الماتىلىقتار حابيبا ەلەبەكوۆانى اقتىق ساپارعا شىعارىپ سالدى
مارقۇممەن قوشتاسۋ م. اۋەزوۆ اتىنداعى قازاق مەملەكەتتىك دراما تەاترىندا ءوتتى.
حابيبا ەلەبەكوۆا 1916 -جىلى قاراعاندى وبلىسى قارقارالى اۋدانى تومار اۋىلىندا دۇنيەگە كەلگەن.
1934-35 ج ج. قارقارالى حالىق تەاترىندا قىزمەت ىستەگەن.
1935-37 - جىلدارى م. اۋەزوۆ اتىنداعى دراما تەاتر جانىنداعى ەكى جىلدىق ستۋديانى بىتىرگەن.
«1935 جىلدان بەرى م. اۋەزوۆ تەاترىندا ءۇزىلىسسىز قىزمەت ەتتى. بەلگىلى اكتريسا 1935 - جىلعى العاشقى قادامىن قازاقتىڭ كاسىبي تەاتر رەجيسسەرى ج. ءشانيننىڭ ءوزى جازىپ، ءوزى قويعان «ارقالىق باتىر» تاريحي دراماسىنداعى» قاراكوزدەن باستاپ، قارا شاڭىراق تەاتردا ۇلتتىق قۇنارى مىقتى كوپتەگەن رول جاسادى»، - دەلىنگەن تەاتر سايتىندا.
ساحناداعى رولدەرى:
ۇلتتىق كلاسسيكا مەن زاماناۋي دراماتۋرگيادا: «ارقالىق باتىر» تاريحي دراماسىندا قاراكوز، م. اۋەزوۆتىڭ «قارا قىپشاق قوبىلاندىسىندا» كۇنىكەي، «ابايىندا» قانىكەي، ۇلجان، ب. ءمايليننىڭ «مايدانىندا» مامىق، ع. مۇسىرەپوۆتىڭ «قوزى كورپەش- بايان سۇلۋىندا» ماقپال، ش. قۇسايىنوۆتىڭ «مارابايىندا» ءمارياش، «امانگەلدىدە» اقجان، ق. امانجولوۆتىڭ «دوسىمنىڭ ۇيلەنۋىندە» ايعانىم، ا. تاسىمبەكوۆ پەن ق. ىسقاقتىڭ «كەبەنەك كيگەن ارۋلارىندا» تۇتقىن، ا. سۇلەيمەنوۆتىڭ «جەتىنشى پالاتاسىندا» كەمپىر، يران- عايىپتىڭ «ەستايدىڭ قورلانىندا» ايناش، ت. ب.
الەمدىك دراماتۋرگيادا: گ. لوركانىڭ «بەرناردا البانىڭ ۇيىندە» پونسيا، وستروۆسكيدىڭ «نايزاعايىندا» كەزبە ايەل، «تالانتتار مەن تابىنۋشىلارىندا» د. اندرەيەۆنا، گوگولدىڭ «ريەۆيزورىندا» پوشلەپكينا، «ۆەتنام جۇلدىزىندا» تحان، م. مەتەرلينكتىڭ «سوقىرلارىندا» سوقىر ايەل، ت. ب.
ح. ەلەبەكوۆا ءبىراز كوركەم جانە دەرەكتى فيلمدەرگە ءتۇستى. ولاردىڭ ىشىندە ايگىلى رەجيسسەر س. قوجىقوۆتىڭ «ەگەر ءبىزدىڭ ءارقايسىمىز...» (1961)، سونداي- اق، اكتريسا تۇسكەن ەڭ سوڭعى فيلم د. جولجاقسىنوۆتىڭ «ءبىرجان سالى» (2009).
ح. ەلەبەكوۆا ءوزىنىڭ ءومىر- ونەر سەرىگى جۇسىپبەك ەلەبەكوۆ جانە ⅩⅩ عاسىرداعى قازاق ونەرى تۋرالى «ءۇنى كەتپەس قۇلاقتان» (1981) كىتابىن جازدى، بۇل ەڭبەگى تولىقتىرىلىپ «ءان- امانات» (1984) «قايران، جۇسەكەم» (1998) دەگەن اتاۋلارمەن قايتا باسىلدى. ۇلتتىق ونەر تاريحىن جاقسى بىلەتىن اكتريسا ءبىراز ءاننىڭ، مىسالى، ابايدىڭ «سەگىز اياعى» ، ت. ب. ءوز ءتۇپنۇسقاسىندا جەتۋىنە ۇلكەن ەڭبەك ءسىڭىردى. قۇيماقۇلاق دەۋگە بولاتىن حابيبا اپا كوپ جىرلاردى، مىسالى، ماعجان جۇمابايەۆتىڭ جىرلارىن تۇگەلدەي دەرلىك جاتقا وقيتىن ونەرى بار.
قازاقستاننىڭ ەڭبەك سىڭىرگەن ءارتىسى (1976)، ق ر مادەنيەت مينيسترلىگىنىڭ «مادەنيەت ۇزدىگى» توسبەلگىسىمەن ماراپاتتالعان (2012).
«حابيبا ەلەبەكوۆا» اتتى كىتاپ (جوبا اۆتورى ءا. بوپەجانوۆا) «ايگىلى ادامدار» سەرياسىمەن «ونەر» باسپاسىندا جارىق كوردى (2012).
اۆتور: الماس مۇقاش ۇلى
