قان ازدىق: سەبەپتەرى، بەلگىلەرى، ەمدەلۋ جولدارى

استانا. قازاقپارات - قازىرگى تاڭدا دۇرىس تاماقتانداۋدىڭ، ءتۇرلى كۇيزەلىستىڭ كوبەيۋى مەن يممۋنيتەتتىڭ ناشارلاۋىنان قان ازدىققا شالدىققاندار سانى كۇن ساناپ ءوسىپ كەلەدى.

ادام بويىنداعى السىزدىك، جۇقپالى اۋرۋلاردىڭ كوبەيۋى سونىڭ سالدارىنان تۋىنداپ جاتادى. مۇنىڭ ءبارى ەڭبەككە قابىلەتتىلىكتى تومەندەتىپ، ءومىر ءسۇرۋ ساپاسىنا كەرى اسەرىن تيگىزىپ جاتادى.

قانى از ادامنىڭ تابەتى بۇزىلادى: تاماققا قۇلقى بولماي، كەرىسىنشە، بور، اق بالشىق سەكىلدى نارسەلەرگە اڭسارى اۋادى. مۇنىڭ ءوزى اسقازانعا اۋىر تيەدى، اعزاداعى زات الماسۋ پروتسەسىنە كەرى اسەر ەتەدى، ءسويتىپ، ءتۇرلى دەرتتەردىڭ پايدا بولۋىنا سوقتىرادى. سوندىقتان وسى بەلگىلەر پايدا بولعان جاعدايدا، مىندەتتى تۇردە ەم الۋ كەرەك.

تەمىر تاپشىلىعىنان بولاتىن قان ازدىققا ادەتتە تەمىر پرەپاراتتارى تاعايىندالادى.

ەگەر ءسىز تەمىر پرەپاراتتارىن ءىشىپ جۇرسەڭىز، ەستە ساقتاڭىز:

تۇيىرشەك دارىلەردى تاماقتان جارتى ساعات بۇرىن اش قارىنعا ءىشىڭىز؛

ال اسقازانىڭىز اۋىراتىن بولسا، ءدارىنى تاماقپەن بىرگە ءىشىڭىز؛

تەمىر پرەپاراتتارىن سۇتپەن ىشۋگە بولمايدى؛

باسقا ءدارى- دارمەكتى تەمىر پرەپاراتتارىمەن قاتار ىشكەندە، ولار ءوزارا ارەكەتتەسىپ، دەنساۋلىققا زيانى ءتيۋى مۇمكىن. سوندىقتان باسقا دارىلەر ءىشۋ كەرەك بولعان جاعدايدا، تەمىر پرەپاراتتارىن قابىلداۋ ءتارتىبى جونىندە دارىگەرمەن كەڭەسىڭىز. مىسالى، اسقازاندا قىشقىل مولشەرىن تومەندەتەتىن ءدارىنى تەمىر پرەپاراتتارىن قابىلداعان سوڭ، ەكى ساعات وتكەندە ءىشۋ كەرەك؛

بالالارعا ادەتتە سۇيىق ءدارى تاعايىندالادى. ونى تاماقتىڭ الدىندا اپەلسين شىرىنى نەمەسە باسقا سۋسىندارمەن بەرۋ كەرەك. سۇتپەن بەرىپ جۇرمەڭىز! سۇيىق دارىلەر بالالاردىڭ ءتىسىن بۇزباۋ ءۇشىن، تۇتىكشە پايدالانىڭىز؛

ەم ءتيىمدى بولۋى ءۇشىن، ءدارىنى ءۇش اي قاتارىنان قابىلداعان دۇرىس.

تەمىر پرەپاراتتارىن قابىلداپ جۇرگەن كەزدە تاماقتانۋعا ەرەكشە كوڭىل بولگەن ءجون. تەمىردىڭ سىڭىمدىلىگىن ارتتىرۋ ءۇشىن، قۇرامىندا س ۆيتامينى بار تاعامداردى مولىراق پايدالانىڭىز. ولار: سيترۋس جەمىستەرى، قىزاناق، ءتۇرلى-ءتۇستى قىرىققابات، ت. ب. ءيتمۇرىن سۋسىنى قۇرامىندا س ۆيتامينى مول بولادى. ءبىراق ءيتمۇرىن ءتىس ەمالىن بۇزاتىن بولعاندىقتان، ونى تۇتىكشە ارقىلى ءىشۋ كەرەك.

تەمىردىڭ اعزاعا سىڭۋىنە كەدەرگى بولاتىن دا زاتتار بار. مىسالى، كوفەين. كوفەين، شاي، كوفە، كوكا كولا سەكىلدى سۋسىندار قۇرامىندا بولادى. سوندىقتان تەمىر پرەپاراتىن قابىلداپ جۇرگەن كەزدە، شايدى تاماقتان كەيىن ءبىر ساعاتتان سوڭ ءىشىپ ادەتتەنىڭىز.

تەمىر دارىلەرىن ءىشىپ جۇرگەن ەرەسەك ادامدار ءسۇت ونىمدەرىن قابىلداۋدى شەكتەپ، كۇنىنە 500 گراممنان اسىرماعاندارى دۇرىس.

ال قان ازدىقتىڭ الدىن الۋ جولى دا - دۇرىس تاماقتانا ءبىلۋ. ەت (سيىر، قۇس) جانە بالىقتا، بۇرشاق تۇقىمداستاردا، سۇلى، قاراقۇمىق جارمالارىنىڭ قۇرامىندا تەمىر بار. جاس سابيلەر ءۇشىن ەڭ دۇرىسى - انا ءسۇتى. ال جاساندى جولمەن تاماقتاندىرىلاتىن بالالارعا تەمىرمەن بايىتىلعان قوسپالار مەن جارمالار بەرىڭىز.