اقتوبەدە ورىس قىزى يسلام ءدىنىن قابىلدادى
«نۇر عاسىر» مەشىتىنىڭ ۇستازى ديلياروم بەكتايەۆانىڭ ايتۋىنشا، اتىراۋ، اقتاۋ، اقتوبەدە ارابتاردىڭ كيىمىن كيىپ، اداسقاندار سانى كوپ ەكەن، دەپ حابارلايدى Bnews.kz ءتىلشىسى.
اقتوبەدە ساۋات اشۋ كۋرسىنا ەرەكشە نازار اۋدارىلىپ جاتىر. مۇندا كەز كەلگەن ادام كەلىپ، ءدىني ءبىلىمىن جەتىلدىرە الادى. بۇعان دەيىن پاۆلودار، اقمولا، الماتى وبلىستارى مەن استانا قالاسىنداعى مەشىتتەردە جۇمىس ىستەپ، تاجىريبە جيناعان ۇستاز ديلياروم بەكتايەۆانىڭ ايتۋىنشا، قازاقستاننىڭ باتىسىنداعى وبلىستاردا جات اعىم جەتەگىنە ەرگەندەر كوپ. ءتىپتى، ولار كوزگە بىردەن شالىنادى ەكەن.
«قىركۇيەك ايىندا ساۋات اشۋ كۋرسى اشىلىپ، 126 شاكىرت قابىلداندى. شاكىرتتەر قازاقستان مۇسىلماندارى ءدىني باسقارماسىنىڭ باعدارلاماسىنا ساي ءبىلىم الادى. ياعني، 5 ءتۇرلى ءدارىس بەرىلەدى. ساباق اپتاسىنا 7 كۇن وتەدى. ولاردىڭ اراسىندا مەكتەپ وقۋشىلارى، ستۋدەنتتەر جانە زەينەتكەرلەر بار. 10 جاستان اسقان وقۋشىلار تەك اتا- انالارىنىڭ رۇقساتىمەن كەلىپ ءجۇر»، - دەيدى ۇستاز ديلياروم بەكتايەۆا.
مەشىتتەگى ۇستازداردان تەرىس اعىم جەتەگىندە جۇرگەن قىز-كەلىنشەكتەر كەلىپ، كەڭەس الادى ەكەن. ولاردىڭ اراسىندا نيكاب كيىپ، اراب ەلىنىڭ ءداستۇرىن ۇستاناتىن اقتوبەلىكتەر دە بار.
«ءبىر اپتا بۇرىن ورىس قىزى يسلام ءدىنىن قابىلدادى. نيكاب كيىپ جۇرگەن قىز-كەلىنشەكتەر دە كەلىپ ءجۇر. بۇرىن تەك قۇران كارىم ۇيرەنۋگە كەلسە، ەندى عيبادات، اقيدا ساباعىنا قاتىسۋعا شەشىم قابىلدادى. ءبارى دە وزدەرىنە ۇنايدى. جەكسەنبىلىك ۋاعىزعا قاتىسىپ، كوبى حانافي ءمازحابىنا بەت بۇرىپ جاتىر. «قارا جامىلعان» قىز-كەلىنشەكتەر اراب شەيحتارىنىڭ ۇستانىمدارىن ۇستايدى. ءبىز اجەلەرىمىزدىڭ كيمەشەك كيگەنىن ءتۇسىندىرىپ، حانافي ءمازحابىنىڭ حاديستەرىن، سالت- ءداستۇرىمىزدى ۇلگى ەتەمىز»، - دەيدى ۇستاز.
ايتا كەتەيىك، قازىر «نۇر عاسىر» مەشىتىندەگى كۋرستا 5 قىز ءدىني ءبىلىم الىپ ءجۇر. ولاردىڭ ءبارى ورتا مەكتەپتەگى نەگىزگى ساباعىنان سوڭ ءدارىس الادى.
