بەيجىڭدە قازاقستانمەن ينۆەستيتسيالىق ىنتىماقتاستىقتى دامىتۋ جونىندە كونفەرەنسيا ءوتتى
جيىندا قىتايلىق ىسكەر توپقا قازاق ەلىنىڭ ينۆەستيتسيالىق مۇمكىندىكتەرى تانىستىرىلدى. ونەركاسىپ، ءونىم شىعارۋ جانە اۋىل شارۋاشىلىعى سالاسىنداعى جوبالار جەرگىلىكتى 80 گە جۋىق كومپانيا وكىلدەرىنە جان- جاقتى كورسەتىلدى.
فورۋمدا قازاقستاندا اتقارىلىپ جاتقان الداعى بەسجىلدىق يندۋستريالدى- يننوۆاتسيالىق باعدارلامانىڭ باسىم باعىتتارى تانىستىرىلدى. شارانىڭ نەگىزگى ماقساتى - حالىقارالىق تالاپقا ساي جۇمىس ىستەيتىن جەرگىلىكتى كومپانيالاردى قازاقستاننىڭ يندۋستريالدى دامۋ سالاسىنداعى جوبالارىنا اتسالىسۋعا شاقىرۋ. سونىمەن قاتار ىسكەر توپ وكىلدەرى قوس مەملەكەت اراسىنداعى تەمىرجول كولىكتىك- لوگيستيكالىق مۇمكىندىكتەردىڭ جاڭا باعىتتارىن سارالاپ، قازاقستاننىڭ سولتۇستىك وڭىرىندە جۇزەگە اسىرىلاتىن تارتىمدى جوبالارمەن تانىستى.
جالپى قىتاي شەتەلدەرگە ينۆەستيتسيا سالۋدا الەمدە كوش باستاپ تۇر. ماسەلەن، «ءبىر بەلدەۋ - ءبىر جول» اتتى ەكونوميكالىق بەلدەۋگە ەنگەن مەملەكەتتەرگە قىتايلىق كاسىپورىندار وتكەن جىلى 14,8 ميلليارد ا ق ش دوللارىن قۇيعان. بۇل الدىڭعى جىلمەن سالىستىرعاندا 18 پايىزعا كوپ.
قۋانىش امانتاي، KAZNEX INVEST ۇلتتىق اگەنتتىگىنىڭ قىتاي جانە شىعىس ازياداعى وكىلى:
- قىتايلىق تاراپ جالپى ۇلكەن قىزىعۋشىلىق ءبىلدىرىپ جاتىر. ءبىراق ءبىز وسى قازاقستاننىڭ كەلەسى بەسجىلدىق يندۋستريالدىق دامۋ باعدارلاماسى شەڭبەرىندەگى باسىمدىلىق بەرىلەتىن سالالارعا ينۆەستيتسيا تارتۋدى كوزدەپ وتىرمىز. ارينە، ەڭ باستىسى سول سالالارعا حالىقارالىق باسەكەگە قابىلەتتى قىتايلىق كومپانيالاردى تارتۋ ءبىز ءۇشىن ەڭ نەگىزگى باعىتتاردىڭ ءبىرى بولىپ تابىلادى.
لو شۋجىن، ازيا جانە ەۋروپا ينۆەستيتسيالىق كومپانيانىڭ باسشىسى:
- ءبىزدىڭ كومپانيا رەسەي جانە ورتا ازيا ەلدەرىمەن تىعىز جۇمىس ىستەپ جاتىر. مەن بۇل جيىنعا قازاقستاننان لايىقتى جوبالار قاراستىرۋ ءۇشىن ارنايى كەلدىم. بۇعان دەيىن مۇناي ونىمدەرى مەن ءتۇستى مەتالدار سالاسىن باستى نازاردا ۇستايتىن ەدىك، قازىر اۋىل شارۋاشىلىعىنداعى جوبالارعا قارجى قۇيماقپىز. قازاقستاننىڭ ينۆەستيتسيا سالۋدا تارتىمدى ەل ەكەنىن ەستىپ ءبىلدىم، ەندى ويلانامىز.
www.24.kz
