بۇل چەمپيونداردىڭ ءبارىن مازاق ەتۋ - الەكسەي ني دوپينگ داۋى تۋرالى
«مەن باپكەر بولىپ كەلە جاتقالى بەرى مەن مۇندايدى العاش كورۋىم، سوندىقتان ەشقانداي بولجام ايتا المايمىن. قايتا تەكسەرۋ جارىس ءبىتىپ، ءتورت جىل وتكەننەن كەيىن جاسالىپ تۇر. مەنىڭشە، جارىستارعا قاتىستىرماۋ مەرزىمى سول سىنامالار الىنعان كۇننەن باستالعانى ءجون. ياعني، سپورتشىنى ءتورت جىلعا شەتتەتۋ كەرەك بولسا، 2016 -جىلى بۇل ۋاقىت اياقتالۋى ءتيىس. ءبارىمىز ا ا ح ف (اۋىر اتلەتيكانىڭ حالىقارالىق فەدەراتسياسى) وتىرىسىن كۇتىپ ءجۇرمىز، وندا ءبىزدىڭ ادۆوكاتتار سپورتشىلارىمىزدى قورعايدى. 2012 -جىلى ەڭ ۇزاق شەتتەتۋ ەكى جىل بولاتىن، سولاي بولىپ قالادى دەگەن ۇممىتەمىن»، - دەيدى الەكسەي ني.
قۇراما باس باپكەرىنىڭ ويىنشا، بۇل وقيعادا تۇسىنىكسىز جايتتار كوپ.
«وليمپيادا تاريحىن وسىنشا ۋاقىتتان كەيىن قايتا جازباق. سپورتشىلاردى وليمپيادا الدىندا، ءوتىپ جاتقان كەزدە جانە بىتكەسىن دە تەكسەردى، ءبىراق ەشتەمە تاپپاعان. وسىنشا ۋاقىتتا نە وزگەرە قالدى؟ تۇسىنە المادىم. بۇل قاندايدا ءبىر تۇسىنىك بويىنشا بەلگىلى ءبىر ەلدەردىڭ سپورتشىلارىنىڭ جەتىستىگىنە بوگەت بولۋ دەپ ويلايمىن»، - دەپ اتاپ ءوتتى ني.
«وليمپيادانىڭ ەكى دۇركىن چەمپيونى بولعان يلين... بۇل نە؟ دايىندىق پا؟ شوۋ ما؟ ادام ءوز تالانتى مەن ەڭبەگى ارقىلى جەتىستىككە جەتتى. وسى جولى دا جەڭەر ەدى. سپورتشى ءوز ەلىنىڭ ءان ۇرانى شىرقالىپ، تۋى كوتەرىلەتىن ساتكە ءومىر بويى دايىندالادى، وسىنىڭ ءبارىن قالاي ىسىرا سالۋعا بولادى؟!(...) وليمپيادا ويىندارىنىڭ ناتيجەلەرىنىڭ ءبارى الدىن الا دەسىن وندا، ءان ۇراندى دا تىڭداماي-اق قويايىق، تۋ دا كوتەرىلمەسىن، مەدال دا بەرمەسىن. وسىنىڭ ءبارىن ون جىلدان كەيىن جاساسىن! بۇل بارلىق چەمپيونداردى، وليمپياداعا قاتىسۋشىلار، باپكەرلەر جانە كورەرمەندەردى مازاق ەتۋ. بارلىعى مۇنى شىن ەكەن دەپ قۋاندى. سپورتشىلاردى، باپكەرلەردى پرەزيدەنتتەردىڭ جارلىعىمەن قارجىلاي ماراپاتتاپ جاتتى، البەتتە، سەگىز جىلدا ول قارجى ۇستالىپ كەتتى. ول جاعىن قالاي شەشەمىز؟»، - دەيدى ول.
ەسكە سالايىق، حالىقارالىق وليمپيادا كوميتەتى 2008 -جىلعى وليپيادانىڭ كۇمىس جۇلدەگەرى تايمۇراز تيگيەۆتىڭ مەدالىن قايتارىپ الۋ شەشىمىن شىعارعان. مايا مانەزا، سۆەتلانا پودوبەدوۆا مەن زۋلفيا چينشانلو 2012 -جىلعى وليپيادانىڭ «التىندارىنان» ايىرىلدى. بارلىق سپورتشىنىڭ دوپينگ سىنامالارى وسى جىلعى تەكسەرىستە تيىم سالىنعان زاتتار پايدالانعان دەپ كورسەتكەن.
