس-ارەكەتتەرى اشىپ كورسەتىلىپ، جەلتوقساندىقتاردىڭ ءبىرازىنىڭ تىزىمدەرى مەن سول كوتەرىلىسكە قاتىسقان جاستاردىڭ دەرەكتەرى بەرىلگەن.
اۆتور جەلتوقسان كوتەرىلىسىنە قاتىستى تولىققاندى ماعلۇماتتى ناقتى دەرەكتەرمەن دايەكتەپ، جەلتوقساندىق زيالى قاۋىم بولمىسىن اشۋعا ۇمتىلا وتىرىپ، وقيعانىڭ بىزگە بەيمالىم قىرلارىن بايانداۋدى ماقسات تۇتقان.
اۆتوردىڭ بۇل تياناقتى ەڭبەگى - قاحارماندىق كۇرەستىڭ شىنايى بەينەسى مەن تولىق اقيقاتىن اشۋداعى ساۋاپتى دا قاجىرلى تالپىنىسى، يگىلىكتى ءىستىڭ ماۋەلى جەمىسى دەپ ايتۋعا تولىق نەگىز بار.
اسىرەسە، كىتاپتىڭ «جەلتوقسان: تانىس تا بەيتانىس ەسىمدەر» اتتى بولىمىنە وقيعا سەبەبىنەن مەرت بولعانداردىڭ، سوتتالعانداردىڭ، اۋرۋحاناعا تۇسكەندەردىڭ، ءۇي قاماعىنا الىنعانداردىڭ، وقۋدان، جۇمىستان، پارتيا، كومسومول قاتارىنان شىعارىلعانداردىڭ، جاستارعا اراشا تۇسكەن ازاماتتاردىڭ اتى-جوندەرى ءتىزىمىنىڭ بەرىلۋى بۇل ەڭبەكتىڭ باعاسىن ارتتىرا تۇسكەندەي، دەپ جازادى «ەگەمەن قازاقستان» باسىلىمى.
تاعى ءبىر اتاپ وتەتىنى، كىتاپتا جەلتوقسانشىلاردى كىمدەردىڭ تەرگەگەنى، كىمدەردىڭ ۇكىم شىعارعانى تۋرالى دەرەكتەر دە قامتىلعان. مەملەكەتتىك ايىپتاۋشىلاردىڭ دا اتى-ءجونى بار. وسىدان وتىز جىل بۇرىن قازاقتىڭ ورىمدەي جاستارىن سوتتاعى سول سۋديالار بۇگىندە نە ويلايدى ەكەن؟
اتالعان كىتاپ مادەنيەت جانە سپورت مينيسترلىگىنىڭ «ادەبيەتتىڭ الەۋمەتتىك ماڭىزدى تۇرلەرىن باسىپ شىعارۋ» باعدارلاماسى بويىنشا 2000 دانامەن «كەرەمەت مەديا» باسپاسىنان جارىق كوردى.
