سايتاندار تۋرالى ولەڭ جازعان قاراعاندىلىق پروكۋرور قىزمەتتىك ەتيكانى بۇزباعان
«قىزمەتتىك تەكسەرىس ناتيجەسى بەرىك احمەتجانوۆتىڭ مىنەز- قۇلقى مەملەكەتتىك قىزمەتشىنىڭ ادەپ نورمالارىنا ساي كەلەتىنىن كورسەتتى. ول ينتەرنەتكە ءوز روليگىن ورنالاستىرا وتىرىپ، زاڭعا قايشى ارەكەت جاساعان جوق. فيلولوگيالىق ساراپتاما قورىتىندىسى بويىنشا، اۆتوردىڭ ولەڭىندە ءتىل تيگىزۋ، بۇلىك شىعارۋعا قاتىستى ەشتەڭە جوق»، - دەدى «قازاقپاراتقا» ىشكى قاۋىپسىزدىكتى قامتاماسىز ەتۋ باسقارماسى باس پروكۋرورىنىڭ اعا كومەكشىسى بولاتقان نۇرىشكەنوۆ.
ول پروكۋروردىڭ شىعارماشىلىعى ونىڭ جەكە ءومىرى ەكەنىن اتاپ ءوتتى.
«ول پروكۋرور كيىمىندە ەمەس، ازاماتتىق كيىمدە تۇسكەن (رەد. - ۆيدەوعا). سوندىقتان ونىڭ لاۋازىمى جايلى دوستارى، ارىپتەستەرى جانە تۋىستارى عانا بىلەدى»، - دەپ قوستى نۇرىشكەنوۆ.
قىزمەتتىك تەكسەرۋ ناتيجەسىندە ايىپ تاعاتىن بەلگىلەر تابىلعان جوق، احمەتجانوۆ ەڭبەك ەتۋىن جالعاستىرۋدا.
ەسكە سالايىق، الەۋمەتتىك جەلىلەردە قاراعاندى وبلىسى وساكاروۆ اۋدانىنىڭ پروكۋرورى بەرىك احمەتجانوۆتىڭ ءوزىنىڭ سايتاندار تۋرالى ولەڭىن مانەرلەپ وقىپ جاتقان بەينەجازباسى پايدا بولعان ەدى. ولەڭدى ول ءبىر جىل بۇرىن جازعان. قازىر ونى الەۋمەتتىك جەلىدە دوستارىنىڭ ءوتىنىشى بويىنشا جاريالاعان.
كەيىن، قاراعاندى وبلىسىنىڭ پروكۋراتۋراسى ارىپتەستەرىنىڭ سايتاندار تۋرالى ولەڭىنە قاتىستى قىزمەتتىك تەكسەرىس جۇرگىزەتىنىن ايتتى.
«بەرىك مۇرات ۇلى احمەتجانوۆ پروكۋراتۋرا ورگاندارىندا ەڭبەك ەتكەن جىلدار ىشىندە ءتۇرلى تاقىرىپتارعا ولەڭدەر شىعارۋمەن اينالىسىپ كەلەدى. ونىڭ شىعارماشىلىعى - جەكە ءومىرى. ونىڭ سوڭعى تۋىندىسى مەملەكەتتىك قىزمەتشىنىڭ مىنەز- قۇلىق ستاندارتتارىنا قانشالىقتى سايكەس كەلەتىندىگىن انىقتايتىن بولامىز»، - دەگەن بولاتىن وبلىس پروكۋراتۋراسىندا «قازاقپاراتتىڭ» جولداعان ساۋالىنا.
