بايان ماقسات قىزى ەسەنتايەۆا بولىپ قالا بەرمەك

استانا. قازاقپارات - وتباسىلىق وقيعادان كەيىن الەۋمەتتىك جەلىلەردەگى اككاۋنتىندا اتى- ءجونىن بايان ماقسات قىزىنا اۋىستىرعان پروديۋسەر رەسمي تۇردەگى تەگىن وزگەرتپەيدى.

بۇل تۋرالى ول بلوگەر ەلۆيرا ەرعاليەۆاعا بەرگەن سۇحباتىندا ايتقان.

بلوگەردىڭ فەيسبۋكتاعى پاراقشاسىندا بايان ماقسات قىزىمەن بولعان ۆيدەوسۇحبات جاريالاندى. «بايان ماقسات قىزى، جوق، بايان ەسەنتايەۆا كۇيەۋىن كەشىرىپ، ايەلدەردىڭ قۇقىعىن قورعايتىن ۇيىم اشۋ تۋرالى يدەياسىن ۇمىتىپ كەتكەن جوق. ءالى قولعا الادى. ايتپاقشى، بايان حانىم فاميلياسىن اۋىستىرمايدى، "ەسەنتاي پروداكشن" دا اتىن اۋىستىرمايدى»، - دەپ جازدى ەرعاليەۆا ءوز پاراقشاسىنا.

بەينەسۇحباتتا بايان ماقسات قىزى ءوزىن ءولىمشى ەتىپ ساباعان كۇيەۋىن كەشىرۋ شەشىمىن قالاي قابىلداعانىن ايتىپ بەردى.

«شەشىم قابىلداۋ وتە قيىنعا سوقتى. سەبەبى ارامىزدا بالالار بار. مەن ونىمەن 22 جىل بىرگە ءومىر ءسۇردىم. مۇنىڭ ءبارىن سىزىپ تاستاي المادىم. ويتكەنى ول جاقسى كۇيەۋ، جاقسى اكە بولدى. مەنىڭشە، اللا دا كەشىرەدى. ءبىز كىمبىز؟ تۇيىرشىكتەر عانامىز. سوندىقتان، كەشىرۋ - بۇل ادامنىڭ قالىپتى شەشىمى. تارتىسپەن، نەگاتيۆپەن ءومىر سۇرگىم كەلمەيدى. سوندىقتان مەن ونى كەشىردىم»، - دەدى پروديۋسەر.

بايان ماقسات قىزى باقىتبەك ەسەنتايەۆپەن سويلەسىپ، مۇمكىندىگىنشە ونىمەن دوس بولىپ قالعىسى كەلەتىنىن ايتقان. ونىڭ پايىمىنشا، بۇرىنعى كۇيەۋى ىستەگەن ىسىنە قاتتى وكىنەدى. «ونىڭ اباقتىدا وتىرعانىنا ءتورت اي بولدى. مەنىڭشە، تۇرمەدە ءبىر كۇن وتىرۋدىڭ ءوزى قيىن»، - دەيدى ول.

سونداي-اق تەلەجۇلدىز كۇيەۋىن كەشىرۋ تۋرالى شەشىمىن كوپتەگەن ادامدار قولدامايتىنىن بىلەتىنىن جانە بۇل شەشىمدى وزگەرتپەيتىنىن ايتتى.

«مەننەن ۇلگى العاندى ەشقاشان قالامايتىنمىن. مەن قاراپايىم اداممىن. مۇنداي شەشىم قابىلداپ جاتقاندا ادامداردىڭ پىكىرلەرىنە سۇيەنگەنىم جوق. سەبەبى بۇل مەنىڭ وتباسىم، مەنىڭ قارىم-قاتىناستارىم. جانە ەكراننىڭ ار جاعىنداعى ەشبىر ادام مەنىڭ ومىرىممەن ءومىر سۇرمەيدى»، - دەپ ءتۇيدى.