اقجارقىننىڭ اناسى: مەنىڭ جۇرەگىم سەنىمەن بىرگە دەپ ءبىل، جانىم

استانا. قازاقپارات - قىتايدا سوتتالىپ جاتقان اقجارقىن تۇرلىبايعا اناسى اۋديو جازبا جىبەرىپ، سوت بارىسىندا دەمەۋ بولدى، دەپ حابارلايدى قازاقپارات.

«اقجارقىنىم، التىنىم، ەش ۋايىمداما! ءبارى جاقسى بولادى، قۇداي قالاسا، از قالدى. ادۆوكاتتارىڭ دا جاقسى جۇمىس ىستەپ جاتىر. ولاردى دا قۇداي الدارىنان جارىلقاسىن! بىزگە جاساعان جاقسىلىقتارى قۇدايدان قايتسىن دەيمىز. جانىم-اۋ، التىنىم-اۋ ءار ادامنىڭ وزىنە بەرسىن، پەشەنەسىنە بەرسىن! التىنىم، كۇنىم، اقىلىم سەنى قاتتى جاقسى كورەمىن. سەن ونى بىلەسىڭ. اتاڭنىڭ، اپاڭنىڭ، اناڭنىڭ جۇرەگى سەنىمەن بىرگە دەپ ءبىل، جانىم. ءبارىمىز سەنى ساعىنىپ وتىرمىز. ەرتەرەك ورالارسىڭ ۇيگە. قۇداي قالاسا، ءبارى جاقسى بولادى»، - دەيدى اقجارقىننىڭ اناسى اۋديو جازباسىندا.

ايتا كەتەيىك، ق ح ر گۋاڭدۇڭ پروۆينسياسى گۋاڭجوۋ قالاسىنىڭ ءبىرىنشى ساتىداعى سوتىندا اقجارقىن تۇرلىبايدىڭ ءىسىن قايتا قاراۋ باستالدى. وتىرىسقا ءۇش سۋديا، ەكى ايىپتاۋشى، ەكى قىتايلىق ادۆوكات جانە قازاقستاندىق ادۆوكات سۇڭقار نۇرماعامبەتوۆ، ق ر- دىڭ ق ح ر- داعى ەلشىلىگى كونسۋلدىق ءبولىمىنىڭ جەتەكشىسى بولات سىرلىبايەۆ، اۋدارماشى، ستەنوگرافيست، ەكى جاساۋىل، اقجارقىن تۇرلىباي جانە ق ح ر اككرەديتتەلگەن «قازاقپارات» ح ا ا جانە "حابار 24"، "حابار" جۋرناليستەرى قاتىسۋدا.

ەسكە سالا كەتەيىك، 21 جاستاعى قازاق قىزى اقجارقىن تۇرلىباي 2014 -جىلدىڭ ناۋرىز ايىندا قىتايدىڭ مالايزيامەن شەكاراسىندا ەسىرتكىمەن ۇستالعان بولاتىن. ونىڭ جۇك سومكەسىنەن 4,5 كەلى ەسىرتكى تابىلدى، اقجارقىن ول تۋرالى بىلمەيتىنىن مالىمدەگەن. وسى ءىس بويىنشا قىتايدىڭ گۋاڭجوۋ سوتى اقجارقىن تۇرلىبايدى ەسىرتكى كونترابانداسىمەن اينالىستى دەپ ايىپتاپ، ءومىر بويىنا باس بوستاندىعىنان ايىردى. 2016 -جىلى 7 -ساۋىردە اپەللياتسيالىق ساتىداعى سوت اقجارقىن تۇرلىبايدىڭ ءومىر بويىنا باس بوستاندىعىنان ايىرۋ جازاسىن وزگەرتۋ جانە ءىستى ءبىرىنشى ساتىداعى سوتتىڭ قاراۋىنا جىبەرۋ تۋرالى قاۋلى ەتتى.

اۆتور: مارلان جيەمباي