تۇڭعىش پرەزيدەنت مۋزەيىندە جاڭا زالدار اشىلدى

استانا. قازاقپارات - استانادا قازاقستان رەسپۋبليكاسى تۇڭعىش پرەزيدەنتى مۋزەيىندە بۇعان دەيىن جابىق بولعان جانە جاڭعىرعان زالدار بويىنشا باسپا ءسوز تۋرى ءوتتى.

تۋر بارىسىندا تىلشىلەرگە ەكى تىلدە جاڭا زالدار مەن تۇراقتى ەكسپوزيتسياسىنىڭ جاڭارتىلعان زالدار بويىنشا ارنايى ەكسكۋرسيا جۇرگىزىلدى. كەلۋشىلەرگە العاش ۇسىنىلىپ وتىرعان ەلباسى ن. نازاربايەۆتىڭ شاعىن جۇمىس كابينەتىندە ەكى نەمەسە كوپجاقتى داۋىس سيگنالدارىن تاراتاتىن بەينەكونفەرەنسيا بايلانىس جۇيەسى ارقىلى سەلەكتورلىق جيىندار وتكىزىلگەن. كابينەت تورىندە پرەزيدەنت ءسۇيىپ وقيتىن كىتاپتارى سورەلەرگە قويىلسا، ەكىنشى قابىلداۋ بولمەسىندە ەلباسىنىڭ ءوز ەڭبەكتەرى ورنالاسقان. زالداردىڭ ەرەكشەلىگى كىتاپتاردى اشىپ وقۋعا جانە ەستەلىك سۋرەتكە تۇسۋگە مۇمكىنشىلىك بار.

1997-2004 -جىلدارى ەڭ العاشقى مەملەكەت دامۋىنا بايلانىستى ستراتەگيالار نەگىزدەرى ءماجىلىس زالىندا قابىلدانعان. زالعا ەلباسىنىڭ قولجازبالارى مەن قۇجاتتارىنىڭ ساپالى كوشىرمەسى قويىلعان جانە ولاردى الىپ كورۋ ءۇشىن شىنى ۆيترينالار الىنىپ تاستالىنعان. سونىمەن قاتار ينتەراكتيۆتى ايماقتا تاۋەلسىزدىك كينوحورونيكاسىنان بىرەگەي كادرلاردى تاماشالاۋعا بولادى.

كۇمبەزدى زال فويەسىندەگى مەملەكەت باسشىسىنا تارتىلعان سىيلىقتار ورىندالۋ تەحنيكاسى مەن جاسالىنعان ماتەريالى بويىنشا جۇيەلەنىپ قويىلعان. بۇل زال ساق مادەنيەتىنە قاتىستى «التىن ادام» مەن شەتەلدەردەگى، ەلىمىزدەگى ارحەولوگيالىق جۇمىستار ناتيجەسىندە تابىلعان ەجەلگى التىن بۇيىمدار سىيلىقتار توپتاماسىمەن تولىقتى. سونداي- اق فارفور، كۇمىس، قولا بۇيىمدار توپتاماسى كەلۋشىلەر نازارىنا العاش رەت ەكسپوزيتسيالانىپ وتىر.

ق ر ت پ م ديرەكتورىنىڭ ورىنباسارى، تاريح عىلىمدارىنىڭ كانديداتى كۇلايشا قابدۋالي قىزى:

 -  بۇل -  پرەزيدەنتتىڭ ەلورداداعى العاشقى جۇمىس رەزيدەنتسياسى. مۋزەيدىڭ  اشىلعانىنا 12 جىل بولدى. جاڭادان اشىلعان جۇمىس كەڭسەلەرىن تاماشالاۋشىلار مەملەكەت ءىسىنىڭ قانشالىقتى قيىن ەكەنىن سەزىنە الادى. ەكىنشى قابىلداۋ بولمەسىنە ەرەكشە بەزەندىرىلگەن جانە بۇرىننان قولدانىلعان جيھازدار قويىلعان. تاقىرىپتىق ەكسپوزيتسيالارىمىزعا جاڭا كوزقاراسپەن قاراپ، عىلىمي زەرتتەۋ جۇمىسىمىزدىڭ ناتيجەسى رەتىندە 4-قاباتتا «ق ر پرەزيدەنتىنىڭ سىيلىقتارى» ەكسپوزيتسيالارىن كورسەتكىمىز كەلدى. كوپ جىلدان بەرى قوردا ساقتالىپ تۇرعان ماتەريالداردى زالعا الىپ شىعۋعا تىرىستىق. ال 3-قاباتتاعى ءماجىلىس زالىندا «ق ر مەملەكتتىك ستراتەگياسىنىڭ دامۋى» اتتى تاقىرىپتىق ەكسپوزيتسيالاردى ورنالاستىردىق. بۇل زالدا توقسانىنشى جىلدارى پايدالانىلعان تريبۋنامەن، كونستيتۋتسيا نۇسقاسىمەن 2006 -جىلى قولدانىلعان اق كيىزبەن، ەلباسى تاڭباسىمەن فوتوعا تۇسە الادى. بۇل ازاماتتىق سەزىمدى وياتۋ، ساياساتتى جاقىننان تانۋ ماقساتىندا ەكسپوزيتسيالارىمىزدى جاڭارتۋداعى العاشقى قادام، -  دەدى.

  تاڭشولپان بەگالى قىزى