داۋرەن ابايەۆ ۇزدىك ۇلتتىق برەند بايقاۋىندا اقىلى كەلتە حاتقا قاتىستى تۇسىنىكتەمە بەردى
بۇل تۋرالى بۇگىن ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا ق ر اقپارات جانە كوممۋنيكاتسيالار ءمينيسترى داۋرەن ابايەۆ ءمالىم ەتتى.
«قازىرگى كەزدە بايقاۋ بويىنشا كەيبىر ەسكەرتۋلەر پايدا بولدى، ياعني وپەراتورلاردىڭ ءبىرى داۋىس بەرۋگە اقشا ۇستاي باستاعان. تەحنيكالىق تۇرعىدا بۇل ماسەلە تۇزەتىلدى. بارلىق SMS حابارلامالار اقىسىز بولۋى ءتيىس. داۋىس بەرۋ ءۇشىن اقشا العان وپەراتورلار ونى قايتادان ازاماتتارعا قايتارىپ بەرەدى» ، - دەدى مينيستر.
وسى رەتتە ول قازاقستان حالقىن ۇناعان لوگوتيپكە بەلسەندى تۇردە داۋىس بەرۋگە شاقىردى.
«وزدەرىڭىز بىلەسىزدەر، ق ر ۇلتتىق برەندىن انىقتاۋ بويىنشا بايقاۋ بيىلعى جىلدىڭ 31 - تامىزىنان 15 - قازانىنا دەيىن وتىنىشتەر قابىلداۋ جۇرگىزىلدى. جالپى وسى ۋاقىتقا 966 ءوتىنىش كەلىپ ءتۇستى، سولاردىڭ 794 ءى داۋىس بەرۋ كەزەڭىنە جىبەرىلەدى. 172 جۇمىس ەرەجەنىڭ تالاپتارىنا ساي بولماعاندىقتان، كەلەسى كەزەڭگە وتكەن جوق. بايقاۋدىڭ ماقساتىنا توقتالاتىن بولسام، قازىرگى كۇنى كەز كەلگەن مەملەكەت ەڭ الدىمەن ەلدىڭ يميدجىنە نازار اۋدارادى. ويتكەنى، بۇل ينۆەستيتسيانى جانە تۋريستەردى تارتۋدىڭ بىردەن ءبىر جولى. ارينە، ۇلتتىق برەندكە ەڭ الدىمەن سول مەملەكەتتىڭ شىنايى جەتىستىكتەرى نەگىز بولۋى كەرەك ەكەنىن جاقسى تۇسىنەمىز. سونىمەن قاتار ەلدىڭ ءيميدجىن ىلگەرلەتۋ ءۇشىن ءبىر كورگەننەن ەستە قالاتىن ايرىقشا سيمۆوليكا قاجەت» ، - دەدى مينيستر.
قازىرگى ۋاقىتتا بايقاۋدىڭ ءبىرىنشى كەزەڭى، ياعني ينتەرنەت- قولدانۋشىلاردىڭ داۋىس بەرۋى ءوتىپ جاتىر. بارلىق تۇسكەن جۇمىستار مينيسترلىكتىڭ رەسمي سايتىندا ورنالاستىرىلعان. ءاربىر ادام ۇناعان جۇمىسقا SMS حابارلاما جىبەرۋى ارقىلى داۋىس بەرە الادى. داۋىس بەرۋ 15 كۇن ىشىندە جۇرگىزىلەدى.
داۋىس بەرۋ ناتيجەسى بويىنشا رەسىمي سايتتا ەڭ كوپ داۋىس جيناعان جانە ەكىنشى كەزەڭگە وتەتىن كەمىندە 5 ۇمىتكەر انىقتالادى. وسى كەزەڭدە اۆتورلار ساراپشىلىق كەڭەستە وزدەرىنىڭ تۇجىرىمدامالارىن تانىستىرادى. اتاپ ايتقاندا، جەڭىمپاز 000 000 5تەڭگە كولەمىندە اقشالاي سىيلىق الادى، ال بايقاۋدىڭ ەكىنشى كەزەڭىنە وتكەندەردىڭ بارلىعىنا 200000 تەڭگەدەن تاپسىرىلادى.
اۆتور: رۋسلان عابباسوۆ
