استانادا «تۇركيا كۇندەرى» وتەدى
بيىل قازاقستان رەسپۋبليكاسىنىڭ تاۋەلسىزدىگىنە جانە قازاقستان - تۇركيا اراسىنداعى ەكىجاقتى قاتىناستاردىڭ ورناعانىنا 25 جىل تولادى.
قازاقستاندى دەربەس ەل رەتىندە تانىعان العاشقى مەملەكەت - باۋىرلاس تۇركيا بولدى.
قازاقستان رەسپۋبليكاسىنىڭ تۇركيا رەسپۋبليكاسىنداعى ەلشىلىگى، يۋنۋس ەمرە اتىنداعى تۇرىك مادەنيەت ورتالىعى جانە تۇرىك ىنتىماقتاستىق جانە ۇيلەستىرۋ اگەنتتىگىنىڭ (TIKA) استانا ۇيلەستىرۋشىسى بىرلەسە وتىرىپ، قازاق ەلىنىڭ تاۋەلسىزدىك مەرەكەسىنە وراي، ۇلكەن تارتۋ جاساماقشى.
يۋنۋس ەمرە اتىنداعى تۇرىك مادەنيەت ورتالىعى وكىلدەرىنىڭ مالىمدەۋىنشە، استانا حالقى مەن قوناقتارى «تۇركيا كۇندەرى» اياسىندا 26 - قازان كۇنى ساعات 19.00-دا «قازمەديا ورتالىعى» كينوكونسەرت زالىندا «قازاقستان- تۇركيا دوستىق اۋەندەرى» اتتى كونسەرتتى تاماشالاي الادى.
كونسەرتكە تۇركيا رەسپۋبليكاسىنىڭ مادەنيەت جانە تۋريزم مينيسترلىگىنە قاراستى «انكارا تۇركى الەمى مۋزىكالىق ءانسامبلى» ارنايى مەرەكەلىك رەپەتۋار دايىنداپ، اسەم قالا استانا جۇرتىن تۇرىك اۋەنىنە بولەيدى.
2 ساعاتقا سوزىلاتىن مەرەكەلىك كونسەرتتە تۇرىك اندەرى جانە بيلەرىمەن قوسا انادولىدان كەلەتىن ونەرپازدار قازاقشا شىعارمالار دا ورىندايدى.
شاراعا قازاقستاننان تانىمال انشىلەر كامشات جولدىبايەۆا، ديماش قۇدايبەرگەنوۆ، گۇلنۇر ورازىمبەتوۆا جانە «حانزادا» توبى قاتىسادى. قازاقستاندىق ونەرپازدار تۇرىكشە، تۇركيالىق ونەرپازدار قازاقشا شىعارمالار ورىندايدى.
اتاپ ءوتۋ كەرەك، كونسەرتتىك شارا اقىسىز نەگىزدە بولادى. تاعى ءبىر ايتا كەتەتىن ءجايت - كونسەرتكە كەلگەن كورەرمەندەر اراسىندا قولما- قول لوتورەيا ويناتىلىپ، تۇرىك اۋە جولدارى ىستامبۇل قالاسىنا بارىپ قايتۋ بيلەتىن بەرەدى. سونداي - اق سوڭعى ۇلگىدەگى سمارتفون دا لوتورەياعا تىگىلەدى. جەڭىمپازداردى انىقتاۋ ماقساتىندا كونسەرتتەن بۇرىن لوتورەيا بيلەتى تاراتىلادى. ۇتىستى جەڭىپ العان ەسىمدەر كونسەرت كەزىندە انىقتالادى.
«تۇركيا كۇندەرى» اياسىندا بۇدان تىس 27 - قازاندا «وسمانلى داۋىرىندەگى ساراي كيىمدەرى دەفيلەسى» وتپەكشى. دەفيلەدە تۇركيانىڭ ادانا قالاسىندا ورنالاسقان قىزدار تەحنيكالىق قولونەر ۋچيليشەسىنىڭ وكىلدەرى دايىنداعان وسمانلى داۋىرىندە سارايدا كيىلگەن كيىم ۇلگىلەرى كورسەتىلەدى. اتالعان وقۋ ورنى ستيليستەرى 40 كيىم ۇلگىسىنەن تۇراتىن توپتاما دايىنداعان. بۇل توپتاما ىستامبۇلداعى توپكاپى جانە دولماباحچە سارايىندا ساقتالعان عاسىرلىق كيىمدەر نەگىزگە الىنا وتىرىپ تىگىلگەن.
استانا حالقى مەن قوناقتارىن 26 - قازاندا بولاتىن «قازاقستان - تۇركيا دوستىق اۋەندەرى» كونسەرتىن تاماشالاۋعا شاقىرامىز.
