قىتايدا اقجارقىن تۇرلىبايدىڭ سوتى باستالدى - فوتو

گۋاڭجوۋ. قازاقپارات - ق ح ر گۋاڭدۇڭ پروۆينتسياسى گۋاڭجوۋ قالاسىنىڭ ءبىرىنشى ساتىداعى سوتىندا اقجارقىن تۇرلىبايدىڭ ءىسىن قايتا قاراۋ باستالدى، دەپ حابارلايدى قازاقپاراتتىڭ قىتايداعى مەنشىكتى ءتىلشىسى.

وتىرىسقا ءۇش سۋديا، ەكى ايىپتاۋشى، ەكى قىتايلىق ادۆوكات جانە قازاقستاندىق ادۆوكات سۇڭقار نۇرماعامبەتوۆ، ق ر  ەلشىلىگىنىڭ كونسۋلدىق ءبولىمىنىڭ جەتەكشىسى بولات سىرلىبايەۆ، اۋدارماشى، ستەنوگرافيست، ەكى جاساۋىل، اقجارقىن تۇرلىباي جانە ق ح ر اككرەديتتەلگەن «قازاقپارات» ح ا ا جانە «حابار 24»، «حابار» جۋرناليستەرى قاتىسۋدا.

اۋدارماشىنىڭ بولۋىنا قاراماستان اقجارقىن ونىڭ قىزمەتىنەن باس تارتىپ، سوت پروتسەسىن قىتاي تىلىندە وتكىزۋدى ۇيعاردى.

اقجارقىننىڭ شاش ۇلگىسى وزگەرگەن. ۇستىنە اق فۋتبولكا كيگەن. ادۆوكاتتار ونىڭ كىسەنىن شەشىپ، جىلى كيىم كيگىزۋدى سۇرادى. سوت ءوتىنىشتى قاناعاتتاندىردى.

 ەسكە سالا كەتەيىك، 21 جاستاعى قازاق قىزى اقجارقىن تۇرلىباي 2014 - جىلدىڭ ناۋرىز ايىندا قىتايدىڭ مالايزيامەن شەكاراسىندا ەسىرتكىمەن ۇستالعان بولاتىن. ونىڭ جۇك سومكەسىنەن 4,5 كەلى ەسىرتكى تابىلدى، اقجارقىن ول تۋرالى بىلمەيتىنىن مالىمدەگەن.

 وسى ءىس بويىنشا قىتايدىڭ گۋاڭجوۋ سوتى اقجارقىن تۇرلىبايدى ەسىرتكى كونترابانداسىمەن اينالىستى دەپ ايىپتاپ، ءومىر بويىنا باس بوستاندىعىنان ايىردى. 2016 - جىلى 7 - ساۋىردە اپەللياتسيالىق ساتىداعى سوت اقجارقىن تۇرلىبايدىڭ ءومىر بويىنا باس بوستاندىعىنان ايىرۋ جازاسىن وزگەرتۋ جانە ءىستى ءبىرىنشى ساتىداعى سوتتىڭ قاراۋىنا جىبەرۋ تۋرالى قاۋلى ەتتى.