بالالارعا جاسالاتىن كۇردەلى وتانى و ق و دارىگەرلەرى العاش رەت شەتەلدىك ماماندارمەن بىرلەسىپ اتقاردى
وبلىستىق بالالار اۋرۋحاناسىندا العاش رەت ەندوۆوسكۋليارلى جولمەن قانتامىرعا وتا جاساۋ قولعا الىنىپ وتىر. حيرۋرگتاردىڭ بىلىكتىگىن ارتتىرۋ ماقساتىندا يزرايل مەن گارۆاردتان ارنايى كەلگەن ماماندار شەبەرلىك ساباقتارىن وتكىزدى. 1,5 جاسار نارەستەگە وتا جاسالدى.
تۋا ءبىتتى دەرتى بار ونىڭ قولتىق استىنداعى ليمفا تامىرلارى ۇلكەيىپ، سارى سۋ جينالعان. سول ىسىكتى كىشىرەيتىپ، اعزاعا كەلەتىن قاۋىپتى ازايتۋ ءۇشىن شەتەلدەن كەلگەن دارىگەرلەر انگيوگرافيالىق اپپاراتتى قولداندى.
«مۇنداي وپەراتسيا بۇدان بۇرىن ەكى بالاعا جاسالعان. ولار دا ءساتتى اياقتالدى»، دەيدى يزرايل مەن گارۆاردتان ارنايى شاقىرىلعان پروفەسسور بەلەنكي الەكساندر مەن رام بۋرۆين.
وسى وپەراتسيالار نەگىزىندە دارىگەرلەر شەبەرلىك ساباقتارىن دا وتكىزدى. ناۋقاستاردىڭ جاعدايىن جەرگىلىكتى دارىگەرلەر باقىلايتىن بولادى. جۇرەگىندە تۋا ءبىتتى اقاۋى بار بالالارعا وتانى اشىق تۇردە ەمەس، قان تامىرلارى ارقىلى جاساۋ ءادىسى وبلىستىق بالالار اۋرۋحاناسىندا العاش رەت قولعا الىندى. وعان مۇمكىندىك بەرەتىن انگيوگرافيالىق اپپارات 2015 -جىلى ساتىپ الىنعان بولاتىن. بۇعان دەيىن ونىمەن تەك دياگنوستيكالىق زەرتتەۋلەر جۇرگىزىلگەن.
بيىلعى قىركۇيەك ايىنان باستاپ ءبىلىمىن جەتىلدىرىپ كەلگەن دارىگەرلەر وسىنداي جولمەن 11 بالاعا وتا جاسادى. وسىلايشا، كۇردەلى وتالاردى جاساۋ ەندى وزىمىزدە دە كەڭىنەن قولدانىلماق. وعان ارنايى جابدىقتارمەن قاتار دارىگەرلەردىڭ دە كاسىبي مۇمكىندىكتەرى ارتىپ وتىر.
