مينيستر داۋرەن ابايەۆ قانات يسلامعا جەڭىس تىلەدى
بۇل تۋرالى مينيستر فەيسبۋكتاعى پاراقشاسىندا جازدى، دەپ حابارلايدى قازاقپارات.
«قىمباتتى دوستار!
تالانتتى بوكسشىمىز قانات يسلامنىڭ گانالىق پاتريك اللوتەيمەن جەكپە-جەگىنە ساناۋلى ساعاتتار قالدى. بوكس كەشىن «قازاقستان» ۇلتتىق تەلەارناسى تىكەلەي ەفيردە كورسەتۋدى جوسپارلاپ وتىر.
قانات - جاستارىمىز ءۇشىن پاتريوتتىقتىڭ ۇلگىسى. ونىڭ وزگە ەلدەگى زور مۇمكىندىكتەردەن باس تارتىپ، اتاجۇرتىنا ورالۋىن، سونىمەن قاتار ەلىمىزدىڭ اتاعىن شىعارۋعا تالپىنۋىن ۇلكەن ازاماتتىق دەپ بىلەمىن.
وسىنداي نامىستى جىگىتتەرىمىزدىڭ ارقاسىندا قازاقستان الەمگە تانىلۋدا. وسكەلەڭ ۇرپاق سالاۋاتتى ءومىر سالتىنا، سپورتقا قۇلشىنۋدا.
وسىنىڭ بارلىعى - بيىل 25 جىلدىعىن اتاپ وتكەلى وتىرعان قاستەرلى تاۋەلسىزدىگىمىزدىڭ جەمىسى.
قاناتقا جانە وسى كەشتە باق سىنايتىن باسقا دا بوكسشىلارىمىزعا ساتتىلىك تىلەيمىن!
بۇگىن بارشامىز ءبىر كىسىدەي سپورتشىلارىمىزعا قولداۋ كورسەتەيىك»، - دەلىنگەن وندا.
