ەلباسى: سەرگەي دياچەنكو ەلىمىزدىڭ دامۋىنا قوماقتى ۇلەس قوستى

استانا. قازاقپارات - ەلباسى نۇرسۇلتان نازاربايەۆ مەملەكەت قايراتكەرى سەرگەي دياچەنكونىڭ قايتىس بولۋىنا بايلانىستى تۋعان- تۋىسقاندارى مەن جاقىندارىنا كوڭىل ايتۋ جەدەلحاتىن جولدادى.

بۇل تۋرالى اقوردانىڭ باسپا ءسوز قىزمەتىنەن حابارلادى.

مەملەكەت باسشىسى س. دياچەنكونىڭ مەزگىلسىز قايتىس بولعانى تۋرالى حاباردى زور كۇيزەلىسپەن قابىلداپ، مارقۇمنىڭ وتباسىنا كوڭىل ايتتى.

«ول ۇزاق جىلدار مەملەكەتتىك ورگانداردا باسشىلىق قىزمەتتەر اتقارىپ، پارلامەنت ماجىلىسىندە دەپۋتاتتىق وكىلەتتىگىن ابىرويمەن ورىنداپ، ەلىمىزدىڭ قوعامدىق-ساياسي، ەكونوميكالىق جانە مادەني-گۋمانيتارلىق تۇرعىدان دامۋىنا قوماقتى ۇلەس قوستى. وتانىمىزدىڭ ناعىز پاتريوتى رەتىندە ءوزىنىڭ بار ويى مەن اتقارعان ءىسىن قازاقستان رەسپۋبليكاسىنىڭ يگىلىگى جولىنا ارنادى. ونىڭ ەرەن ەڭبەگى جوعارى مەملەكەتتىك ناگرادالارمەن اتاپ ءوتىلدى»، - دەلىنگەن جەدەلحاتتا.

سوڭىندا نۇرسۇلتان نازاربايەۆ س. دياچەنكونىڭ جارقىن بەينەسى ونى بىلەتىندەردىڭ جۇرەگىندە ءاردايىم ساقتالاتىنىنا سەنىم ءبىلدىردى.