ەكسپو- قالاشىقتاعى پاتەرلەردىڭ جالعا الۋ قۇنى قانشا

استانا. قازاقپارات - استاناداعى ەكسپو كورمەسىنە قاتىساتىن ەلدەردىڭ اراسىندا بۇگىن بەس ەل ءوز پاۆيلوندارىن يەلەندى.

«استانا-2017 ۇلتتىق كومپانياسى» ا ق باسقارما ءتوراعاسى احمەتجان ەسىموۆ بۇگىن فرانسيا، گەرمانيا، تۇركيا، ۆەنگريا جانە قىتاي مەملەكەتىنە پاۆيلونداردىڭ قۇجاتى مەن ەكسپو قالاشىقتاعى پاتەرلەردىڭ سەرتيفيكاتىن تابىستادى.

شەتەلدىك پاۆيلونداردى تولتىرۋعا كەلگەن قىزمەتكەرلەر ەكسپو قالاشىقتاعى پاتەرلەردى جالداپ تۇرادى. ليۋكس كلاستى پاتەرلەردىڭ ءبىر كۇنگى جالعا الۋ قۇنى 40-50 مىڭ تەڭگەنى قۇرايدى ەكەن. بۇل تۋرالى ەكسپو قالاشىقتىڭ باسقارۋشى ديرەكتورى عالىمجان قارىمساقوۆ ءمالىم ەتتى.

قازىر 40 پاتەر تولىق جابدىقتالدى، ولاردىڭ 30 پايىزى «Gold» كلاستى پاتەرلەر، قالعاندارى «Silver» دارەجەسىندە. جۋىق ارادا قالاشىقتاعى پاتەرلەردى 3 كلاسسقا ءبولۋدى كوزدەپ وتىرمىز. كوبىنەسە، بۇل پاتەرلەر شەتەلدەردىڭ كوميسسارلارى تۇراتىن ۇيلەر»، - دەدى جۋرناليستەرمەن اڭگىمەلەسكەن قارىمساقوۆ.

«40 پاتەردى ءۇش اپتادا تولىق جابدىقتادىق. جالپى، ەكسپو كورمەسىنە بايلانىستى ءار ەلدىڭ پاۆيلونىندا جۇمىس ىستەۋگە كەلگەن ادامداردىڭ جاتىپ-تۇرۋى ءۇشىن 750 پاتەر سالىنادى دەپ جوسپارلانعان. بۇل پاتەرلەردى ناۋرىز ايىنا دەيىن اياقتاۋ كەرەك. قاراشا ايىندا تاعى 150 پاتەردى جالعا تاپسىرامىز»، - دەيدى ول.

سونىمەن، «التىن» كلاستى پاتەرلەردىڭ اۋماعى 100 شارشى مەتردى قۇرايدى ەكەن. ارينە، «Gold» كلاستى پاتەردىڭ جيھازى دا، تۇرمىستىق تەحنيكاسى دا ىشىنەن تابىلادى، «كۇمىس» كلاستى پاتەرلەردە كىر جۋاتىن ماشينا، توڭازتقىش، تەلەديدار ورناتىلادى.

ايتا كەتەيىك، ەكسپو كەشەنىنىڭ اۋماعى 175 گەكتاردى قۇراپ جاتىر.

اۆتور: كەنجەكەي توقتامۇرات قىزى