بالعوجا ءبيدىڭ ىبىرايعا جازعان تاعى ءبىر حاتى تابىلدى
ءبىراق بۇل ولەڭ ەل ەگەمەندىك العاننان بەرى قاعاز بەتىندە قىلاڭ بەرمەگەندىگى دە راس. بالعوجا ءبيدىڭ «ءۇمىت ەتكەن كوزىمنىڭ نۇرى، بالام» دەگەن ولەڭى، بىزدىڭشە، ىبىرايدى جوعارعى وقۋعا بەرگەندەگى حاتى بولسا كەرەك. ال بۇل ماعۇلىم بولعان حات ءوزى ايتىپ وتىرعانداي «مەكتەپكە» بەرگەندەگى ءسوزى. ياعني، بۇل ءبىرىنشى حاتى. ءبىز بۇل ولەڭدى ابىز اقساقال مۇستافا اسىلبەكوۆتەن الدىق. قاريانىڭ قولىندا ءسادۋاقاس عىلمانيدىڭ كوپتەگەن قولجازبالارى ساقتالعان. عۇلاما عىلماني ءوز قولجازباسىندا: «ايقاپ» جورنالىنىڭ جيىرما ءتورتىنشى نومىرىنەن كوشىردىم» ، - دەپ قالدىرعان ەكەن.. .
باقىتبەك قادىر ۇلى
بالقوجا ءبي نەمەرەسى ىبىرايدى ۇشكولگە (شكول- ب. ق) بەرگەندەگى سالەم حاتى
قاراعىم، كوزىم نۇرى، كوڭىل گۇلىم،
ءسوزىمدى ىلتيپاتپەن تىڭداپ ۇعىن.
ايىرىلما مۇسىلماندىق تۇتقاسىنان،
ءولىم حاق، ءومىر وتەر تۇرماس ءبىر كۇن.
باراسىڭ قاماپ تۇرعان قالىڭ جاۋعا،
بولا گور وزىڭە- ءوزىڭ تىم- اق مىعىم.
داۋ، جانجال، كارتا، اراق، ناپسىگە ەرۋ،
پاپيروس، دەدىم جاۋ دەپ ءبارىن مۇنىڭ.
ويىن كۇلكى ماجىلىسكە جولاما دەپ،
ناسيحات كوپ ايتقانمىن بۇدان بۇرىن.
اتا حاقىن كەشەر دەپ ءۇمىت ەتپە،
اگاردا حيلاپ ەتسەڭ بىردە ءبىرىن.
اۋەس قىپ بالالىقپەن ءار نارسەنى،
ىسىراپقا اق پۇلىندى قىلما شىعىن.
قاجىما، ءوزىڭدى ءوزىڭ ساق، باعىپ قارا،
جۇرمەيمىن مەن جانىڭدا جارىقتىعىم.
ىلجاسىز وقىتامىن، قاۋىپ قاتتى.
بۇل ءسوزىم اللاعا ايان بارلىق ءمىنىم.
اق جولدا ادىلدىكپەن جۇرگەندەر بار،
ادامعا بۇل سىقىلدى بولما قىرىن.
شاماڭ كەلسە ناشاردىڭ جاعىندا بول،
ەش جاننىڭ رەنجىتىپ تارتپا تۇگىن.
ءناسىپ بولىپ جەتە الساڭ ماقسۇتىڭا،
ۇلتىڭا قىزمەت ىستە بۇل ءبىر سىرىم.
كەيىن ايتار ءسوزىمدى بۇگىن ايتتىم،
ءومىردىڭ ماعۇلىمسىز ءبىلىپ ءتۇرىن.
ۇمىتپەن ماقسات قىپ حاتقا جازدىم.
شاعبازدىڭ شوبەرەسى ەدىڭ جۇعىن.
بالالىقپەن قاتارىنان كەم قالماس دەپ،
تاۋقىمەتپەن ىزدەپ جالعىز عالىم.
تالابىڭدى تالماي بول كامىل ويلاپ،
ماڭگى ەمەس كورىپ تۇرسىڭ مىناۋ ءتۇرىم،
ءسوزىمدى وسىمەنەن توقتاتايىن،
ءبىر حاتقا سىيىپ بىتپەس بارلىق مۇڭىم.
بار بولىپ انبيە، اسقاپ اۋليەلەر،
باسشى بوپ قىزىر ءىلياس تۇتسىن قولىڭ.
كوزىمدە جاسىمدى ىركىپ سۇراپ تۇرمىن،
الەمگە تەگىس جەتكەن حاقتىڭ نۇرىن!
اۋەستەپ ءبىر تەڭگەنى پايدا قىلما،
كوپ ءىلىم مىڭ تەڭگەنى ايلا قىلما،
.. .. .. .. .. .. .. .. .. .. .. .. .. .. .. .. .. .. .. .. .. .. .. .. .. .. .. .
.. .. .. .. .. .. .. .. .. .. .. .. .. .. .. .. .. .. .. .. .. .. .. .. .. .. .. .
قاعازدان وقىپ ۇقسىن دەگەن وسىم
بولدى وتىرىك قاس، شىندىق دوسىڭ.
قاراڭعى جەر شايتانسىز بولماس دەگەن،
ءار قاشان جاسىرىنداۋ ىستەن شوشىن.
adebiportal.kz
