تۇڭعىشباي جامانقۇلوۆ باسقارعان فيرما نەمەن اينالىساتىنى بەلگىلى بولدى

استانا. قازاقپارات - ۇلتتىق سىبايلاس جەمقورلىققا قارسى ءىس- ارەكەت بيۋروسى «فەنيكس» كوركەم فيلمىن تۇسىرۋگە ارنالعان بيۋدجەتتىك قاراجاتتى جىمقىرۋ فاكتىسى بويىنشا كۇدىكتى رەتىندە تانىمال اكتەر، پروديۋسەر تۇڭعىشباي جامانقۇلوۆتى ۇستاعان بولاتىن.

  وسىعان بايلانىستى جامانقۇلوۆ باسقارعان
«Т.К.TURAN UNIVERSAL BUSINESS» ج ش س- نىڭ نەمەن اينالىساتىنى بەلگىلى بولدى، دەپ حابارلايدى قازاقپارات.

ەسكە سالا كەتەيىك، ۇلتتىق سىبايلاس جەمقورلىققا قارسى ءىس- ارەكەت بيۋروسىنىڭ مالىمەتىنە سايكەس، «فەنيكس» كوركەم فيلمىن تۇسىرۋگە ارنالعان 79 ميلليون تەڭگە كولەمىندەگى بيۋدجەت قاراجاتى «Т.К.TURAN UNIVERSAL BUSINESS» ج ش س ەسەپ- شوتىنا اۋدارىلىپ، سول ارقىلى 69 ميلليون تەڭگەسى ۇرلانعانى ايتىلعان ەدى. ال اتالعان فيرمانىڭ قۇرىلتايشىسى - كارتينانىڭ باس پروديۋسەرى تۇڭعىشباي جامانقۇلوۆ.

 عالامتوردان الىنعان كاسىپورىننىڭ ءتولقۇجاتىنا سايكەس، «Т.К.TURAN UNIVERSAL BUSINESS» ج ش س الماتى قالاسىنىڭ المالى اۋدانىندا ورنالاسقان. فيرمانىڭ اينالىساتىن سالاسى «كوتەرمە جانە بولشەك ساۋدا، اۆتوموبيلدەر مەن موتوسيكلدەردى جوندەۋ» دەپ كورسەتىلگەن. قىزمەتى - اۆتوموبيل بەنزينىنىڭ كوتەرمە ساۋداسى. مەكەن- جايى - الماتى قالاسى، المالى اۋدانى، ايتيەۆ كوشەسى، 51 -ءۇي، 36-كەڭسە.

 ايتا كەتەيىك، كەشە، قاراشانىڭ 2- كۇنى قارجىنى جىمقىردى دەگەن كۇدىكپەن ۇستالعان تۇڭعىشباي جامانقۇلوۆتان باسقا، سوت سانكسياسىمەن «قازاق فيلم» ا ق- نىڭ ەكونوميكا جانە قارجى باسقارۋشى ديرەكتورى گ. ىسقاقوۆا مەن اتقارۋشى پروديۋسەر ن. يۋدينا دا تۇتقىندالدى.

 اۆتور: ارمان اسقاروۆ