قىز بالا تاربيەسىندەگى قاتەلىكتەر

استانا. قازاقپارات - قىز ءوسىرىپ وتىرعان كوپ انالار مەن اجەلەردىڭ جىبەرەتىن ەڭ باستى قاتەلىگى - قىز بالانىڭ بويىندا بولۋى كەرەك قانداي ءبىر مىندەتتى قاسيەتتەرگە ولاردىڭ ساناسىن بايلاپ قويۋى.

«سەن يبالى بولۋىڭ كەرەك»، «سەن كونە ءبىلۋىڭ كەرەك»، «سەن ۇناۋىڭ ءتيىس»، «سەن تاماق دايىنداي ءبىلۋىڭ كەرەك»، «سەن ىستەۋىڭ كەرەك». تاماق دايىنداي ءبىلۋدىڭ زيانىنان گورى پايداسى كوپ، ءبىراق قىزداردىڭ بويىندا «ەگەر مەن سول كريتەريگە سايكەس كەلمەسەم، مەن ەشكىمگە قاجەتسىز بولامىن» ءوزىن- ءوزى كەمسىتەتىن وي پايدا بولۋى مۇمكىن. بۇل جەردە ونى اس ۇيدەگى جۇمىسقا ء«جۇر، بىرگە تاماق ىستەيىك» دەپ باۋلىعان ءجون.

ءجۇر، بىرگە ءۇي جينايىق. ءجۇر، ساعان جاراساتىن شاش ۇلگىسىن بىرگە تاڭدايىق. اناسىنىڭ ءبىر نارسەنى جاساپ، ودان بالاشا قۋانعانىن كورگەن قىز دا ونى ۇيرەنگىسى كەلەدى. سونداي- اق كەرىسىنشە، ەگەر اناسىنا بىردەڭەنى ىستەۋ قاتتى ۇناماسا، ول ءىستى قىزى دا جاقتىرمايتىن بولادى. شىندىعىنا كەلسەك، كەز كەلگەن قىز وزىنە قاجەت بولسا، ۋاقىتى كەلگەندە بارىنە ۇيرەنەدى. ءبىراق ءبىزدىڭ قازاقتا قىزدى ۇياسىنان ۇشقانشا تاربيەلەپ جىبەرۋ دۇرىس سانالادى. سوندىقتان ونەگە كورسەتىپ، تاربيە بەرگىڭىز كەلسە، ەڭ الدىمەن ءوزىمىزدىڭ ايتقان ءسوزىمىز بەن ىستەگەن ءىسىمىزدى جوندەۋىمىز كەرەك.

قىز بالا تاربيەسىندە كەزدەسەتىن ەكىنشى قاتەلىك - ەر ادامدار مەن سەكسكە قاتىستى تەرىس پىكىر قالىپتاستىرۋى. «ولارعا ءبىر- اق نارسە كەرەك»، «بايقا، پايدالانىپ، تاستاپ كەتپەسىن»، «سەن ولارعا سەنبە». ناتيجەسىندە قىز بالا ەر ادامداردىڭ بارلىعى كۇش قولدانعىش، زۇلىم دەپ ويلاپ وسەتىد. ال سەكس ولار ءۇشىن بويدى اۋلاق ۇستايتىن، لاس ءارى جامان نارسە بولىپ قالماق. سونداي- اق ول وسە كەلە بويىندا پايدا بولعان گورمونداردىڭ اسەرىنەن اناسىنىڭ سوزدەرى مەن ءوزىنىڭ فيزيولوگياسى اراسىنداعى قايشىلىقتان قينالىپ، ءوزىن كىنالى سەزىنۋى مۇمكىن.

 ءۇشىنشى قاتەلىك -  20 جاسقا قاراي قىزدىڭ ساناسىنا ايەل ادامنىڭ باقىتتى بولۋىنىڭ باستى فورمۋلاسى -  تۇرمىس قۇرىپ، بالا ءسۇيۋ دەگەندى ميىنا قۇيۋ. «25-كە دەيىن كۇيەۋگە شىقپاساڭ، كارى قىز اتاناسىڭ» دەكگەن كەرەعار پىكىر دە، قىز بالانىڭ ساناسىنا كەرى اسەر ەتىپ، ونىڭ تولىققاندى جەتىلۋىنە، پسيحيكاسىنىڭ دۇرىس ارناعا تۇسۋىنە كەدەرگىسىن كەلتىرەدى. ويلاپ قاراڭىزشى، باسىندا وعان ەر ادامداردىڭ بارلىعى -  وڭباعان، ولارعا كەرەگى ءبىر- اق نارسە دەپ ۇيرەتسە، ال سەكستى لاس دۇنيە رەتىندە كورسەتسە، ەندى بارىپ، تۇرمىسقا شىعىپ، بالا تۋ دەيدى. تولعان پارادوكس. ءبىراق كوپ انالار قىزدارىنا ءدال وسىنى ايتىپ وسىرەدى. ناتيجەسىندە قىز بالالار ەر ادامدارمەن قارىم- قاتىناس جاساۋدان قورقادى. بۇل ادامنىڭ ءوزىن ءوزى جوعالتۋىنا، ءوزىنىڭ قالاۋىن بىلمەي، تىلەكتەرىنەن قورقۋىنا اكەپ سوقتىرادى.

 ءتورتىنشى قاتەلىك - گيپەرقورعاۋ. قازىر بۇل ۇلكەن قاتەرگە اينالىپ وتىر، سەبەبى قىزدارىن وزدەرىنە «بايلاپ» ۇستايتىن انالار سانى كۇن ساناپ ارتىپ كەلەدى. قىدىرۋعا بولمايدى، انا بالامەن دوس بولۋعا بولمايدى، جارتى ساعات سايىن ماعان تەلەفون شال، قايدا ءجۇرسىڭ، نەگە 3 مينۋت كەشىگىپ حابارلاستىڭ... قىز بالاعا وزدىگىنەن شەشىم شىعارۋىنا ەش مۇمكىندىك بەرمەيدى، سەبەبى ونىڭ دۇرىس شەشىم قابىلداي المايتىنىنا اناسى الدىن الا سەنىمدى. 14-16 جاستا بويى جەتىپ كەلە جاتقان قىزدا سەپاراتسيا ۇدەرىسى جۇرەدى، ياعني، ول ءبارىن ءوزى شەشكىسى كەلەدى. ارا- تۇرا وعان مۇنداي مۇمكىندىكتى بەرىپ تۇرۋ قاجەت. ەگەر قىز بالا ۇنەمى اناسىنىڭ قورعاۋىندا بولسا، ول جەكە ءومىر سۇرە المايتىن، بارلىق شەشىمدى بىرەۋگە عانا قابىلداتىپ، وزىنە جاۋاپكەرشىلىك الا المايتىن، ءوزىن «ەكىنشى سۇرىپتاعى» ادام قاتارىنا قوسۋى دا عاجاپ ەمەس.

بەسىنشى قاتەلىك - اكەسىنىڭ تەرىس بەينەسىن قالىپتاستىرۋ. اكەنىڭ وتباسىنداعى ءرولى قانداي بولدى، ول جاعى ماڭىزدى ەمەس. ءبىراق اكەنى زۇلىمعا تەڭەپ، بالانىڭ كوز الدىندا جامانداۋعا بولمايدى. سونىمەن قاتار بالانىڭ بويىنداعى تەرىس جاقتارىنىڭ بارلىعى اكەسىنەن بەرىلگەن دەگەندى تىپتەن ايتۋعا بولمايدى.

التىنشى قاتەلىك - ۇرۋ. قانداي بالا بولماسىن، ۇرۋعا بولمايدى، ءبىراق قىز بالاعا تىپتەن قول كوتەرۋگە جول جوق. ولاردىڭ پسيحولوگيالىق تۇرعىدان جىلدام ءوزىن- ءوزى جوعاتىپ الاتىنىن ەسكەرسەك، كەز كەلگەن قول كوتەرۋ ونىڭ جان دۇنيەسىنە تەرەڭ جارالايتىنىن بىلگەن ءجون. ال اكەسىنىڭ تاراپىنان سوققىعا جىعىلعان قىز بالا ومىرلىك سەرىگىن تاڭداعان كەزدە قينالاتىنىن دە ەسكەرگەن دۇرىس.

جەتىنشى قاتەلىك - جەتكىلىكتى ماقتاماۋ. قىز بالا ءوزىنىڭ ەڭ ادەمى، ەڭ سۇيىكتى، ەڭ قابىلەتتى ەكەنىن ءبىلىپ ءوسۋى كەرەك. بۇل ونىڭ ءوزىن ءوزى دۇرىس باعالاي بىلۋىنە اسەر ەتەدى.

سەگىزىنشى قاتەلىك - قىز بالانىڭ كوزىندە ۇرسىسۋ. اتا- اناسى ەشقاشان بالالارىنىڭ كوزىنشە ۇرسىسپاۋى ءتيىس. اسىرەسە، اكەسى مەن اناسىنىڭ جەكە باسىنا قاتىستى، جەكە قاسيەتتەرىنە بايلانىستى ماسەلەلەر بويىنشا وكپە- رەنىشتى بالالاردىڭ الدىندا تالقىلاۋعا بولمايدى. بالا مۇنى كورمەۋى ءتيىس. كورىپ قالعان جاعدايدا، ولاردان كەشىرىم سۇراپ، ۇستامسىزدىق تانىتقاندارىن، بالانىڭ وعان قاتىسى جوق ەكەنىن ايتىپ، دوستاسقاندارىن دا ايتىپ وتۋلەرى كەرەك.

توعىزىنشى قاتەلىك - ومىرگە دۇرىس باعىت- باعدار بەرۋ. وعان دا سەنىڭ باستى ماقساتىڭ تۇرمىسقا شىعۋ، بالا تۋۋ، ارىقتاۋ، وقۋ ءبىتىرۋ دەپ باستى مىندەتتەرىن ايتا بەرۋدىڭ قاجەتى جوق. ونى ءوزىن ءوزى جەتىلدىرۋگە، ىشكى جان دۇنيەسىن تۇسىنۋگە، جۇرەگىن تىڭداي بىلۋگە، وزىنە ۇنايتىن ىستەرىمەن شۇعىلدانۋعا، وزگەنىڭ پىكىرىنە باسىبايلى بولماۋىنا ۇيرەتكەن ءجون. سول كەزدە عانا وزىنە سەنىمدى، ادەمى ءارى باقىتتى قىز وسىرۋگە بولادى.