قازاق بوكسىنىڭ نەگىزىن قالاۋشى شوقىر بولتەك ۇلى تۋرالى دەرەكتى فيلم ءتۇسىرىلدى

استانا. قازاقپارات - الماتىدا قازاق بوكسىنىڭ نەگىزىن سالۋشى شوقىر بولتەك ۇلىنىڭ 100 جىلدىعىنا وراي ازاماتتى ەسكە الۋ شاراسى بولىپ ءوتتى.

وعان شوقىر بولتەك ۇلىنىڭ ءتول شاكىرتى سەرىك ابدەناليەۆ، وليمپيادا چەمپيونى ەرماحان ىبرايىموۆ، «الاش پرايد» جەكپە-جەك كلۋبىنىڭ جەتەكشىسى دانيار قاسقاراۋوۆ سياقتى ەلگە تانىمال ازاماتتار قاتىستى.

ەسكە الۋ شاراسى بارىسىندا، شوقىر بولتەك ۇلىنا ارنالعان دەرەكتى فيلم ءدۇيىم جۇرتتىڭ نازارىنا ۇسىنىلدى. بۇل فيلمنىڭ ءتۇسىرىلىم جۇمىستارىنا قاتىسىپ، جارىققا شىعارعانداردىڭ قاتارىندا س. بەردىقۇلوۆ اتىنداعى سىيلىقتىڭ لاۋرەاتى راۋان وقاس، سپورت جۋرناليستەرى اسقار اعاتايەۆ، سەرىك نويانباي ۇلى، ماديار ارىستانبايەۆتاردى ەرەكشە اتاپ وتۋگە بولادى. دەرەكتى فيلم شوقىردىڭ ءوزى تۋعان جارمىش اۋىلىندا، بالالىق شاعى وتكەن فورت-شيەۆچەنكودا تۇسىرىلگەن.

تۋىندىداعى ەپيزودتاردىڭ بىرىندە شوقىر بولتەك ۇلىنىڭ بەينەسىن تانىمال بوكسشى جانقوش تۇراروۆ سومداعان. «فيلمنىڭ ءوزى جاقىن ۋاقىتتا وتاندىق تەلەارنالاردىڭ بىرىنەن كورەرمەندەردىڭ نازارىنا ۇسىنىلادى. «شوقىر بولتەك ۇلى سياقتى بىرەگەي تۇلعانىڭ 100 جىلدىعىن اتاپ ءوتۋدى وزىمىزگە پارىز ساناپ، قولىمىزدان كەلەتىنى دەرەكتى فيلمدى ءتۇسىرىپ شىقتىق. وسى ورايدا بىزگە قولداۋ كورسەتكەن ماڭعىستاۋ بوكس فەدەراتسياسىنا ەرەكشە العىس بىلدىرەمىز. قاراشا ايىندا «قازاق بوكسىنىڭ اتاسى» اتتى تۋىندى كوپشىلىك نازارىنا تارتۋ ەتىلەدى»، - دەدى فيلم سەناريىنىڭ اۆتورى سەرىك نويانباي ۇلى.

اۆتور: كۇنسۇلتان وتارباي