سىنامالارىنان دوپينگ تابىلعان سپورتشىلارعا قاتىستى مينيسترلىك مالىمدەمە جاسادى
«قازاقستان رەسپۋبليكاسى ۇلتتىق وليمپيادالىق كوميتەتى حالىقارالىق وليمپيادالىق كوميتەتى تاراپىنان اعزالارىنان تىيىم سالىنعان پرەپاراتتاردىڭ ءىزى تابىلعان 2008 جانە 2012-جىلدارداعى وليمپيادا ويىندارىنا قاتىسقان قازاقستاندىق سپورتشىلارعا قاتىستى جازا قولدانىلعاندىعى تۋرالى رەسمي حابارلاما الدى»، - دەلىنگەن مينيسترلىك تاراتقان مالىمەتتەردە.
اتالمىش اقپارات حالىقارالىق وليمپيادالىق كوميتەتتىڭ رەسمي سايتىندا دا جاريالاندى. حالىقارالىق وليمپيادالىق كوميتەتىنىڭ تارتىپتىك كوميسسياسى 2008-جىلى بەيجىڭ وليمپياداسىنا قاتىسقان سپورتشىلاردىڭ «ا» جانە «ۆ» دوپينگ سىنامالارىن قوسىمشا تەكسەرۋ قورىتىندىسى بويىنشا قازاقستاندىق ەركىن كۇرەس پالۋانى، كۇمىس جۇلدەگەر تايمۋراز تيگيەۆتى سول ويىنداردان شەتتەتىپ، كورسەتكەن ناتيجەلەرىنىڭ كۇشىن جويىپ، ناگرادالارىن قايتارىپ الۋ تۋرالى شەشىم شىعاردى.
2012-جىلى لوندون وليمپياداسىنا قاتىسقان سپورتشىلاردىڭ سىنامالارىن تەكسەرۋ قورىتىندىسى بويىنشا تارتىپتىك كوميسسيا قازاقستاندىق اۋىر اتلەتتەر سۆەتلانا پودوبەدوۆا، زۋلفيا چينشانلو، مايا مانەزانى سول ويىنداردان شەتتەتتى. سونىمەن قاتار، كوميسسيا سپورتشىلاردىڭ ناتيجەلەرىنىڭ كۇشىن جويىپ، ناگرادالارىن قايتارىپ الۋ تۋرالى شەشىم شىعاردى.
«سپورتشىلارعا قولدانىلاتىن جازالاردىڭ مەرزىمىن ءتيىستى حالىقارالىق فەدەراتسيالار انىقتايدى. بۇل ماسەلە بويىنشا ق ر مادەنيەت جانە سپورت مينيسترلىگى ق ر ۇلتتىق وليمپيادا كوميتەتىمەن بىرلەسىپ جاقىن ۋاقىتتا، وسىنداي جاعدايلارمەن جۇمىس جۇرگىزىپ وتىرعان شەت مەملەكەتتەردىڭ تاجىريبەلەرىمەن تانىساتىن بولادى. جانە دە ماسەلەنىڭ زاڭنامالىق اسپەكتىلەرىن قاراستىرادى»، - دەپ حابارلادى مينيسترلىكتىڭ رەسمي سايتى.
«ءادىل سپورت» قاعيدالارى مەن «تازا» سپورتشىلاردى قورعاۋ جانە دوپينگتى قولدانۋعا «نولدىك توزىمدىلىك» ساياساتىن قولداۋ - قازاقستان رەسپۋبليكاسىنىڭ سپورت سالاسىنداعى باستى باعىتى».
