قىتايداعى قازاقتاردىڭ ءدىني كوزقاراسىنا، سالت- داستۇرىنە ەركىندىك بەرىلگەن - زو فىڭ

 استانا. قازاقپارات - قىتايداعى قازاقتاردىڭ جانە وزگە دە ۇلتتاردىڭ كوزقاراسىنا، سالت- داستۇرىنە ەركىندىك بەرىلگەن. بۇل تۋرالى بۇگىن قازاقپارات تىلشىسىنە استاناعا ءىس-ساپارمەن كەلگەن  ق ح ر مەملەكەتتىك كەڭەسى، ادام قۇقىقتارى جونىندەگى مەكەمەسىنىڭ باقىلاۋشىسىنىڭ ورىنباسارى زو فىڭ ءمالىم ەتتى.

 «قىتايدا دىنگە سەنۋ، سەنبەۋ اركىمنىڭ ءوز ەركىندە. كىم قانداي دىنگە سەنەدى، قانداي ءدىني شارالارعا قاتىسادى، بارلىعىنا ەشقانداي شەكتەۋ جوق. بۇگىندە شىنجاڭدا 23 ميلليوننان استام ادام ءومىر سۇرەدى. سونىڭ ىشىندە 10 ميلليونداي حالىق يسلام ءدىنىن ۇستانادى. شىنجاڭدا 24 مىڭنان استام مەشىت بار. يسلام ءدىنى بويىنشا ءدىني قىزمەتكەرلەر 29 مىڭنان اسادى. بۇل كورسەتكىش يسلام مەملەكەتتەرىندە كوپ كەزدەسە بەرمەيدى. مۇسىلمانداردىڭ قاجىلىققا بارۋى دا اشىق جولعا قويىلعان. قازىر شىنجاڭدا ءار جىلى 3800 دەي ادام مەككەگە بارىپ پارىزىن وتەيدى. مەملەكەت تاراپىنان ولاردى مەديتسينالىق باقىلاۋعا، ۇيىمداستىرۋ شارالارىنا ارنايى قارجى بولىنەدى. بۇل ساۋد ارابياسى كورولدىگى مەن قىتاي ەلىنىڭ ارنايى كەلسىمدەرى ارقىلى جۇزەگە اسىپ وتىر» ، - دەپ اتاپ ءوتتى زو فىڭ.

ونىڭ ايتۋىنشا قىتاي مەملەكەتى يسلام ءدىنى مەن تەرروريزمدى ەشقاشان بايلانىستىرمايدى.

 «قىتايدا مەكتەپتەگى بالالارعا، جاسوسپىرىمدەرگە ارنالعان ارنايى زاڭ بار. ولاردىڭ قاۋىپسىزدىگىنە، الاڭسىز ءبىلىم الۋىنا ءدىني شارالار كەدەرگى بولماۋى كەرەك. مەملەكەتىمىز قالىپتى ءدىني شارالار مەن تەرروريزمدى ءبولىپ قارايدى. يسلام ءدىنى مەن تەرروريزمدى ەشقاشان بايلانىستىرعان ەمەس. بۇل تۇرعىدا كوزقاراسىمىز قازاقستاننىڭ ۇستانىپ وتىرعان ساياساتىمەن بىردەي دەپ سانايمىز. تەرروريزم الەمگە قاۋىپ توندىرەدى. قوعامنىڭ تىنىشتىعىن بۇزادى. بەيكۇنا ادامداردىڭ جازىقسىز ءولىمىن ەشكىم قولدامايدى. ءبىز الەمدىك ۇيىمدارمەن بىرگە تەرروريزمگە ءۇزىلدى- كەسىلدى قارسىمىز»، - دەيدى ق ح ر مەملەكەتتىك كەڭەسى، ادام قۇقىقتارى جونىندەگى مەكەمەسىنىڭ ورىنباسار باقىلاۋشىسى زو فىڭ.

سونىمەن بىرگە ول قىتايداعى قانداستارىمىزدىڭ تۇرمىس- تىرشىلىگىن تىلگە تيەك ەتتى.

 «مەن قازاقتار قونىستانعان ايماقتاردا كوپ جۇمىس جاسادىم. ول جاقتا قازاقتار باي- باقىتتى تۇرمىس وتكىزىپ جاتىر دەپ ايتا الامىن. وزگە ۇلت وكىلدەرى سەكىلدى ولاردىڭ سالت- ءداستۇرىنىڭ وركەندەۋىنە، ءدىني سەنىمىنە بارلىق مۇمكىندىكتەر بەرىلگەن»، - دەيدى ول. 

 اۆتور: ريزابەك نۇسىپبەك ۇلى