بالا نەگە اناسىنىڭ قاسىندا جىلاي بەرەدى

استانا. قازاقپارات - كىشكەنتاي بالا ءۇشىن، اتا- اناسى جاقىن ادامدار عانا ەمەس، ولار -  بۇكىل الەم.

الايدا كوپتەگەن وتباسىندا بالا باسقاسىنىڭ قاسىندا ءوزىن جاقسى ۇستاعانىمەن، اناسىمەن قالسا، كوپ جىلاپ، ەركەلەپ، ادامنىڭ ەسىن شىعارادى. بالانىڭ مۇنداي مىنەز- قۇلقى، ارينە، ەرەسەك ادامدارعا ۇناي بەرمەيدى. ونىڭ بۇلاي ەركەلۋىنە اناسى كىنالى مە؟

№1 سەبەپ. اتا- اناعا دەگەن سەنىم

بۇل جەردە بالانىڭ ەركەلىگىنە اتا- اناسى كىنالى ەمەس. سەبەبى، وعان قاتال بولساڭ دا، ونى تىم ەركەلەتسەڭ دە، ول اناسىنىڭ قاسىندا ءوزىن وسىلاي ۇستايدى. سەبەبى ءار بالا ءوزىن جانە ءوزى قاتتى جاقسى كورەتىن ادامداردىڭ قاسىندا ەركىنسىپ كەتەدى. ياعني، ءوزىنىڭ سەنەتىن ادامدارىنا عانا ءوزىنىڭ ەركەلىگىن كورسەتە الادى. سوندىقتان ول ءۇشىن اناسىنىڭ قاسىندا جىلاي بەرۋى - قالىپتى جاعداي. ول اناسىنا سەنەدى، سول ءۇشىن ءوزىنىڭ ءىس- ارەكەتتەرىن باسقا ادامداردىڭ قاسىنداعىداي باقىلامايدى.

 №2 سەبەپ. ەرەسەكتەرگە ەلىكتەۋ

6 جاسقا دەيىنگى كىشكەنتاي بالا ەرەسەك ادامداردىڭ ايتقانى مەن ىستەگەنىن قايتالاعاندى جاقسى كورەدى. سول سەبەپتى ول اكەسى سياقتى كومپيۋتەردە جۇمىس ىستەگىسى كەلەدى، اناسى سياقتى اس بولمەدە تاماق پىسىرۋگە ارالاسقىسى كەلەدى. بۇل بالا دامۋىنداعى قالىپتى مەحنيزمدەر. سول سياقتى ول ۇيدە اناسى جوق كەزدە، اجەسىمەن وتىرعاندا اجەسىنە ەلىكتەپ، سونىڭ ءىس- قيمىلىن باعىپ جۇرسە، اناسى كەلگەندە كوز الدىنداعى ادام باسقا بولعاندىقتان، ول سانادان تىس ول ادامعا اۋىسا قويعان جوق. سونىڭ اسەرىنەن دە بالا اناسى كەلگەن كەزدە ءبىراز ەلىرۋى مۇمكىن. سول ءۇشىن بالاعا رەنجۋدىڭ ورنىنا، ونىڭ قىلىقتارىنا ءمان بەرمەۋدى ۇيرەنۋلەرى قاجەت. سەبەبى، اناسى كۇنى بويى ۇيدە بولماعان كەزدە، بۇل قالىپتى جاعداي بولىپ تابىلادى.

№3 سەبەپ. اناسى ءوزىن دۇرىس ۇستاي المايدى

 بالانىڭ كوڭىل- كۇيى وزگەرىپ، قىلىقتارى ءتوزىمسىز بولا باستاعاندا، ەڭ ءبىرىنشى اناسى ءوزىن كىنالى ساناي باستايدى. مۇنداي جاعدايدا اجەسى نەمەسە جاقىن تۋىستارى دا وتقا ماي قۇياتىنى جاسىرىن ەمەس. «جاڭا عانا جاپ- جاقسى وتىرعان، سەن كەلىپ ەدىڭ، ەسىرە باستادى» دەگەن ءسوزدى ءجيى ەستيمىز.

ءسىز ۇيگە كەلگەن كەزدە، بالاڭىز ءسوز ۇقپايتىن بالاعا اينالسا، وندا ءسال ارى بارىپ، بالانىڭ ءوز- وزىنە كەلۋىن كۇتىڭىز. ادەتتە بالا وزدىگىنەن تىنىشتالادى. ەگەر بالاڭىز تىنىشتالماي جاتسا، وندا قاسىنا بارىپ: «نە بولدى؟ سەن مەنى قاتتى ساعىنعانىڭدى بايقادىم» دەپ اقىرىن عانا ايتۋىڭىز كەرەك. ءسىزدىڭ سابىرمەن سويلەگەن داۋىسىڭىز وعان دا ءوز اسەرىن تيگىزبەي قويماس.

№4 سەبەپ. وتباسىنداعى قارىم- قاتىناس

بالانىڭ ءىس- ارەكەتىنە قاتتى ءمان بەرگەننەن گورى، كەي كەزدە وتباسىنداعى كەيبىر ەرەجەلەردى ناقتىلاپ العان ءجون. مىسالى، بالانى اناسىنىڭ قولىنا بەرگەن كەزدە، قاسىندا ۇزاق تۇرماي، بىردەن كەتىپ قالعان ءجون.

بالانىڭ ۇيدەگى ءاربىر اداممەن بەلگىلى ءبىر قارىم- قاتىناسى بولاتىنى ءسوزسىز. بۇل جەردە اتاسى، اجەسى، كۇتۋشىسى، اعاسى، اپكەسى تۋرالى ءسوز بولىپ وتىر. ءتىپتى، ەگەر بولەك تۇرسا، اكەسىن دە قوسىپ قويعان دۇرىس. ولارمەن بالا اناسى سياقتى ەمەس، مۇلدەم باسقا قارىم- قاتىناستا بولادى. ارقايسىسىمەن بالا ءوزىن ءارتۇرلى ۇستايدى. سەبەبى، ءار ادامنىڭ بالا قايتالايتىن ءوز رەاكسياسى، ءوز ەموتسياسى بار.

باسقا ادامدارمەن ارالاسۋ بالاعا زيانىن تيگىزە قويماس. سول سەبەپتى، اناسى قىزعانىپ، اشۋلانىپ، ءوزىنىڭ تالاپتارىن قويماعانى دۇرىس. اناسىنىڭ مۇنداي ارەكەتى ۇلكەندەردى دە، بالانى دا شارشاتىپ جىبەرەدى.

ەگەر اناسى اجەسىنىڭ تاربيەسىن ۇناتپاسا، وندا بالانىڭ كوزىنشە بۇل تۋرالى ايتۋدىڭ قاجەتى جوق. ەكى ءتۇرلى كوزقاراس پەن ولاردىڭ ءوزارا كەلىسىمگە كەلە الماۋى بالاعا تەرىس اسەر ەتۋى مۇمكىن.