استاناداعى ۇلتتىق مۋزەيدە بۇگىن «تۋعان ەل» اتتى كورمە اشىلادى
كورمە جۇمىستارى قالا قوناقتارى مەن تۇرعىندارىن بالالار شىعارماشىلىعى ارقىلى حالىقتىڭ تاريحىمەن، سالت- داستۇرلەرىمەن، مادەنيەتىمەن جانە تىرشىلىگىمەن، ەلىمىزدىڭ وتكەنىمەن، بۇگىنگىسىمەن جانە كەلەشەگىمەن، جەتىستىكتەرىمەن جانە جوسپارلارىمەن، جۇزەگە اسقان ارماندارىمەن تانىستىرۋعا مۇمكىندىك بەرەدى.
مەكتەپ تۇلەكتەرىنىڭ جارقىن، ايقىن، ەرەكشە جانە نازىك، ارمانشىل، تاريحي جانە شىنايى تۋىندىلارى وسكەلەڭ ۇرپاق ەلىمىزدىڭ وتكەنىن، بۇگىنگىسىن جانە كەلەشەگىن قالاي ەلەستەتەتىنىن كورسەتەدى.
كورمەگە قاتىسۋشىلاردىڭ جاسى 15 پەن 17 ارالىعىندا. كورمەگە كوركەم سۋرەت، گرافيكا، باتيك، كيىم ديزاينى، كيىز، زەرگەرلىك ونەر، توقۋ، اعاشقا ورنەك سالۋ جانە ت. ب. ءارتۇرلى باعىتتا ورىندالعان 50 دەن استام جۇمىس قويىلادى.
تۇلەكتەردىڭ تۋىندىلارى يۋنەسكو باسشىلىعىمەن وتكەن «بالالار الەمدى سالادى»، «شابىت»، «نيەۆا پاليتراسى» سىندى بەدەلدى بايقاۋلاردا ديپلومدارمەن جانە ماقتاۋ قاعازدارىمەن ماراپاتتالعان.
كورمەنىڭ اشىلۋى 25-قازان ساعات 16.00-گە جوسپارلانعان.
