اقمولالىقتارعا جاپپاي تۇماۋعا قارسى ەكپە ەگىلۋدە

كوكشەتاۋ. قازاقپارات - اقمولا وبلىسىندا - تۇرعىندارعا جاپپاي تۇماۋعا قارسى ەكپە ەگۋ جۇمىستارى جۇرگىزىلۋدە.

بۇل تۋرالى قازاقپارات تىلشىسىنە وبلىستىق دەنساۋلىق ساقتاۋ باسقارماسىنىڭ باسپا ءسوز قىزمەتىنەن حابارلادى.

دارىگەرلەردىڭ مالىمەتى بويىنشا، قازىردىڭ وزىندە وبلىس بويىنشا  6 مىڭنان استام ادام تۇماۋعا قارسى ەكپە العان. اعىمداعى جىلدىڭ 1- قازانىنان باستاپ، 31- قازانىنا دەيىن حالىق كوپ شوعىرلانعان ەلدى مەكەندەردەگى تۇرعىندارعا ەكپە ەگۋ جوسپارلانعان.

كوپ جىلعى تالداۋ كورسەتكەندەي، ماماندار اقمولا وبلىسى اۋماعىندا تۇماۋدىڭ ەپيدەميولوگيالىق ماۋسىمى قازاننان ءساۋىر ايىنا دەيىن جالعاساتىنىن بولجاپ وتىر.

وسى ماقساتتا ۆاكتسينانى نەگىزىنەن (اسقىنعان وكپە، جۇرەك-قان تامىرلارى، يممۋنيتەتى تومەن، ءجيى-ءجيى اۋىراتىن بالالار مەن بالالار ءۇيى، مەكتەپ- ينتەرناتىنىڭ تاربيەلەنۋشىلەرى جانە قاريالار ءۇيى مەن مەديتسينا قىزمەتكەرلەرى، جۇكتى ايەلدەرگە) ەگۋ كوزدەلگەن.

«بۇگىنگى كۇنى اقمولا وبلىسى بويىنشا 6076 ادام تۇماۋعا قارسى ەكپە العان. سونىمەن قاتار، قوسىمشا جۇمىس بەرۋشىلەردىڭ جەكە قاراجاتى ەسەبىنەن دە ەكپە الۋ  قاراستىرىلعان. اقىلى ەكپەنى كوكشەتاۋ قالالىق ەمحاناسىندا الۋعا بولادى. مۇنداعى ۆاكتسينانىڭ قۇنى 1950 تەڭگەنى قۇرايدى. ۆاكسينانىڭ قورعانىس اسەرى ەكپە العاننان كەيىن 14 كۇن وتكەن سوڭ باستالىپ، 6-ايدان¬ 12 ايعا دەيىن جالعاساتىن بولدى. جالپى، بۇگىنگى كۇنى اقمولا وڭىرىندە تۇماۋ بويىنشا ەپيدەميولوگيالىق جاعداي تۇراقتى»، دەپ كورسەتىلگەن حابارلامادا.

اسلان وسپانوۆ