اتى اڭىزعا اينالعان ۆولەيبولشى جانىبەكحان ساۋرامبايەۆ دۇنيەدەن وزدى
ق ر ۆولەيبول فەدەراتسياسىنىڭ حابارلاۋىنشا، ساۋرامبايەۆ 24 - قازان كۇنى قايتىس بولعان. جانازاسى 27 - قازان كۇنى 10:00-12:00 ارالىعىندا بالۋان شولاق اتىنداعى سپورت سارايىندا وتەدى. جانىبەكحان ساۋرامبايەۆ الماتىلىق تانىمال «بۋريەۆەستنيك» كلۋبىنىڭ كاپيتانى بولعان، ول كلۋب قۇرامىندا جۇرگەندە كەڭەس وداعىنىڭ چەمپيونى (1969) جانە ەۋروپا چەمپيوندارى كۋبوگىنىڭ ەكى دۇركىن يەگەرى (1970، 1971) بولعان.
سونىمەن بىرگە، جانىبەكحان ساۋرامبايەۆ ەۋروپا چەمپيوناتىندا جەڭىسكە جەتكەن، الەم كۋبوگىنىڭ يەگەرى بولعان جانە الەم چەمپيوناتىنىڭ قولا جۇلدەگەرى اتانعان ك س ر و قۇراماسى ساپىندا ويىن ويناعان. 1972 - جىلى ويىندىق مانسابىن اياقتاعان جانىبەكحان نەگمات ۇلى تابىستى ۆولەيبول باپكەرى بولدى، كۋۆەيت پەن قازاقستاندا جۇمىس ىستەدى. العاش رەت قازاقستان پاراليمپيادا قۇراماسىن الەمدىك سپورت ارەناسىنا الىپ شىقتى.
پروفەسسور جانىبەكحان ساۋرامبايەۆ 40 جىلدان استام ءومىرىن پەداگوگيكالىق قىزمەتكە ارنادى، ارحيتەكتۋرا- قۇرىلىس ينستيتۋتى مەن قازاق پوليتەحنيكالىق ينستيتۋتىندا دەنە تاربيەسى كافەدراسىنىڭ مەڭگەرۋشىسى بولدى. سىڭىرگەن ەڭبەگى مەن جەتىستىكتەرى ءۇشىن، قازاقستان جانە ك س ر و ۆولەيبولىنا قوسقان ەرەكشە ۇلەسى ءۇشىن جانىبەكحان ساۋرامبايەۆ بىرنەشە رەت مەملەكەتتىك ناگرادالارمەن ماراپاتتالدى.
