اراب جىگىتىنە تۇرمىسقا شىققان قازاق قىزى ەكى بالاسىن تاستاپ، ەلگە قاشىپ كەلدى
اراب جىگىتىنە تۇرمىسقا شىققان قازاق قىزى ەكى بالاسىن تاستاپ، ەلگە قاشىپ كەلدى
بۇل تۋرالى "قازاقستان" ۇلتتىق ارناسىنىڭ "ايەل باقىتى" باعدارلاماسىندا ايتىلدى.
"ايەل باقىتى" باعدارلاماسىنىڭ كەزەكتى سانىنا اراب جىگىتىنە تۇرمىسقا شىققان قازاق قىزى شاقىرىلدى. ول ءوزىنىڭ باسىنان وتكەن وقيعاسىن بايانداپ، وزگە ەلگە تۇرمىسقا شىعۋدىڭ سان سوقتىرار تۇستارىنا توقتالدى.
بەتىن ەلگە كورسەتۋدەن باس تارتقان قىز، جۇمباق كەيىپكەر رەتىندە كەلدى. ونىڭ ايتۋىنشا، ول ەكى وقۋ ورنىن ءبىتىرپ، ەكى جوعارى ءبىلىم بار وقىعان قىز ەكەن. دۋبايعا بارىپ جۇمىس جاساعان قىزدى سول جاقتا اراب جىگىتى ۇناتىپ قالىپ، وعان تۇرمىسقا شىعۋ تۋرالى ۇسىنىس ايتادى.
بۇل ۇسىنىستى اتا- اناسىنا جەتكىزگەن قىزعا اناسى اق باتاسىن بەرسە دە، اكەسى كەلىسپەي قويعان ەكەن. ءبىراق سوندا دا اناسىنىڭ كەلىسىمىنە سۇيەنگەن قىز كوزىن جۇمىپ، ەكىنشى ايەل بولىپ اراب جىگىتىنە تۇرمىسقا شىققان. اراعا ۋاقىت سالىپ، قىز بالا دۇنيەگە اكەلگەن كەلىنشەكتەن اراب جىگىتى ۇل تاۋىپ بەر دەپ قولقا سالادى. ۋاقىت وتە كەلە قازاق قىزى ۇلدى بولادى.
ونىڭ ايتۋىنشا، بارلىق ازاپ پەن زورلىق- زومبىلىق وسى كەزەڭنەن باستالعان. كۇيەۋى كەلىنشەكتى كۇندە سوققىنىڭ استىنا الىپ، ول ادام توزگىسىز جاعدايدا ءومىر سۇرە باستايدى. از- ماز جيناعان اقشاسىن الىپ، ول قاشۋعا بەكىنگەنىمەن كۇەۋى ونىڭ بۇل ارەكەتىن ءبىلىپ قويىپ، ويى جۇزەگە اسپاي قالعان. دەگەنمەن، امالىن تاۋىپ، ول ءبارىبىر دە ۇيىنەن قاشىپ شىعىپ، ەلىنە قاشىپ كەتەدى. بۇگىندە ەلگە كەلگەنىنە ءبىر جىل وتكەن كەلىنشەكتىڭ ەكى بالاسى كۇيەۋىمەن بىرگە قالعان. ول ءوزى قاشىپ قۇتىلعانىمەن، ەكى بالاسىن تاستاپ كەتۋگە ءماجبۇر بولعان.
بۇگىندە ءوزىنىڭ ماماندىعى بويىنشا استاناعا جۇمىسقا ورنالاسقان ونىڭ ەندىگى ماقساتى - ەكى بالاسىن قايتارىپ الۋ. ءبىراق، اراعا ەلشىلىكتى سالسا دا، ول ەكى بالاسىن قايتارا الماي وتىر. سەبەبى، اراب ەلىنىڭ زاڭ بويىنشا، ولار ءوز ەلىندە تۋعان بالالاردى اناسىمەن بىرگە جىبەرۋگە اسا قاتاڭدىقپەن قارايدى ەكەن. دەگەنمەن، جازا باسقان كەلىنشەك بالالارىن قايتارىپ الۋدان ءالى دە ءۇمىتتى.
