قانات يسلام: الەم مىقتىلارىن سابايتىن كۇن دە الىس ەمەس

استانا. قازاقپارات - قازاقستاندىق بوكسشى قانات يسلام كەشەگى وتكەن جەكپە- جەگىندە قولداۋ كورسەتكەنى ءۇشىن جانكۇيەرلەرىنە العىس ايتتى.

 بوكسشى بۇل تۋرالى ءوزىنىڭ ينستاگرامداعى پاراقشاسىندا حابارلادى.

 «جەڭىس قۇتتى بولسىن، قازاق ەلى. «الماتى ارەناعا» كەلىپ قولداۋ كورسەتكەن جانە كەلە الماي تەلەارنا الدىندا تاقىمىن قىسىپ وتىرعان اعايىنعا ايتار العىسىم زور. بۇل - سىزدەردىڭ جەڭىستەرىڭىز. جەكپە- جەك مەن ءۇشىن وتە قيىن بولدى. بارلىعى مەنەن نوكاۋت كۇتكەنىن بىلەمىن. كەزدەسۋدىڭ ەكىنشى راۋندىندا ەكى قولىمدى بىردەي جاراقاتتاپ، ويداعىداي سوققى جاساي المادىم. سول ءۇشىن دە ونى شارشاتىپ، 12 راۋند بويى جۇمىس ىستەۋ كەرەك بولدى. جاتتىقتىرۋشىمنىڭ كەڭەسى وسى بولدى.

 بۇل - سپورت. رينگتە كەز كەلگەن جاعداي بولادى. كوپتەن بەرى 12 راۋندتىق جەكپە- جەگىم بولماپ ەدى، مەن ءۇشىن بۇل دا ءبىر تاجىريبە. ءبارى الدا، بۇيىرتسا، الەم مىقتىلارىن سابايتىن كۇن دە الىس ەمەس. جارىستى ۇيىمداستىرىپ، قازاق ەلىندە تاماشا كاسىپقوي بوكس كەشىنىڭ وتۋىنە قولداۋ كورسەتكەن باۋىرجان بايبەك، باۋىرجان وسپانوۆ، ايدىن راحىمبايەۆ، كەڭەس راقىشيەۆ اعالارىما العىس ايتامىن. ەرىم دەيتىن ەل باردا، ەلىم دەيتىن ەرلەر كوبەيەدى. بۇل بوكس كەشى تالاي قازاق جاستارىنىڭ سپورتقا دەگەن قىزىعۋشىلىعىن وياتتى دەپ ويلايمىن. بىزدە مىقتى جاستار كوپ. بۇيىرتسا، كاسىپقوي بوكستا تالاي قازاق جىگىتتەرى ءوز بيىگىن باعىندىرادى. جەڭىستى كۇندەر كوپ بولسىن!» - دەدى سپورتشى.