مەكسيكادا ايگىلى سكريپكاشى ايمان مۇساقوجايەۆانىڭ كونسەرتى ءوتتى
اتاقتى مەكسيكاندىق ديريجەر ەنريكە باتيستىڭ (Enrique Bátiz) باسشىلىعىنداعى مەحيكو شتاتىنىڭ سيمفونيالىق وركەستىرىمەن بىرلەسكەن گالا-كونسەرتى ءوتتى، دەپ حابارلايدى قازاقپارات مادەنيەت جانە سپورت مينيسترلىگىنىڭ باسپا ءسوز قىزمەتىنە سىلتەمە جاساپ.
قازاقستان رەسپۋبليكاسى تاۋەلسىزدىگىنىڭ 25 جىلدىعىنا ورايلاستىرىلعان كونسەرت قازاقستاننىڭ مەكسيكاداعى ەلشىلىگىنىڭ قولداۋىمەن ۇيىمداستىرىلدى.
قازاقستاندىق تانىمال سكريپكاشى ايمان مۇساقوجايەۆانىڭ كونسەرتىن تىڭداۋعا مەحيكو شتاتىنىڭ باسشىلىعىنىڭ، جەرگىلىكتى پارلامەنتتىڭ جانە زيالى قاۋىم وكىلدەرى كەلدى. مەكسيكا جۇرتشىلىعى مۇساقوجايەۆانىڭ ورىنداۋىندا الەمدىك كلاسسيكانىڭ قازىنالارى - يوگاننەس برامستىڭ تۋىندىلارىن تىڭدادى. سونداي-اق مەكسيكا ساحناسىندا العاش رەت قازاق كلاسسيكالىق ونەرىنىڭ ءبىرتۋما تۋىندىلارى - نۇرعيسا تىلەنديەۆتىڭ «اققۋ» جانە ت. ب. شىعارمالارى ورىندالدى.
قازاقستاندىق مۋزىكانتتىڭ ونەرىنە ءتانتى بولعان مەكسيكا حالقى ءاربىر قويىلىمعا دۇركىرەي قول سوعۋمەن بولدى. ايتىپ كەتۋ كەرەك، مەحيكو شتاتىنىڭ تۇرعىندارى قازاقستاندىق ونەرمەن العاشقى رەت تانىسقان بولاتىن. ولار ساحنادان تىس سۇحباتتاردا بولاشاقتا قازاقستان مادەنيەتى جانە ورىنداۋشىلارىنىڭ ونەرىمەن جاقىنىراق تانىسۋعا مۇددەلى ەكەندىكتەرىن ايتىپ جاتتى.
«قازاقستاندىق ونەرپازداردىڭ شەتەلدەردەگى كونسەرتتەرى ەلىمىزدىڭ باي مادەنيەتىن حالىقارالىق دەڭگەيدە تانىتۋعا زور ۇلەس قوستى دەگەن سەنىمدەمىن. بارشا الەم ءبىزدىڭ مەملەكەتىمىز، تاۋەلسىزدىگىمىزدىڭ 25 جىلى ىشىندە ەلباسى باسشىلىعىمەن جەتكەن جەتىستىكتەرىمىز تۋرالى ءبىلۋ ءۇشىن ەلىمىزدى ناسيحاتتاۋ - ءبىزدىڭ مىندەتىمىز»، - دەدى ايمان مۇساقوجايەۆا.
