نىعماتۋلين: جالپىعا ورتاق دەكلاراتسيالاۋدى ەنگىزۋدە قارجى مينيسترلىگى جۇمىسىن ءتيىستى دەڭگەيدە اتقارمادى
«مۇندا وتىرعانداردىڭ بارلىعىنا ەستىرتكىم كەلەدى. ويتكەنى، كەيبىرەۋلەرى دەپۋتاتتار قارسى دەگەن قاتە تۇسىنىك بەرىپ جاتادى. اتاپ ايتقاندا، دەپۋتاتتار ءبىرازدان بەرى جالپىعا ورتاق دەكلاراتسيامەن قامتىلعان. سوندىقتان دەپۋتاتتاردا ەشقانداي دا قورقىنىش جوق. ماسەلەنىڭ مانىسىنە توقتالاتىن بولساق، قارجى مينيسترلىگى بۇل جۇمىستى ءتيىستى دەڭگەيدە اتقارمادى جانە جالپىعا ورتاق دەكلاراتسيالاۋ بويىنشا تاپسىرمانى ورىنداۋعا دايىندىقپەن كەلە المادى، ەندى ونى 2020 -جىلعا شەگەرىپ جاتىر. ال پارلامەنتتىڭ قابىرعاسىنان تىس شىققان كەزدە دەپۋتاتتار قارسى دەگەن تۇسىنىك بەرىپ جاتادى. وسى رەتتە باتىلدىق تانىتقاندارىڭىز ءجون. بۇل ەڭ الدىمەن قارجى مينيسترلىگىنە قاتىستى. بۇل جايىندا وسىندا مينيسترگە ايتىلعان بولاتىن»، - دەدى نۇرلان نىعماتۋلين ق ر پارلامەنتى ءماجىلىسىنىڭ جالپى وتىرىسىندا.
ەستەرىڭىزگە سالا كەتەيىك، «سالىق سالۋ جانە كەدەندىك اكىمشىلەۋ ماسەلەلەردى جونىندەگى ق ر- نىڭ كەيبىر زاڭنامالىق اكتىلەرىنە وزگەرتۋلەر مەن قوسىمشالار ەنگىزۋ تۋرالى» زاڭ جوباسىن تانىستىرعان ۇلتتىق ەكونوميكا ءمينيسترى قۋاندىق بيشىمبايەۆ تەحنيكالىق سەبەپتەرگە بايلانىستى جەكە تۇلعالاردىڭ كىرىسى مەن مۇلكى بويىنشا جالپىعا ورتاق دەكلاراتسياعا كوشۋ 2020 -جىلعا دەيىن تەجەلەتىنىن ايتقان بولاتىن.
«قولدانىستاعى زاڭنامادا جەكە تۇلعالاردىڭ كىرىستەرى مەن مۇلكىن دەكلاراتسيالاۋعا كەزەڭ- كەزەڭمەن كوشۋى قاراستىرىلعان. ءبىرىنشى كەزەڭدە 2017 -جىلدان باستاپ مەملەكەتتىك قىزمەتشىلەر، سۋديالار، باسقارۋشىلىق جانە اكىمشىلىك بەيىندەگى ۇلتتىق كومپانيا قىزمەتكەرلەرى، سونىمەن بىرگە بيۋدجەتتىك ۇيىمداردىڭ قىزمەتكەرلەرى دەكلاراتسيا تاپسىرا باستاۋى ءتيىس بولاتىن. ال، ەكىنشى كەزەڭدە قالعان بارلىق جەكە تۇلعالار تاپسىرادى. دەگەنمەن، اعىمداعى جىلى جالپىعا ورتاق دەكلاراتسيالاۋعا كوشۋگە دايىندىق جۇمىستارىن جۇرگىزۋ بارىسىندا اقپاراتتىق جۇيەدەگى ءبىرقاتار كەمشىلىكتەر انىقتالدى. ول اتالعان پروتسەستى جۇزەگە اسىرۋعا كەرى اسەرىن تيگىزۋى مۇمكىن. وسىعان وراي، 2020 -جىلدان باستاپ، ءبىر كەزەڭمەن جالپىعا ورتاق دەكالاراتسيالاۋ ەنگىزۋدى كوزدەيتىن وزگەرتۋلەر ۇسىنىلادى»، - دەدى بيشىمبايەۆ.
