وليمپيادا چەمپيونى اتاعىنان ايىرىلعان سپورتشىلاردان مەملەكەتتىك سىياقى قايتارىپ الىنبايدى - مۇسايبەكوۆ
بۇل تۋرالى بۇگىن ق ر مادەنيەت جانە سپورت ۆيتسە-ءمينيسترى ساكەن مۇسايبەكوۆ ءمالىم ەتتى، دەپ حابارلايدى قازاقپارات.
«سپورشى جارىسقا شىعار الدىندا ەڭ ءبىرىنشى كەزەكتە وليمپيادا حارتياسىمەن جانە WADA كودەكسىمەن تولىقتاي كەلىسەدى. مىنە، سپورتشى وسى ەكى نەگىزگى قۇجاتتى قابىلداي وتىرىپ، وليمپيادا ويىندارىنا قاتىسادى. وليمپيادا ويىندارىنا قاتىساتىن سپورتشى قانداي دا ءبىر دوپينگتىك وقيعاعا تاپ بولار بولسا، وندا مەدالدى قايتارۋ تۋرالى شارتقا قول قويادى»، - دەدى ۆيتسە-مينيستر.
وسى رەتتە ول بۇعان دەيىن دە دوپينگ داۋىنا ۇرىنعان سپورتشىلاردىڭ بولعاندىعىن اتاپ ءوتتى. ماسەلەن، ونىڭ سوزىنە قاراعاندا، دوپينگ داۋىنا ىلىككەن ا ق ش- تىڭ 15 سپورتشىسىنىڭ 4 ەۋى عانا مەدالدارىن قايتارىپ بەرگەن. ال 14 رەسەيلىك، 11 بولگار مەدالدارىن قايتارماعان.
«بۇل ناقتى اقپاراتتار. سوندىقتان دا بۇل سپورتشىنىڭ ءوز شەشىمى بولماق. ەگەر ح و ك مۇنداي تالاپ قوياتىن بولسا، وندا مۇنداي شەشىمگە نارازىلىق تانىتۋعا 20 كۇن بار. ال ەگەر سپورتشى (نارازىلىق تانىتۋدان) باس تارتسا، وندا مەدالدى قايتارۋ-قايتارماۋ ونىڭ ار-وجدانىنا بايلانىستى. ءبىراق، ونىڭ ەشقانداي دا قۇندىلىعى بولمايدى. تەك لوندونداعى نەمەسە بەيجىڭدەگى وليمپيادا ويىندارىنان ەستەلىك مەدال بولىپ قانا قالماق. ويتكەنى، قالاي بولعاندا دا ونى اتاعىنان ايىرادى»، - دەدى مۇسايبەكوۆ.
سونىمەن قاتار ول ب ا ق وكىلدەرىنىڭ وليمپيادا چەمپيوندارىنا مەملەكەت تارابىنان بەرىلگەن سىياقىعا قاتىستى ساۋالدارىنا دا جاۋاپ بەردى.
«مۇنداي جايت ورىن الدى، نە ىستەيمىز، ەندى؟ وعان كونۋ قاجەت. ال سىياقىعا، پاتەرگە قاتىستى ايتار بولسام، ءبىزدىڭ زاڭنامامىزدا سپورتشى دوپينگكە ىلىگەتىن بولسا، وندا بۇعان دەيىن بەرىلگەن سىياقى نەمەسە پاتەر قايتارىپ الىنادى دەگەن نورما جوق»، - دەدى ول.
ايتا كەتەيىك، حالىقارالىق وليمپيادا كوميتەتى دوپينگ سىنامادا تىيىم سالىنعان زاتتار تابىلعان 2012-جىلعى وليمپيادا چەمپيوندارى سۆەتلانا پودوبەدوۆا، مايا مانەزا، زۋلفيا چينشانلونىڭ كورسەتكەن ناتيجەلەرى جوققا شىعارىلعانىن رەسمي حابارلاعان بولاتىن.
اۆتور: مارلان جيەمباي
