تۇڭعىشبايدى كۋاگەر رەتىندە شاقىرعان بولاتىن - جامانقۇلوۆتىڭ جۇبايى

 استانا. قازاقپارات - تانىمال اكتەر، پروديۋسەر تۇڭعىشباي جامانقۇلوۆتىڭ جۇبايى - داريا ابدۋمالىك قىزى جولداسىنىڭ قاراجات جىمقىرۋى مۇمكىن دەگەنگە سەنبەيدى.

ونىڭ ايتۋىنشا، جامانقۇلوۆ وسى فاكتىگە قاتىستى كۋاگەر رەتىندە شاقىرىلعان بولاتىن، دەپ حابارلايدى قازاقپارات ءتىلشىسى. «ماعان ەشتەڭە ايتپاي تۇرىڭىزشى دەدى. ماعان ايتۋعا بولمايدى دەپ جاتىر. مەن ءوزىم كەشە ەستىدىم. تۇڭعىشبايدى الدىمەن كۋاگەر رەتىندە شاقىرعان بولاتىن. دەرەك- دايەك الامىز دەدى. سودان كەيىن الىپ قالدى. ءارى قاراي نە بولعانىن ءوزىم دە بىلمەيمىن. مەن قازىر شىنىمەن ەشتەڭە ايتا المايمىن، ول باسىندا تەك كۋاگەر رەتىندە شاقىرىلعان. باسقا جاڭالىق بولسا ءوزىم دە حابارلاسامىن عوي»، - دەدى داريا ابدۋمالىك قىزى قازاقپارات تىلشىسىنە تەلەفون ارقىلى.

ونىڭ ايتۋىنشا، قازىرگى كەزدە تۇڭعىشباي جامانقۇلوۆتىڭ تەلەفوندارى قوسۋلى تۇر. الايدا ونىڭ بارلىعىن قۇقىق قورعاۋ ورگاندارى تاركىلەپ العان. «ماعان بىردەڭە ايتساڭ، ءىس ناسىرعا شابۋى مۇمكىن دەدى. ءسال كۇتە تۇرايىقشى. مەنى تىڭداپ جاتىر. ءدال قازىر ەشتەڭە ايتا المايمىن»، - دەيدى ول.

ەسكە سالا كەتەيىك، ۇلتتىق سىبايلاس جەمقورلىققا قارسى ءىس- ارەكەت بيۋروسىنىڭ مالىمەتىنە سايكەس، «فەنيكس» كوركەم فيلمىن تۇسىرۋگە ارنالعان 79 ميلليون تەڭگە كولەمىندەگى بيۋدجەت قاراجاتى «ت. ك. TURAN UNIVERSAL BUSINESS» ج ش س ەسەپ- شوتىنا اۋدارىلىپ، سول ارقىلى 69 ميلليون تەڭگەسى ۇرلانعانى ايتىلعان ەدى. ال اتالعان فيرمانىڭ قۇرىلتايشىسى - كارتينانىڭ باس پروديۋسەرى تۇڭعىشباي جامانقۇلوۆ. عالامتوردان الىنعان كاسىپورىننىڭ ءتولقۇجاتىنا سايكەس، «ت. ك. TURAN UNIVERSAL BUSINESS» ج ش س الماتى قالاسىنىڭ المالى اۋدانىندا ورنالاسقان. فيرمانىڭ اينالىساتىن سالاسى «كوتەرمە جانە بولشەك ساۋدا، اۆتوموبيلدەر مەن موتوتسيكلدەردى جوندەۋ» دەپ كورسەتىلگەن. قاراشانىڭ 2 ءسى كۇنى بيۋدجەت قارجىسىن جىمقىردى دەگەن كۇدىكپەن تۇڭعىشباي جامانقۇلوۆ ۇستالدى. سونداي- اق سوت سانكتسياسىمەن «قازاق فيلم» ا ق- نىڭ ەكونوميكا جانە قارجى باسقارۋشى ديرەكتورى گ. ىسقاقوۆا مەن اتقارۋشى پروديۋسەر ن. يۋدينا تۇتقىندالدى.