ازىرەيىل ادام جانىن قالاي الادى؟

استانا. قازاقپارات - پايعامبارىمىزدان (س. ع. س. ) جەتكەن حاديستە ءامىر يبن رابيعا: «كىم ماعان (س. ع. س. ) قانشا سالاۋات ايتسا، ول ادامعا پەرىشتەلەر دە سونشا سالاۋات ايتادى، ياعني از ايتسا از ايتادى، كوپ ايتقان بولسا، ولار دا كوپ ايتادى»، - دەگەن.

ەجەلگى زاماندا ادامدار جان الۋعا كەلگەن ءولىم پەرىشتەسىن كورەتىن بولعان. ءبىر كۇنى سۇلەيمەنگە (ع. س. ) كىرىپ كەلگەن ءولىم پەرىشتەسى سۇلەيمەننىڭ (ع. س. ) جانىندا تۇرعان جاس جىگىتكە قاراپ تۇرىپ قالادى دا، شىعىپ كەتەدى. ءولىم پەرىشتەسىنىڭ ۇڭىلە قاراعانىنان قورىققان جاس جىگىت سۇلەيمەنگە (ع. س. ): «ءيا، اللانىڭ ەلشىسى! مەن سىزدەن (ع. س. ) وتىنەرىم - مەنى جەلگە ءامىر ەتىپ قىتاي جاققا كوشىرسەڭىز»، - دەيدى. ءوتىنىشىن قابىل الىپ، جەلگە ءامىر ەتىپ، ول جاس جىگىتتى سۇراعان جاعىنا جىبەرەدى. ءولىم پەرىشتەسىنە ءبىراز ۋاقىتتان كەيىن جولىققان سۇلەيمەن (ع. س. ) ودان نە سەبەپتى الگى جاس جىگىتكە ءۇڭىلىپ قاراعانىن سۇرايدى. سوندا ءولىم پەرىشتەسى سۇلەيمەنگە (ع. س. ): «مەن ول جاس جىگىتتىڭ جانىن قىتايدا الۋعا ءتيىستى ەدىم، ول جىگىتتىڭ ءسىزدىڭ جانىڭىزدا تۇرعانىنا تاڭقالىپ قارادىم»، - دەيدى. جاس جىگىتپەنەن اراسىندا بولعان اڭگىمەنى سۇلەيمەن (ع. س. ) ءولىم پەرىشتەسىنە ايتىپ بەرگەندە، ءولىم پەرىشتەسى: «ءيا، ءبىز ول جىگىتتىڭ جانىن سول جاقتا الدىق»، - دەيدى.

بانۋ يسرايل ەلىندە ءبىر كىسى كۇندە كۇنگە ۋاكىل قىلىنعان پەرىشتەنى ويىنان شىعارماي، «اللا تاعالادان وعان جەڭىلدىگىڭدى بەر»، - دەپ دۇعاسىنان قالدىرمايدى ەكەن. ءبىراز ۋاقىت وتە كەلە سول پەرىشتە اللا تاعالادان سول اداممەن كەزدەسۋگە رۇقسات سۇرايدى. رۇقساتىن العاننان كەيىن الگى ادامعا كەلىپ: «سەن مەنى دۇعالارىڭنان تاستامايسىڭ، قانداي تىلەگىڭ بار»، - دەپ سۇرايدى.

سوندا: «مەنىڭ تىلەگىم - مەنى ءوز ورنىڭىزعا اپارىپ، ءولىم پەرىشتەسىنەن اجالىمنىڭ قاشان ەكەنىن سۇراڭىز»، - دەيدى. كۇن پەرىشتەسى ول كىسىنى وزىمەن بىرگە الىپ ورنىنا وتىرعىزىپ، ءولىم پەرىشتەسىنە بارىپ، «وسىنداي ادامنىڭ اجالى قاشان كەلەدى»، - دەپ سۇرايدى. سوندا ءولىم پەرىشتەسى قولىنداعى ادامداردىڭ اجالى جازىلعان كىتاپتى اشىپ، تاڭقالىپ ايتادى: «قانداي كەرەمەت ادام، ول سەنىڭ ورنىڭا وتىرماي اجالى كەلمەيدى»، - دەگەندە، ول پەرىشتە: «مەنىڭ ورنىما وتىردى»، - دەيدى، «وندا ول ادامنىڭ اجالى كەلگەن ەكەن»، - دەيدى ءولىم پەرىشتەسى.

حابارلاردا ءمالىم بولعانداي، ءولىم پەرىشتەسى ادامنىڭ جانىن الۋعا كەلگەندە، ادامنىڭ جانى «مەن ساعان بويۇسىنبايمىن، اللا تاعالا ءامىر ەتپەيىنشە» - دەيدى ەكەن. سوندا ءولىم پەرىشتەسى «ماعان جانىڭدى الۋعا ءامىر كەلگەندىكتەن كەلىپ تۇرمىن» - دەيدى. بۇعان ادامنىڭ جانى «ماعان دالەل كەرەك. مەنى اللا تاعالا جاراتىپ ادام بالاسىنىڭ دەنەسىنە كىرگىزگەندە جوق ەدىڭ ەندى مەنى قالاي شىعاراسىڭ»، - دەگەندە، ءولىم پەرىشتەسىنىڭ امالى تاۋسىلىپ، اللا تاعالا تاراپىنا قايتىپ «ءيا راببي! قۇلىڭ ماعان بويۇسىنبايدى جانە دە ماعان ءۋاج ايتىپ دالەل سۇرايدى» دەگەندە، اللا تاعالا «ول رۋحتىكى دۇرىس، سەن ءجانناتقا بارىپ، ءجانناتتىڭ الماسىنان الىپ ونى رۋحقا كورسەت. ول المادا «ءبيسميللاھير ءروحمانير روحيم» دەپ جازىلىپ تۇرادى. سول المانى الىپ رۋحقا كورسەتسەڭ، ول ءوزى ەركىمەن شىعادى» دەيدى.

كاعبۋل احباردان كەلگەن ريۋاياتتا اللا تاعالا ارشىنىڭ استىندا تال جاراتقان، سول تالدا قانشا جاراتىلىس بولسا سونشا جاپىراعى بار. ەگەردە ءبىر كىسىنىڭ اجالىنا 40 كۇن قالسا، سول كىسىنىڭ اتى جازىلعان جاپىراق سول تالدان ءۇزىلىپ ءتۇسىپ ازىرەيىلدىڭ (ع. س. ) الدىنا تۇسەدى. سول ۋاقىتتان باستاپ اسپانداعى پەرىشتەلەر ول ادامدى جەر بەتىندە 40 كۇن ءتىرى بولسا دا «مارقۇم» دەي باستايدى.

سول جاپىراقتا قاي جەردە، قانداي سەبەپتەن قايتىس بولاتىندىعى جازىلىپ تۇرادى. ەگەردە جازۋلارى نۇردان جازىلعان بولسا، ول ادامنىڭ ءجانناتقا باراتىندىعى بەلگىلى بولادى، قارا تۇسپەن جازىلعان بولسا، توزاققا باراتىندىعىنا بەلگى بولادى اللا ءبىزدى ودان ساقتاسىن. ءولىم پەرىشتەسىنىڭ دەنەسىندە قانشا جاراتىلىس بولسا سونشا كوزدەرى بار، ەگەردە ءبىر ادام قايتىس بولسا دەنەسىندەگى ءبىر كوز جابىلادى ەكەن.

اللا تاعالا بۇكىل جاراتىلىستى جويعاندا ءولىم پەرىشتەسىنىڭ بويىندا سەگىز عانا كوز قالادى. ولار يسرافيل (ع. س. )، جابىرەيىل (ع. س. )، ازىرەيىل (ع. س. )، ميكايىل (ع. س. ) جانە تورتەۋى ارشىنى كوتەرىپ تۇراتىن پەرىشتەلەردىكى.

ادامنىڭ اجالى تاياعاندا ءولىم پەرىشتەسى اللا تاعالادان «ءيا، راببي، مەن قاشان جانە قالاي ادامنىڭ جانىن الامىن» دەيدى، اللا تاعالا «ول عايىپتان، ۋاقىتى كەلگەندە ساعان بىلدىرەمىن» دەيدى. ادامنىڭ ۋاقىتى كەلگەندە ادامنىڭ دەم الۋىنا ۋاكىل قىلىنعان پەرىشتە كەلىپ «پالەنشەنىڭ اۋاداعى ءناسىبى ءبىتتى» دەيدى. سودان كەيىن ىرزىعىنا ۋاكىل قىلىنعان پەرىشتە كەلىپ «پالەنشەنىڭ الار ريزىعى» ءبىتتى دەيدى. امالىنا جاۋاپ بەرەتىن پەرىشتە كەلىپ «پالەنشەنىڭ امالى ءبىتتى» دەيدى. سول كەزدە ءولىم پەرىشتەسىنىڭ الدىنا ارشى استىنداعى تالدان جاپىراق تۇسەدى. سول جاپىراق تۇسكەندە ءولىم پەرىشتەسى ادامنىڭ جانىن الادى.

 

muslim.kz