استانادا قوناق ۇيلەردى مىندەتتى سەرتيفيكاتتاۋدان وتكىزۋ جوسپارلانۋدا
بۇل تۋرالى كەشە ق ر ينۆەستيتسيالار جانە دامۋ مينيسترلىگى تۋريزم دەپارتامەنتىنىڭ ديرەكتورى مارات يعاليەۆ ءمالىم ەتتى.
«قازىرگى ۋاقىتتا ق ر ينۆەستيتسيالار جانە دامۋ مينيسترلىگىندە قوناق ۇيلەردى ستاندارتتاۋدىڭ ەرەجەلەرىن جاساپ جاتىر. ازىرگە تالقىلاۋ ءجۇرىپ جاتىر. الەمدىك دەڭگەيدە 241 ستاندارت بار ەكەن. جالپى استانا اكىمدىگى ەكسپو-2017 كورمەسى قارساڭىندا قالاداعى بارلىق قوناق ۇيلەردى سەرتيفيكاتتاۋدى تاپسىردى»، - دەپ اتاپ ءوتتى دەپارتامەنت باسشىسى.
ونىڭ ايتۋىنشا، اتالمىش سەرتيفيكاتتاۋ بارلىق قوناقۇيلەر ءۇشىن مىندەتتى بولماق. وسىعان وراي، اكىمدىكتە بارلىق قۇزىرلى ورگانداردىڭ قاتىسۋىمەن ارنايى كوميسسيا دا قۇرىلادى.
«بۇل ءاربىر قوناقۇيگە وڭ اسەرىن بەرەدى. ەگەر نىسان سەرتيفيكاتتالعان بولسا، ول قاجەتتى اقپاراتتى ۇسىنۋى ءتيىس. ولاردى سەرتيفيكاتتاۋ ءۇشىن ارنايى ينسپەكتسيالاۋ قىزمەتى بولۋى شارت، ونى كىمدەر جاسايدى - بۇل دا ءالى تالقىلانۋى ءتيىس. وتەلدەردىڭ جۇيەلى تۇردە بەلگىلى ءبىر ستاندارتتار بويىنشا سەرتيفيكاتتالۋى كەرەك. سەبەبى شەتەلدىك تۋريست قازاقستانعا كەلەردە ەكى، ءۇش، ءتورت جۇلدىزدى قوناقۇيگە تاپسىرىس بەرەدى دەلىك جانە سول جەرگە كەلگەندە سوعان ساي ءقوناقۇيدى كورۋدى قالايدى. قىمبات قوناقۇيلەر، ارينە، ساپالى قىزمەت ۇسىنا الادى. ءبىراق ورتا تابىستى تۋريست ول جەرگە بارمايدى. وعان تەك بايلار عانا تاپسىرىس بەرەدى. ءبىراق قاراپايىم شەتەل ازاماتى ءتىپتى 2 جۇلدىزدى قوناقۇيگە بارۋعا دايىن، الايدا ول قوناق ءۇيدىڭ سوعان ساي نە ساي ەمەستىگىن تەكسەرۋ ءۇشىن سەرتيفيكاتىنا ءمان بەرەدى. سوندىقتان شەتەلدەن كەلەتىن تۋريستەردىڭ 80 پايىزى بيزنەس- وتەلدەرگە جايعاسادى»، - دەيدى ول.
سونىمەن قاتار م. يعاليەۆ 2017 -جىلدان باستاپ، قازاقستان 48 ەلدىڭ ازاماتتارى ءۇشىن ۆيزاسىز رەجيم ەنگىزەتىندىگىن ەسكە سالدى.
«قاراپايىم تۋريستەر اعىلادى دەگەن ءسوز، ولار قىمبات وتەلدەرگە قونىستانبايدى. ولار - ءبىز سياقتى ورتا تابىستى ازاماتتار. ولار ارزانىراق 2, 3 جۇلدىزدى قوناقۇيلەردى تاڭدايدى. الايدا قوناقۇيلەر سوعان ساي كەلۋى شارت. جەرگىلىكتى وتەلدەرگە وسى باعىتتا بەلسەنۋى كەرەك دەپ سانايمىن»، - دەپ ءتۇيدى ءسوزىن دەپارتامەنت ديرەكتورى.
«استانا كونۆەنشن بيۋرو» ج ش س حابارلاعانداي، استانانىڭ نومىرلىك قورى 30000 جاتىن ورنىن قۇرايدى. 2017 -جىلعا قاراي استانادا قوسىمشا 24 قوناق ءۇي كەشەنىن سالۋ جوسپارلانىپ وتىر - بۇل شامامەن 2500 جاتىن ورىن.
