جانات باقىت: قول كوتەرۋ، جانجال دەگەننىڭ ءبارى ايەل ادامنىڭ اششى تىلىنەن شىعادى

استانا. قازاقپارات - كوپشىلىككە كوگىلدىر ەكران ارقىلى بەلگىلى بولعان تەلەجۇرگىزۋشى جانات باقىت ومىردە قانداي ادام، بۇگىندە نەمەن اينالىسۋدا؟

قاتاڭ وبرازدى تالاپ ەتەتىن جاڭالىقتىڭ تىزگىنىن ۇستاپ كەلگەن قازاق تەليەۆيزياسى جۇلدىزىنىڭ ايتارى بار.

اسىل جار، اياۋلى انا، يبالى كەلىن ءرولىن اتقارىپ جۇرگەن بەلگىلى تەلەجۇرگىزۋشى جانات باقىت NUR. KZ پورتالىنا ارنايى سۇحبات بەرىپ تابىستى ءارى باقىتتى ايەل بولۋدىڭ سىرىمەن ءبولىستى.

جانات باقىت كاسىپكەرلىككە قالاي بەت بۇردى؟

جانات باقىت باسقانى قويىپ، جۋىقتا ءساندى ۇلتتىق كيىمدەر ساۋداسىنا بايلانىستى جەكە كاسىپكەرلىككە بەت بۇرعان ەدى. كەيىپكەرىمىز بۇل سالاعا ويدا جوقتا كەلگەنىن ايتادى. «ەشقاشان جەكە كاسىپپەن اينالىسام دەپ ويلاماپپىن. ءوزىم ەسەپكە ونشا جوق ەدىم، اقشاعا دا قىتىمىر ەمەسپىن، ۇنەمشىلمىن، ءبىراق ساۋداعا جاقىن ادامداردىڭ قاتارىنان ەمەسپىن. باسىندا ەفيرگە ءوزىمىزدىڭ قازاقستاندىق ديزاينەرلەردىڭ ۇسىنعان كيىمدەرىن كيىپ شىقتىم. سول كەزدەن باستاپ سۇرانىستار كوبەيە باستادى. «قايدان الاسىڭ؟ ءبىز دە ساتىپ الساق بولا ما؟» دەگەن سۇراقتار ءجيى كەلەتىن بولدى. سودان سوڭ ءوزىمىزدىڭ ديزاينەرلەردى جارنامالاي باستادىم. ءبىر كۇنى «نەگە ءبىز وسى ۇلتتىق كيىمدەردى تەك ناۋرىز مەيرامىندا عانا كيەمىز؟ نەگە كۇندەلىكتى كيمەسكە؟ » دەگەن وي كەلدى. ءۇيدىڭ قاسىنداعى ءبىر ساۋدا ورنىنا بارىپ سۇراسام، جالعا الۋ قۇنى ونشا قىمبات ەمەس ەكەن. سول جەردە كەلىسىپ، قولىما ەمۋلسيا الىپ، ءىشىن اكتەپ، ءوزىم جۋىپ- تازالاپ شىقتىم. ءبىرشاما ديزاينەرلەرمەن كەلىستىم. باسىندا قورقىنىش بولعانى راس. كەلۋشىلەر بىرتە- بىرتە كوبەيدى. حالىق قازاقشا كيىنە باستادى. ءسويتىپ، بىردەن ەكىنى قۇراپ، ەكىدەن ءتورتتى قۇراپ كاسىبىمدى باستاپ كەتتىم. شىنىمدى ايتسام، باسقا جۇمىستاردى قويدىم»، - دەيدى تەلەجۇرگىزۋشى.

جانات باقىت تەلەجۇرگىزۋشىلىكتەن راحات الا الماپتى. «تەلەجۇرگىزۋشى رەتىندە شىعىپ جۇرگەن كەزىمدە ول قىزمەتىمدى جان- تانىممەن سۇيمەدىم. ويتكەنى، اتقارىلىپ جاتقان قارا جۇمىس باسقالاردىڭ ەڭبەگى. مەنىكى دايىن نارسەنى كەشكى ەفيرگە شىعىپ ايتىپ بەرۋ، بارى سول عانا»، - دەيدى ول.

«كاسىپتى ءوز كۇشىممەن اشتىم، جولداسىم دا، اتا- انام دا باي ادامدار ەمەس»

«سۋ ىشكەن قۇدىعىڭا تۇكىرمە» دەيدى عوي قازاق. بالكىم مەنى بىرەۋلەر ول جەردەن كەتىپ قالعاننان كەيىن وسىلاي ايتىپ وتىر دەپ ويلاپ قالۋى مۇمكىن. ءيا، ماعان ول جۇمىس ۇنايتىن، مەنى تانىمال ەتتى. ءبىراق سول قىزمەتىم مەنى وسى كاسىپكە اينالدىرىپ الىپ كەلدى. كەيبىرەۋلەر كۇيەۋى باي ادام شىعار، ءوزى دە بار جەردەن شىققان دەپ ويلاۋى مۇمكىن. ولاي ەمەس. مەن كاسىپتى از- كەم اقشامەن باستادىم»، - دەيدى جانات باقىت.

جانات باقىت وتباسىن ءبىرىنشى ورىنعا قويادى

قازاق ەفيرىنىڭ جۇلدىزى، كاسىپكەر جانات باقىت 24 جاسىندا تۇرمىس قۇرعان. «جىگىت جۇگىرسە الادى، قىز جۇگىرسە قالادى دەگەن ءسوز راس. جولداسىممەن 9-سىنىپ وقىپ جۇرگەندە تانىستىم. كورشى تۇراتىن. ءبىراق مەن وعان 7-8 جىل كۇتەتىنىن، مەكتەپ ءبىتىرىپ، وقۋ وقىپ، ءبىر جىل جۇمىس ىستەپ، سوسىن تۇرمىسقا شىعاتىنىمدى ايتقان ەدىم. سوزىندە تۇرىپ، مەنى كۇتتى»، - دەيدى ول. جولداسى ەرشات مۇناي سالاسىندا جۇمىس ىستەيدى. باقىتتى وتباسى قازىرگى تاڭدا ءبىر ۇل، ءبىر قىز تاربيەلەپ وتىر.

«تاڭعى التى جارىمدا تۇرامىن، بالالاردى كيىندىرىپ بىرەۋىن مەكتەپكە، بىرەۋىن بالاباقشاعا جىبەرەم دە، ۆوكزال جاققا جۇگىرەمىن»، - دەيدى

نازىك جاندى بولسا دا، كەيىپكەرىمىز بارلىعىن ءوزى ىستەگەندى ۇناتادى ەكەن.

«سومكە- سومكە تاۋاردى يىعىما سالىپ الىپ پويىزعا تيەيمىن. ولاردى كۇتىپ الۋ، سالىپ جىبەرۋ سياقتى جۇمىستاردى ءوزىم اتقارامىن. ۆوكزالدا تانىپ جاتقان ادامدار كۇلەدى»، - دەيدى جانات باقىت.

«جۇمىس اراسىندا بالامدى مەكتەپتەن، كىشكەنتاي قىزىمدى بالاباقشادان الىپ ۇيگە قاراي جۇگىرەمىن. بۇدان بولەك گازەتتە باس رەداكتورلىق قىزمەتىم بار. ونىڭ دا جۇمىستارى جەتەرلىك. ماقالانى تەكسەرۋ كەرەك، تيپوگرافيامەن بايلانىستى جۇمىستارى تاعى بار. مەن ۇيقىنى سۇيمەيمىن. كۇنىنە 3-4 ساعات ۇيىقتايمىن»، - دەپ اعىنان جارىلدى جۋرناليست.

جانات باقىت وتباسىندا قالىپتاسقان قاعيدالارمەن ءبولىستى

جانات باقىت ايەل ادامنىڭ ەر ادامنان ءبىر ساتى تومەن تۇرۋ كەرەك دەپ ەسەپتەيدى. «ەر ادامعا ەشقاشان قارسى كەلمەۋ كەرەك. اقىلمەن تۇسىندىرۋگە بولادى. ايەل ادام ۇرىسقاننان ەشتەڭە شىقپايدى. جەڭبەيدى. قول كوتەرۋ، جانجال دەگەننىڭ ءبارى ايەل ادامنىڭ اشى تىلىنەن شىعادى. ەڭ باستىسى اقىلمەن، سابىرمەن جەڭە ءبىلۋ كەرەك»، - دەيدى تەلەجۇرگىزۋشى.

جانات باقىت ءوز بويىندا قالىپتاسقان قاعيدالارمەن ءبولىستى. «ءبىزدىڭ ۇيدە قالىپتاسقان ءبىرىنشى قاعيدا - كەشكى التى- جەتىدەن قالماي ىستىق تاماق دايىن تۇرۋى كەرەك. مىندەتتى تۇردە ءۇيىڭ تازا بولۋى كەرەك. قولدانىلعان ىدىستى جيناپ قويماي، بىردەن جۋىپ تۇرۋ كەرەك. ۇيىقتاماسام دا وسى قاعيدانى ۇستانامىن»، - دەپ اقتارىلدى وتاناسى.

«ەنە كەلىنىن قىزىنداي كورەدى دەگەن ءسوز شىندىققا جاتپايدى»

«مەنىڭ ەنەم جاقسى ادام. كەلىن بوپ تۇسكەنىمە 10 جىلدان استى. وسى ۋاقىتقا دەيىن ماعان «ولاي ىستە، بىلاي ىستە» دەپ ەشقاشان ايتقان ەمەس. مۇمكىن، كەمشىلىكتەرىم بولعان شىعار. ءبىراق بەتىمە باسىپ كورمەپتى»، - دەگەن ول «ەنە كەلىنىن قىزىنداي كورەدى، نەمەسە كەلىن ەنەسىن اناسىنداي كورەدى» دەگەن پىكىردىڭ جاي ءسوز ەكەنىنە سەنىمدى.

«ەنە اناڭداي بولا المايدى، كەلىن قىزىڭداي بولمايدى. كەلىننىڭ اتى - كەلىن. مەنى قىزىنداي كورەدى ەكەن دەپ، تۇسكى 11 گە دەيىن ۇيىقتاۋعا بولمايدى عوي. مۇندا ەڭ باستىسى، ءوزىڭدى سىيلاتا ءبىلۋ، بىرەۋدى سىيلاي ءبىلۋ»، - دەپ ءسوزىن تۇيىندەدى جانات باقىت.