قازاقستاندا ساق امازونكالارى تۋرالى فيلم ءتۇسىرىلىپ جاتىر - فوتو
اتالعان فيلم ساق داۋىرىندە ءومىر سۇرگەن فەمينيست اپكەلى-سىڭلىلەردىڭ ءومىرى تۋرالى باياندايدى. بۇل تۋرالى Stan.kz حابارلايدى.
بۇگىن ەلىمىزدە ساق ايەلدەرى تۋرالى «امازونكا» دەرەكتى فيلمىنىڭ ءتۇسىرىلىم جۇمىستارى اياقتالدى. اتالعان تۋىندىنى ءتۇسىرۋ ءۇشىن نەبارى 14 كۇن قاجەت بولعان. ونى ا ق ش- تىڭ سميتسونوۆ ينستيتۋتىنىڭ تاپسىرىسىمەن تۇسىرگەن ەكەن. ساق داۋىرىنەن سىر شەرتەتىن تۋىندىنى Colibri Films كومپانياسى ءتۇسىرىپ جاتىر. ءبىراق، فيلمنىڭ قولعا الىنۋىنا شەتەلدىك ينستيتۋت تۇتقا بولعان. ينستيتۋت دەرەكتى فيلمدى امەريكالىق ارنادا كورسەتۋگە ۋادە ەتكەن. مۇنىمەن قاتار، قارجىلاندىرىپ، ءتۇسىرىلىم الاڭىندا قازاقستاندىق رەجيسسەرلەرمەن بىرگە جۇمىس ىستەگەن ءارى كارتيناداعى رەكۆيززيتتەردىڭ ب. ز. د. 5- عاسىرعا ساي كەلۋىن ءجىتى باقىلاعان. «امازونكا» فيلمىنىڭ رەجيسسەرى نارىن يگىلىكوۆ شەتەلدىك مامانداردان كوپ تاجىريبە جيناعانىن ايتىپ جاتىر.
«كاستينگ ونلاين رەجيمدە جۇرگىزىلدى. الدىمەن، اكتەرلەردى ءبىز تاڭداپ، ارتىنشا ۆيدەولارىن امەريكالىقتارعا جىبەردىك. ولار كوڭىلدەرىنەن شىققان اكتەرلەرمەن تاعى دا كاستينگ وتكىزدى. قارۋ-جاراق، كيىمدەردى تاريحشىلاردىڭ ەسكيزدەرى بويىنشا جاسادىق. ولاردى ازىرلەۋگە امەريكالىق ارحەولوگ ەدرين مەيەر اتسالىستى. تاپسىرىس بەرۋشىلەر فيلمدى تەك كەلەسى جىلى كورسەتەمىز دەپ جوسپارلاپ وتىر. وسىعان وراي، فيلمدى قازاقستاندا ەرتەرەك كورسەتە بەرۋگە رۇقسات الدىم. قۇدايعا شۇكىر، اۋا رايىنىڭ سۋىعىنان وزگە قيىندىق بولمادى. ونىڭ ۇستىنە سەناريدى تاپسىرىس بەرۋشىلەردىڭ وزدەرى جازعان بولاتىن. ءبىز بار بولعانى ءتۇسىرىلىم ورنى مەن اكتەرلەردى تاۋىپ بەردىك»، - دەيدى تۋىندىنىڭ رەجيسسەرى نارىن يگىلىكوۆ.
«امازونكا» دەرەكتى فيلمى الماتى وبلىسى جامبىل مۋزەيى اۋىلىندا تۇسىرىلگەن. الەمدىك پرەمەراسى 2017-جىلدىڭ 15- قازانىنا جوسپارلانىپ وتىر. ال ەلىمىزدە EXPO-2017 اياسىندا ودان دا ەرتەرەك كورسەتىلمەك. باستى رولدەردىڭ ءبىرىن دينارا باقتىبايەۆا سومدايدى. ادەتتە ول كومەديالىق جانرداعى فيلمدەرگە تۇسكەن. سول سەبەپتى، ول ءتۇسىرىلىم بارىسىندا ايتارلىقتاي قيىندىقتار بولعانىن ايتىپ جاتىر. ونىڭ ۇستىنە دايىندالۋعا ۋاقىتى دا بولماعان ەكەن.
«مەن باسقا جوبادان بىردەن وسى جەرگە كەلدىم. دايىندالىپ ۇلگەرمەدىم. وسى ۋاقىتقا دەيىن وزگە جانرداعى فيلمدەرگە ءتۇسىپ ءجۇردىم. ازداپ قينالعانىم بار. ءبىراق، تاريحي جوبا وزىمە قاتتى ۇنادى. زور تاجىريبە جينادىم دەسەم دە بولادى. فيلمدە اەللا ەسىمدى بويجەتكەننىڭ ءرولىن سومدايمىن. مەن ومىردە وتە سابىرلى ادام بولعاندىقتان، كەيىپكەرىم وزىمە ۇقسامايدى. ول كەرىسىنشە قىزۋقاندى، بارلىق تۇسىنىسپەۋشىلىكتى ۇرىسپەن شەشكەندى ءجون كورەدى. ءتۇسىرىلىم الاڭىندا كەز كەلگەن ءرولدى سومداي الامىن. ال فيلمگە ورالساق، ول ماعان فەمينيزمدى كوكسەگەندىگىمەن ۇنادى»، - دەيدى دينارا باقتىبايەۆا.
دەرەكتى فيلم ەۋرازيانىڭ تاۋلى ايماعىنداعى ءۇش اپكەلى-ءسىڭلىنىڭ ءومىرىن باياندايدى. ۇزاقتىعى - 50 مينۋت. ولاردىڭ ەسىمدەرى - الكايا، سامسي، اەللا. ال دينارا باقتىبايەۆادان وزگە عازيزا، تاڭشولپان تىلەۋباي، حۋلان چۋلۋۋن سىندى اكتريسالار بوي كورسەتەدى.
