ەلوردالىق «استانا» كومانداسى فۋتبولدان ءۇش دۇركىن قازاقستان چەمپيونى اتاندى

استانا. قازاقپارات - ەلوردالىق «استانا» فۋتبولدان ۇلتتىق بىرىنشىلىكتىڭ مارەگە جەتۋىنە ءبىر تۋر قالعاندا قازاقستان چەمپيونى اتاندى.

بۇل تۋرالى كوكشەتاۋدا جەرگىلىكتى «وقجەتپەسپەن» وتكەن 25-تۋردىڭ كەيىنگە قالدىرىلعان كەزدەسۋىنەن كەيىن بەلگىلى بولدى. ماتچ 0:0 ەسەبىمەن اياقتالعان بولاتىن.

33- مينۋتتا «استانا» پەنالتي سوعا المادى - ەلوردالىقتاردىڭ جارتىلاي قورعاۋشىسى روحەر كانياس الاڭ يەلەرىنىڭ قاقپاشىسى ساشا ستامەنكوۆيچتەن ايلاسىن اسىرا المادى. 83- مينۋتتا «استانا» گول دا سوققان بولاتىن، ءبىراق جۋنيور كابانانگا ويىننان تىس قالعاندىقتان تورەشىلەر گولدى ەسەپتەمەدى.

ال الماتىلىق «قايرات» ەكىنشى جىل قاتارىنان قازاقستان چەمپيوناتىنىڭ كۇمىس جۇلدەگەرى اتاندى. سوڭعى تۋر الدىندا «استانادان» ءتورت ۇپاي ارتتا قالعان «قايرات» سوڭعى ويىندى سەنبى، 29 -قازاندا، الماتىدا ورتالىق ستاديوندا «وقجەتپەسكە» قارسى وتكىزەدى. سۋ جاڭا چەمپيون ول كۇنى پاۆلوداردا جەرگىلىكتى «ەرتىسپەن» ويىن كورسەتەدى.