ورالدا اقىن باۋىرجان حاليوللانىڭ «جۇلدىز جاۋعان جارىق ءتۇن» اتتى جىر كەشى ءوتتى
ايتىسكەر اقىن باۋىرجان شيرمەدين ۇلى جۇرگىزگەن كەشتە ورال قالاسىنىڭ اكىمى ناريمان تورەعاليەۆ باۋىرجان حاليوللانىڭ الداعى ۋاقىتتا دا جەمىستى ەڭبەك ەتە بەرۋىنە تىلەكتەستىگىن ءبىلدىرىپ، قۇتتىقتاۋ حاتىن تابىس ەتتى.
اتاقتى ونەر تارلانى، قازاقستان مەن ك س ر و- نىڭ حالىق ءارتىسى، مەملەكەتتىك سىيلىقتىڭ يەگەرى ءاسانالى ءاشىموۆ اقىندىق ونەر تۋرالى تەرەڭنەن قوزعاپ، اق جايىق ءوڭىرىنىڭ بىرەگەي تالانتتارعا اۋەلدەن كەندە بولماعانىن، باۋىرجان حاليوللانىڭ قىزمەتىن دە، ولەڭدەرىن دە جوعارى باعالايتىندىعىن جەتكىزدى.
بەلگىلى اقىن، قازاقستاننىڭ ەڭبەك سىڭىرگەن قايراتكەرى، ايتىس اقىندارى مەن جىرشى-تەرمەشىلەر حالىقارالىق وداعىنىڭ ءتوراعاسى ءجۇرسىن ەرمان قادىر ءمىرزاالىنىڭ كوزى تىرىسىندە-اق ۇلت ۇستازىنا اينالعان ۇلى اقىن بولعاندىعىن ايتىپ، ونى قادىرلەۋ تۇرعىسىندا تۋعان جەرى باتىس قازاقستان وبلىسىندا ءبىراز شارالار اتقارىلعانىن اتاپ ءوتتى.
سونىڭ ىشىندە قازىر باۋىرجان حاليوللا جەتەكشىلىك ەتىپ وتىرعان قادىر اتىنداعى مادەنيەت جانە ونەر ورتالىعى شىن مانىسىندە تىرشىلىك قىز-قىز قايناپ، ءتۇرلى شارالار ءبىر-بىرىنە جالعاسىپ جاتقان وڭىردەگى ادەبي-رۋحاني مەكەنگە اينالىپ كەلەدى.
كەش بارىسىندا باۋىرجان حاليوللا ءوزىنىڭ جاڭا جىرلارىن دا وقىپ، سونداي-اق ونىڭ اندەرى ورىندالدى. اقىن، قازاقستان جازۋشىلار وداعى اتىراۋ وبلىستىق فيليالىنىڭ ءتوراعاسى قويشىعۇل جىلقىشيەۆ كەش يەسىنە ارناعان ولەڭىن وقىسا، بەلگىلى كومپوزيتور، قازاقستاننىڭ حالىق ءارتىسى التىنبەك قورازبايەۆ جاڭا ءانىن كورەرمەندەر نازارىنا ۇسىندى.
ايتا كەتەيىك، 1- جەلتوقسان كۇنى ءدال وسى جاستار مادەنيەت ۇيىندە قادىر ءمىرزاالى اتىنداعى مادەنيەت جانە ونەر ورتالىعىنىڭ ۇيىمداستىرۋىمەن «قادىر جولىمەن» جوباسى اياسىندا تاۋەلسىزدىكتىڭ 25 جىلدىعىنا ارنالعان «ازاتتىقتىڭ اق تاڭى» اتتى رەسپۋبليكالىق اقىندار ايتىسى وتەدى.
ءاسانالى ءاشىموۆ باستاعان قازىلار القاسى تورەلىك ەتەتىن دوداعا سەرىك قاليەۆ، اسەم ەرەجە قىزى، جانسايا مۋسينا، مۇحتار نيازوۆ، مەيىربەك سۇلتانحان سىندى تاڭداۋلى جيىرما اقىن قاتىسپاقشى.
اۆتور: ەلجان ەرالى
