ءوزىم ويلاپ تاپقان ەسەپكە «ءتورت كەمپىر ءبىر شال» دەگەن اتاۋ بەردىم - اسقار ءجۇمادىلدا
- اسقار اعا، ارمىسىز! ەڭ الدىمەن، ءوزىڭىزدى تاۋەلسىزدىكتىڭ 25 جىلدىعىمەن قۇتتىقتايمىز. تاۋەلسىزدىك العان جىلدارى ءسىز جوعارعى كەڭەستىڭ دەپۋتاتى بولدىڭىز. سول جىلداردى ەسكە تۇسىرسەك، قانداي ماڭىزدى شەشىمدەر، ماڭىزدى قۇجاتتار قابىلداندى؟
- تاريحتىڭ ساتىمەن مەن 12- سايلانعان جوعارعى كەڭەستىڭ دەپۋتاتى بولدىم. 13-كەڭەستە دە دەپۋتات بولدىم. ءبىز قازاق ەلىن ماڭگىلىك ەل دەپ ءجۇرمىز عوي. قازاق دەيتىن ەل بولاتىن بولسا، ونىڭ تاۋەلسىزدىگى ءبىر-اق رەت جاريالانادى، ودان كەيىن تاۋەلسىزدىك جاريالانبايدى. قازاق ەلىنىڭ تاۋەلسىزدىگىن جاريالاعان 360 دەپۋتاتتىڭ ءبىرى رەتىندە مەن وسى 12- سايلانعان جوعارعى كەڭەستىڭ جۇمىسىنا قاتىسىپ، تاۋەلسىزدىك دەكلاراتسياسىن قابىلداپ، ءبىر جىلدان كەيىن تاۋەلسىزدىك زاڭىن قابىلداپ، وسىنداي كەز كەلگەن ادامنىڭ ماڭدايىنا جازىلا بەرمەيتىن ابىرويلى ءىستى اتقاردىم. مەن، وزىمشە، ازاماتتىق پارىزىمنىڭ ءبىر بولىگىن ورىندادىم عوي دەپ ويلايمىن. ول جىلى نە ىستەدى دەسەڭىز. سۇبەلى- سۇبەلى، ەڭ ماڭىزدى قۇجاتتاردىڭ بارلىعىن- دەرلىك سول ون ەكىنشى جانە ون ءۇشىنشى سايلانعان جوعارعى كەڭەس قابىلدادى. ولار نە؟ قازاق ەلىنىڭ تاۋەلسىزدىك دەكلاراتسياسى، قازاق مەملەكەتىنىڭ تاۋەلسىزدىك تۋرالى زاڭى، قازاق مەملەكەتىنىڭ العاشقى كونستيتۋتسياسى، قازاق مەملەكەتىنىڭ ءانۇرانى، گيمنى، گەربى جانە قازاق ەلىنىڭ تۇڭعىش پرەزيدەنتى. وسىنداي زاڭدى ودان كەيىن باسقا ەشبىر پارلامەنت قابىلداعان جوق. قالعاندارىنىڭ بارلىعى سوعان قوسىمشا، وزگەرىس سىندى تىرلىكتەر اتقاردى، ءبىراق، ەڭ سۇبەلى، ەڭ ماڭىزدى زاڭدار سول جەردە قابىلداندى. وعان قوسا، تەڭگە، العاشقى كاسىپورىنداردىڭ اشىلۋى جونىندە، شەتەلدىك كونسەسسيالار جونىندە، ەركىن ەكونوميكالىق ايماق جونىندە، العاشقى سالىق زاڭدارى جونىندە، ونى ايتپاي- اق قويايىن، ونىڭ بارلىعىن تىزە بەرسەڭىز وتە ۇزاق اڭگىمە ايتۋعا بولادى. ءبىراق، وسىنىڭ وزىنەن- اق ءسىز وسى العاشقى ەكى پارلامەنتتىڭ، سوۆەت وداعى كەزىندە سايلانعان پارلامەنتتىڭ ۇلكەن جۇمىس اتقارعانىن بايقايسىز.
- تاۋەلسىز قازاقستان عىلىمىنىڭ باسىندا تۇرعان عالىمداردىڭ ءبىرىسىز. جالپى، تاۋەلسىزدىكتىڭ العاشقى جىلدارى، سوناۋ 90-جىلدارى، عىلىمنىڭ جاي- كۇيى قالاي ەدى؟ قازىر قالاي؟ قانداي عىلىمي جاڭالىقتار اشىلدى؟
- 90-جىلدارى ءوزىڭىز بىلەسىز ەكونوميكا قۇلدىراعاندا جۇرت عىلىم جاساماق تۇگىلى، بالا- شاعا قامىمەن بازار ارالاپ كەتتى. وتە قيىن جاعداي بولدى. وكىنىشكە قاراي، ءبىزدىڭ عىلىمدا ىستەپ جۇرگەن ازاماتتاردىڭ كوبىسى سول بازارعا كەتتى، بيزنەسكە كەتتى، كەيبىرەۋلەرى ءتاپ-ءتاۋىر جۇمىس ىستەپ كەتتى، ءبىراق، كوبىسى دالادا قالىپ قويدى. ەندى، سول كەزدەگى جاعداي مەن قازىرگى جاعدايدى سالىستىراتىن بولساڭىز، ءبىرتالاي وزگەرىس بار. ونى ايتۋىمىز كەرەك. مىسالى، العاشقى ون ەكىنشى سايلانعان جوعارى كەڭەستە مەن ساناقشى كوميتەتىنىڭ ءتوراعاسى بولدىم، سوندا زاڭدارعا بەرىلگەن بۇكىل داۋىستى، حاتتامالاردىڭ بارلىعىن مەن بەكىتەتىنمىن. سول كەزدە ەڭ العاشقى تاۋەلسىزدىك دەكلاراتسياسىن ءبىز قولمەن ەسەپتەپ قابىلدادىق. ول كەزدە كومپيۋتەر بولعان جوق. ايتا بەرسەڭىز، سالىستىرار بولساڭىز، قازىرگى جاعداي مۇلدە باسقا. قازىر ۇكىمەتىمىز، ەلباسىمىز عىلىمعا ءبىرتالاي نازار اۋدارىپ جاتىر. ىشكى ءونىمنىڭ ءبىر پايىزىن، ءتىپتى، ەكى- ءۇش پايىزىنا دەيىن عىلىمعا اۋدارامىز دەگەن ساياساتتى جۇزەگە اسىرىپ كەلە جاتىرمىز. ءبىراق، بۇل تۋرا كەلە جاتىر دەپ ايتا المايمىن، بىرەسە بىلاي، بىرەسە بىلاي دەگەندەي. مىسالى، ءۇش-ءتورت جىل بۇرىن وتە جاقسى اقشا بولدى، عىلىمعا وتە جاقسى كوڭىل ءبولىندى. سودان كەيىن قايتادان سايابىرسىپ قالدى، ءبىراق، قازىر قايتادان اقشا ءبولىنىپ جاتىر. نەگىزگى يدەيا دۇرىس دەپ ويلايمىن. ءبىزدىڭ پارلامەنتتىڭ دە، ۇكىمەتتىڭ دە يدەياسى دۇرىس. عىلىمعا كوڭىل ءبولىنىپ، سوڭعى جىلدارى جاستار كوپتەپ كەلىپ جاتىر. كەزىندە، 90-جىلدارى عىلىمنان جاستاردىڭ بارلىعى دا كەتىپ قالعان. سول كەزدە سەمينارىما ءبىر ادام كەلسە، قۋاناتىنمىن، قازىر سەمينارعا ون ادام ەمەس، وتىز ادام كەلەدى. بۇل - ۇلكەن جەتىستىك مەن ءۇشىن. بۇل نەنى بىلدىرەدى؟ بۇل ءبىزدىڭ ساياساتىمىزدىڭ نەگىزگى ۆەكتورى، باعىتى دۇرىس. ەگەر وسى باعىتتان تايماساق، عىلىمنىڭ جاعدايى جامان بولمايدى.
- ءسىز ويلاپ تاپقان «تورتكەن» جانە «ءتورتقارا» ەسەپتەرى - بۇل الەمدەگى العاش قازاق تىلىندەگى الگەبرا اتاۋى. بۇل ەسەپتىڭ قانداي ەرەكشەلىكتەرى بار جانە نەلىكتەن «تورتكەن»، «ءتورتقارا» دەپ اتالعان؟
- مەن تاعى ءبىر قىزىقتى ايتايىن، مەنىڭ ءبىرىنشى كوپيۋتەرىم جوعارى كەڭەستە بولعاندا پايدا بولدى. سول كەزدە مەن تەك قانا جوعارى كەڭەستىڭ شارۋاسىمەن عانا ەمەس، ءوزىمنىڭ ماتەماتيكامدى قاتار الىپ جۇرە الدىم. ءبىراق، 95-جىلى ءبىز تارقاپ كەتتىك تە، مەن شەتەلگە كەتتىم. سودان كەيىن ەۋروپادا كوپ ءجۇردىم، ون شاقتى جىلداي ءجۇردىم. العاشىندا گەرمانيانىڭ گۋمبولت ستيپەندياسىن الدىم، اتاقتى گۋمبولت ستيپەندياسىن. مەن ودان كەتتىم دە، ون شاقتى جىلداي ءجۇردىم. سونىڭ ءبىر جىلدارىندا يتالياعا بارۋدى ادەتكە اينالدىرىپ الدىم، ويتكەنى، ونىڭ قاسىندا جەرورتا تەڭىزى بار، سوندا سۋعا تۇسەم. سوندا جاتقان ۋاقىتىمدا كەنەن اتامىزدىڭ اندەرىن تىڭداپ جاتتىم. سول كەزدە مەنىڭ باسىما وي كەلدى، مىنا تورتكەن دەگەن الگەبرا، ونىڭ ءتورتىنشى دارەجەسى بار، ونداي ەسەپ ەش جەردە جوق جانە بۇنداي زاڭدى ويلاپ تابۋدىڭ ءوزى وڭاي ەمەس. ەگەر كوپمۇشەلەردى كوبەيتىپ، ودان كەيىن تۋىندىسىن الاتىن بولساڭ، الگەبرانىڭ زاڭى قانداي بولادى؟ ەسەپتەن قاراسام، ونىڭ ەكىنشى رەتتە زاڭى بار، ول تۇسىنىكتى، كوممۋنيكاتيۆتى زاڭى، ءۇشىنشى رەتتە زاڭى جوق، ءبىراق، ءتورتىنشى رەتتە ءبىر زاڭى بار ەكەن. سونى جازىپ قاراسام، وندا ول وتە وڭاي ەمەس. ونى بىلاي دا بىلاي جازا المايسىڭ، تۇسىنىگىڭە كىرمەيدى، اسپاننان ءتۇستى دەپ ايتۋعا ەشقانداي نەگىز جوق. بۇندا ءبىر ادەمى يۋموردى بايقادىم، ادەمى ءبىر قۋلىقتى بايقادىم، ويتكەنى، اسسوتسياتوردى الىپ تاستاساڭ باسقا ءبىر ينتەگرالعا تەڭ بولادى ەكەن. سوسىن ويلادىم، بۇعان ءبىر قازاقتىڭ ادەمى اتىن بەرگەن دۇرىس شىعار، ءتورت كەمپىر ءبىر شال دەپ. ويتكەنى، ءتورت كەمپىر ءبىر شال دەگەن باسقا ات جوق قوي ەشكىمدە. باسقا ەشبىر حالىق مۇندايدى ويلاپ تابا المايدى. قازاقتىڭ يۋمورى بار مۇندا، قازاقتىڭ پسيحولوگياسى بار، مۇندا قازاقتىڭ ۇلتتىق بەلگىسى بايقالىپ تۇرادى. سوسىن ويلاپ، وسى كەنەن اتامىزدىڭ ءبىر قىزى بولۋشى ەدى، ءتورت كەمپىر ءبىر شال دەيتىن، سونى بەرە سالايىن دەپ «تورتكەن» بولىپ كەتتى. بۇل ءوزى عىلىمي رەتسەنزيادان ءوتتى، بۇل باسىلدى. قازىر ءار جەردەن قارالىپ، زەرتتەلىپ جاتىر.
- شەتەلدەردە كوپ جىلدارى ەڭبەك ەتتىم دەپ ايتتىڭىز، ودان كەيىن ەۋروپانىڭ كوپتەگەن جوعارى وقۋ ورنىنىڭ پروفەسسورىسىز، سوندا ءدارىس وقىدىڭىز. جالپى، شەتەل عىلىمىنان قازاقستان عىلىمى نە ۇيرەنۋى كەرەك؟ نەگىزگى ترەندتەرگە توقتالىپ وتسەڭىز.
- ەڭ بىرىنشىدەن، قازاقستاننىڭ عىلىمى تەك قانا شەتەلدەن ۇيرەنۋى كەرەك دەگەن بولمايدى. ءبىزدىڭ دە شەتەلگە ۇيرەتەتىن عىلىمىمىز بار، بۇل - ءبىر. ەكىنشىدەن، قازاقتا ءسوز بار «ۇيرەن دە جيرەن» دەيدى. شەتەلگە بارا قالاتىن بولساڭىز، وندا كوپتەگەن جاقسى نارسەلەر بار. ءبىراق، شەتەلدەن كەلگەننىڭ بارلىعى دا جاقسى دەۋگە دە بولمايدى، سوندا ءبىز ولاردان جيرەنۋىمىز كەرەك. ۇيرەنەتىن نە نارسە؟ ءبىرىنشى، عىلىمدى ۇيىمداستىرۋ، ەكىنشى، عىلىمنىڭ جاعدايى. ەگەر ءسىز ءبىر ۋنيۆەرسيتەتتە تولىق پروفەسسور رەتىندە اتاق الاتىن بولساڭىز، وندا ءسىز بەيمارال جۇمىس ىستەۋىڭىزگە بولادى. ەشقانداي باسقا نارسەگە كوڭىل اۋدارماي، تەك قانا ءوز عىلىمىڭىزبەن شۇعىلدانۋعا بولادى. بالا- شاعانىڭ قامى، باسقانىڭ قامى دەيتىن وي سىزدەن ادا بولادى، ويتكەنى، ءسىزدىڭ ءوزىڭىزدىڭ كابينەتىڭىز بار، ءوزىڭىزدىڭ قۇرال- سايمانىڭىز بار، ءسىزدىڭ جالاقىڭىز جەتەدى بارلىعىنا دا، ءسىز الاڭسىز، بەيمارال عىلىممەن شۇعىلدانۋىڭىزعا بولادى. عىلىم ءۇشىن بۇدان ارتىق ءلاززات، بۇدان ارتىق كومەك جوق. وكىنىشكە قاراي، بىزدە ونداي جاعداي ءالى تولىق بولدى دەپ ايتا المايمىن. ءسىز تەك قانا عىلىممەن شۇعىلدانبايسىز، سونىمەن قاتار، كوپتەگەن تەحنيكالىق سۇراقتارمەن شۇعىلداناسىز، عىلىمعا قاتىسى از، ودان كەيىن بالا- شاعانىڭ قامى ءبىر بولەك. ونى ايتپاي- اق قويايىق، ول جۇرتتىڭ بارلىعىندا بار نارسە. ءبىراق، وكىنىشكە قاراي، بىزدە وتىرىك قاعاز جازۋ، تولىپ جاتقان جوسپار، سولاردىڭ %90 ى وتىرىك. ويتكەنى، «عىلىم - ينەمەن قۇدىق قازعانداي».
مىسالى، ءبىر جىلدان كەيىن نە جازامىن ونى ءوزىم بىلمەيمىن، ەرتەڭ ماعان قانداي وي كەلەتىنىن دە بىلمەيمىن. ءتاۋىر جەرگە بارسام، ءتاۋىر جەرگە تۇسسەم، ءتاۋىر اداممەن سويلەسسەم جاقسى وي كەلەدى. مەن قازىر يتالياعا بارعاندى ارمانداپ ءجۇرمىن، جەرورتا تەڭىزىنە تاعى شومىلسام، مۇمكىن، تاعى جاقسى وي كەلە مە دەپ. ويتكەنى، «تورتكەننىڭ» «ىنىلەرى» بار، «سىڭلىلەرى» بار، بەسىنشى دارەجەدە «بەسكەن» دەيتىنى بار. مۇمكىن، التىنشى، جەتىنشى دارەجەدە تاعى دا بار شىعار. ول جاقتى مەن بىلمەي ءجۇرمىن. ءبىراق، وعان مەنىڭ ءالى باسىم جەتپەي ءجۇر، ويتكەنى، مەنىڭ شابىتىم كەلمەي ءجۇر. شابىت كەلمەگەنى، ماعان تىنىشتىق بولماي ءجۇر.
- ءبىر سۇحباتىڭىزدا قازاقستانداعى جوعارى وقۋ ورىندارىن ءۇش كريتەري بويىنشا باعالاۋعا بولادى دەپ ايتقان ەدىڭىز. سول تۇرعىدان الىپ قاراعاندا، جوعارى وقۋ ورىندارىنىڭ ءبىلىم ساپاسىنا كوڭىلىڭىز تولا ما؟
- بىزدەگى ءبىلىم ساپاسى ەشكىمنەن كەم ەمەس. مۇمكىن اسىپ بارا جاتقان دا ەشتەڭەمىز جوق بولار، ءبىراق، ەشكىمنەن كەم ەمەسپىز، بۇل - ءبىر. ەكىنشىدەن، شەتەلدىكتەردى، تەك شەتەلدەن مۇعالىمدەردى الىپ كەلۋ كەرەك دەگەن اڭگىمەنى قولدامايمىن. قازاقتا ءبىر ءسوز بار «اۋزى قيسىق بولسا دا، بايدىڭ بالاسى سويلەسىن» دەگەن. اۋزى قيسىق بولسا دا قازاقتىڭ بالاسى سويلەۋ كەرەك، ءبارىبىر. ويتكەنى، قازاق ەلىنىڭ پۇشپاعىن كوتەرەتىن، تۋىن ۇستايتىن قازاقتىڭ ازاماتى، باسقا ەشكىم بولمايدى. جاقسى ما، جامان با، سونىمەن بازار بولۋىمىز كەرەك. سوندىقتان مەنىڭ ويىمشا بۇل جەردە رەاليستىك تۇرعىدان قاراۋ كەرەك. رەاليزم تۇرعىسى دەگەنىمىز نە؟ ەڭ الدىمەن ءبىلىمنىڭ ساپاسى بولۋى كەرەك. ءبىلىم دەگەنىڭىز نە؟ مىسالى، ماتەماتيكا ءۇشىن، ماتەماتيكتىڭ ەكى ءتۇرى بولادى. بىرەۋى ەسەپ شىعارا الاتىن، بىرەۋى ەسەپ شىعارا المايتىن. دەمەك، ەسەپ شىعارا الاتىن ماتەماتيك كوبىرەك بولۋى كەرەك. ەگەر ەسەپ شىعارا الاتىن بولسا، قالعاننىڭ بارلىعى كەلەدى.
بىزدە سوۆەت وداعى داۋىرىندە جاقسى مەكتەپتەر، جاقسى ادىستەمەلەر قالىپتاسىپ قالدى. بىزبەن كەلە جاتقان عالىمداردىڭ بارلىعى- دەرلىك سوۆەت ۇكىمەتىندە شىققان عالىمدار. ەندى، تاۋەلسىز قازاقستاننىڭ عالىمدارى شىعىپ كەلە جاتىر. ولار مۇمكىن كەلەشەكتە بەلگىلى بولار، ءبىراق، ازىرگە كورىنگەن جوق. بەس جىلدا، ون جىلدا ولار بىزدەن اسىپ تۇسەر. وعان مەنىڭ ۇلكەن ءۇمىتىم بار. دەگەنمەن، مەنىڭ ويىمشا، اسىرەسە، عىلىمدا، بىلىمدە، بۇل - كونسەرۆاتيۆتى سالا. جاڭاعا كوشتىك دەپ، تىم كوپ دالاقتاي بەرۋدىڭ قاجەتى جوق.
ءبىزدىڭ باستاۋىش مەكتەبىمىز، ورتا مەكتەبىمىز وتە جوعارى دەڭگەيدە. قازىر شەتەلگە باراتىن بولساڭىز، قاي ۋنيۆەرسيتەتكە بارساڭىز دا قازاقتىڭ بالاسىن تاباسىز.
سونىڭ كوپ بولسا 20-%30 ى «بولاشاقپەن» بارادى، قالعانىنىڭ بارلىعى وزدىگىمەن بارادى. سولار قالاي تۇسەدى سول ۋنيۆەرسيتەتكە؟ ويلاپ قاراساڭىز، تەست، ەمتيحان تاپسىراتىن بولسا، سونىڭ %6 ى ماتەماتيكادان بولادى، ماتەماتيكادان وزىپ كەتەدى ءبىزدىڭ بالالاردىڭ بارلىعى. ءبىزدىڭ ماتەماتيكامىز جاقسى.
- قازىر سوڭعى ۋاقىتتا تەحنيكالىق عىلىمداردى اعىلشىن تىلىندە وقىتۋ تۋرالى يدەيا كوپ ايتىلىپ ءجۇر. بۇعان كوزقاراسىڭىز قالاي؟
- اعىلشىن ءتىلىن ۇيرەنۋگە ەشكىم قارسى ەمەس. اعىلشىن ءتىلىن ۇيرەنىڭىز، اعىلشىن ءتىلىن دە، قىتاي ءتىلىن دە ۇيرەنىڭىز، بارلىق ءتىلدى ۇيرەنىڭىز وعان ەشكىم قارسى ەمەس. ءبىراق، اعىلشىن ءتىلى قازاق ءتىلى ەسەبىنەن ەمەس، قازاق تىلىنە قوسىمشا رەتىندە بولۋى كەرەك. سوندا ءبارى ورنىنا كەلەدى. قازاقستاندا قازاقتىڭ ءتىلى ۇستەمدىك قۇرۋى كەرەك، ويتكەنى، باسقا ەشبىر ەلدە قازاق ءتىلى ۇستەمدىك قۇرا المايدى. قازاقتان وزگە ەشكىمگە قازاقتىڭ ءتىلى كەرەك ەمەس. مىسالى، سينگاپۋردا اعىلشىن ءتىلى بار ەكەن دەيدى، ونداعى اعىلشىن ءتىلى ءبىزدىڭ ورىس ءتىلىمىز سياقتى نارسە. ۇشتىلدىلىك جوق وندا. ءۇش حالىق بار: قىتاي، مالاي جانە ينديا. بۇكىل دۇنيەجۇزىندەگى ءتورت ادامنىڭ بىرەۋى قىتاي، بۇكىل دۇنيەجۇزىندەگى ءۇش ادامنىڭ بىرەۋى ينديا. سوندىقتان، ولاردىڭ مۇرتىن بالتا شاپپايدى. ال قازاقتىڭ بارلىعىن ەسەپتەپ قاراساڭىز، كوپ بولسا، ون ميلليوننىڭ و جاق، بۇ جاعىنان شىعادى. سوندىقتان، ءبىز تىلىمىزگە بەرىك بولۋىمىز كەرەك.
- مەملەكەت باسشىسى تەحنوكراتتىق ۇرپاق قالىپتاستىرۋىمىز كەرەك دەپ ايتادى. بۇل ۇرپاقتى قالاي قالىپتاستىرۋىمىز كەرەك، قانداي دا ءبىر مەحانيزمدەرى بار ما؟
- مۇنى ەلباسىنىڭ قولداعانىنا مەن وتە قۋانىشتىمەن، شىنىمدى ايتسام. كوپ جاعدايدا ەلباسى مەنىڭ ءسوزىمدى قايتالايدى. مەن بۇعان قۋانامىن. بۇل، ارينە، مەن ايتپاسام ايتىلمايدى دەگەن ءسوز ەمەس، ءبىراق، مەنىڭ ويىم مەن ەلباسىنىڭ ويى ۇشتاسىپ جاتقاندىعى ماعان ۇلكەن مارتەبە الىپ كەلەدى.
ويتكەنى، قازاق شىن مانىندە ماڭگىلىك ەل بولام دەسە، قازاق ەندىگى عاسىرعا قالاي بارادى دەسەڭىز ول تەحنوكراتتىق ەل بولۋ رەتىندە عانا بارۋى مۇمكىن. ەگەر ءسىز دۇنيەجۇزىن مويىنداتامىن، العا شىعامىن دەسەڭىز ءسىز تەك قانا بولاتىن تىرلىك جاساۋىڭىز كەرەك. ءبىر كومپيۋتەر جاساڭىز، ءبىر كومباين جاساڭىز، ءبىر راكەتا جاساڭىز، ءبىر ماشينا جاساڭىز، «دۆيگاتەل» جاساڭىز، «دۆيگاتەلدىڭ گايكاسىن»، ايتەۋىر، جۇرت پايدالاناتىن، جۇرتتىڭ بارلىعىنا كەرەك سونداي ءبىر دۇنيە جاساۋىڭىز كەرەك. سوندا بارىپ ءسىزدى ايتادى «ەەە، مىناۋ باسى ىستەيتىن حالىق ەكەن عوي» دەپ.
- 25 جىلدىققا وراي قازاقستان حالقىنا ايتار تىلەگىڭىز، لەبىزىڭىز بولسا، مارحابات.
- قازاقتىڭ ماڭگىلىك ەل بولام دەيتىن ارمانىن مەن قۇپتايمىن. ءبىراق، شىن مانىندە ماڭگىلىك بولا ما، ول وتىرىك ماڭگىلىك بولا ما ونىڭ بارلىعى بىزگە بايلانىستى. ونى ءبىز تەك قانا ءوزىمىزدىڭ ادال ەڭبەگىمىزبەن كورسەتۋىمىز كەرەك. مەن ازاماتتارعا جاقسىلىق تىلەيمىن، باقىت تىلەيمىن. ادال ەڭبەك ەتىڭىزدەر. قازاقتىڭ تۋىن كوككە كوتەرىپ جۇرە بەرىڭىزدەر.
- اسقار سەرقۇل ۇلى، بۇگىنگى تولىمدى سۇحباتىڭىز ءۇشىن كوپ راقمەت! ءسىزدىڭ بيىلعى تاۋەلسىزدىگىمىزدىڭ 25 جىلدىعىمەن قاتار كەلگەن 60 جىلدىق مەرەيتويىڭىزبەن قۇتتىقتايمىز! ىسىڭىزگە تابىس تىلەيمىز!
- راقمەت!
سۇحباتتاسقان - كاۋسار اياپبەرگەن. 2016
abctv.kz
