قىرعىزستان اتا زاڭىنىڭ ءتۇپنۇسقاسىن جوعالتىپ الدى

استانا. قازاقپارات - قىرعىزستان بيلىگى ەل كونستيتۋتسياسىنىڭ ءتۇپنۇسقاسىن تاپپاي دال.

بۇل تۋرالى جوگوركۋ كەنەشتىڭ وتىرىسىندا ءمالىم بولدى، دەپ حابارلايدى قازاقپارات  24.kg-عا سىلتەمە جاساپ.

ادىلەت ءمينيسترى جىلدىز مامبەتاليەۆا اتا زاڭنىڭ ءتۇرنۇسقاسى قىرعىز رەسپۋبليكاسى پرەزيدەنتى اپپاراتىندا ورنالاسۋى تيىستىگىن اتاپ ءوتتى. ءبىراق جوگوركۋ كەنەشتەگى پرەزيدەنتتىڭ ۋاكىلەتتى وكىلى مولداكۋن ابدىلدايەۆ ءتۇپنۇسقا قانداي اپپاراتتا، قانداي شەنەۋنىكتە جاتقانىن بىلمەيتىندىگىن ءمالىم ەتتى. ەل پرەزيدەنتىنىڭ كەڭسەسى قۇجاتتى ىزدەگەنىمەن - تاپپادى.

دەپۋتات ناتاليا نيكيتەنكو («اتا مەكەن» پارتياسى) كوميسسيا قۇرىپ، جاعدايدىڭ ءمان- جايىن انىقتاۋدى ۇسىندى. «كونستيتۋتسياعا وزگەرىستەردى قالاي ەنگىزە الامىز، ەگەر ونىڭ ءتۇپنۇسقاسى قايدا ەكەنىن بىلمەسەك؟ »، - دەدى ول.

ونى ايدا ساليانوۆا («اتا مەكەن» پارتياسى) دا قولدادى. «ەكى رەسمي وكىل ءتۇپنۇسقانىڭ جوقتىعىن ءمالىم ەتتى. وزگەرىس ەنگىزبەستەن بۇرىن ونى تابۋ قاجەت. ايتپەسە وزگەرىستەردى قايدا ەنگىزىپ جاتقانىمىز بەلگىسىز عوي»، - دەپ اتاپ ءوتتى ول.

بۇعان جوگوركۋ كەنەش كوميتەتىنىڭ ءتورايىمى اسەل كودۋرانوۆا (قىرعىزستاننىڭ سوتسيال- دەموكراتيالىق پارتياسى) «ءدال 2010 - جىلى ادىلەت مينيسترلىگى نەلىكتەن ەل كونستيتۋتسياسىنىڭ ءتۇپنۇسقاسىن ەمەس، كوشىرمەسىن قابىلداپ جاتقانى تۋرالى سۇراۋى كەرەك ەدى»، دەگەن جاۋاپ قايىردى.