قازاقستاندىق كومپانيا يراندا التىن ءوندىرىسىن قولعا الدى

استانا. قازاقپارات - قازاقستاندىق كومپانيا يران كەن ورنىنان العاشقى التىنىن قازاقستانعا جەتكىزدى.

  بۇل تۋرالى بۇگىن ۇكىمەت وتىرىسىندا ق ر ينۆەستيتسيالار جانە دامۋ مينيسترلىگىنىڭ ءبىرىنشى ۆيتسە- ءمينيسترى البەرت راۋ ءمالىم ەتتى.

 «ءتۇستى مەتاللۋرگيانىڭ وسىمىنە وڭدەلمەگەن التىن ءوندىرىسىنىڭ 19 پايىزعا ءوسۋى اسەر ەتتى. اففيناجدالعان التىن كولەمى دە 19 پايىزعا ءوستى. «قازاق مىس» اففيناج التىنىن ۇلعايتتى. ەلدە وندىرىلگەن التىننىڭ تۇگەلى ءوز ەلىمىزدە، وتاندىق اففيناج زاۋىتتارىندا وڭدەلەتىنىن ايتا كەتكىم كەلەدى. تاعى دا اتاپ وتەتىن جايت - ءبىز بيىل يراننان التىندى العاش رەت جەتكىزە باستادىق. ونىڭ كولەمى ازىرشە 125 كەلى. يراندا ءبىزدىڭ وتاندىق كومپانيا التىن ءوندىرىپ جاتىر. جىل سوڭىنا دەيىن تاعى 500 كەلى جەتكىزەمىز دەپ بولجاپ وتىرمىز. ەگەر ءبىز بيىل جالپى 11 توننا شىعارساق، يراننان جەتكىزىلگەن 700 كەلى ەداۋىر ۇلەس قوساتىنىن بايقايمىز. كەلەسى جىلى ولار يراننىڭ 2 تونناعا دەيىن التىنىن قازاقستاندا وڭدەۋدى جوسپارلاۋدا»، - دەدى ا. راۋ.

 اعىمداعى جىلدىڭ 9 ايىندا ءوندىرىس كولەمىنىڭ دامۋىنا توقتالعان ءبىرىنشى ۆيتسە- مينيستر، ۇدەمەلى يندۋستريالدىق- يننوۆاتسيالىق دامۋ باعدارلاماسى اياسىندا كورسەتىلگەن مەملەكەتتىك قولداۋدىڭ ارقاسىندا وڭدەۋشى سالادا ءوندىرىس كولەمى ارتىپ وتىرعاندىعىن اتاپ ءوتتى.

 «مەتاللۋرگيادا ءوندىرىس كولەمى 7,8 پايىزعا وسكەن. ونىڭ ىشىندە قارا مەتاللۋرگيا - 3 پايىز، ءتۇستى مەتالل ءوندىرىسى - 10 پايىز. قارا مەتاللۋرگيانىڭ وسىمىنە بولات ءوندىرىسىنىڭ 10 پايىزعا ءوسۋى اسەر ەتتى»، - دەدى ول.

اليۋميني ءوندىرىسى 14 پايىزعا ءوسىپ وتىر. حيميالىق ونەركاسىپ 0,1 پايىزعا ءوسىم كورسەتىپ وتىر. فوسفاتتار مەن سارى فوسفور بويىنشا ءوندىرىس تومەندەگەن. ءبىراق اممياك سيليتراسىنىڭ 17 پايىزعا ءوسۋى بايقالدى. فارماتسيەۆتيكا سالاسىنىڭ ءوندىرىسى 2 پايىزعا جوعارىلادى. جەڭىل ونەركاسىپ ءوسىم 1 پايىزعا ارتتى.

اۆتور: جاسۇلان جولدىبايەۆ