قازاقستاندىق بلوگەرلەر ينتەرنەت ارقىلى اقشا تابۋدىڭ جولدارىن ايتتى

استانا. قازاقپارات - قازاقستاندا ۆيدەوبلوگينگ كۇن ساناپ قارقىن الىپ كەلەدى. باسىندا بۇل تەك ەرمەك ءۇشىن جاسالسا، قازىر ونى قوسىمشا تابىس كوزىنە اينالدىرعاندار دا بار.

قازاقپارات ءتىلشىسى سونداي بلوگەرلەرمەن تىلدەسىپ، جاڭا «ماماندىقتىڭ» قىر- سىرىن اشۋعا تىرىسىپ كوردى.

Forbes جۋرنالى بىلتىر YouTube الەمىنىڭ ەڭ تابىستى بلوگەرى شۆەد ازاماتى فەليكس كەللبەر (PewDiePie) ەكەنىن انىقتاعان. تانىمال ويىنداردىڭ بىرىنە ۆيدەوگايد تۇسىرۋمەن اينالىساتىن فەليكس 40 ميلليون كورەرمەن جيناعان جانە 12 ميلليون دوللار تابىس تاپتى.

تانىمال ۆيدەوحوستينگ ارقىلى قازاقستاندىقتار دا اقشا تابا الادى. قازاقپارات ءتىلشىسىنىڭ رەسمي ساۋالىنا بەرگەن جاۋابىندا Google كومپانياسىنىڭ باسپا ءسوز قىزمەتى كەز كەلگەن قازاقستاندىق YouTube سەرىكتەسى اتانىپ، ءوزىنىڭ YouTube ارناسىندا مونەتيزاتسيا جاساي الادى.

«سەرىكتەس اتانۋ ءۇشىن ارنانىڭ باپتاۋىنا كىرىپ، مونەتيزاتسيانى باسسا بولعانى. سودان كەيىن «اۆتورلارعا ارنالعان اكادەميا» قىزمەتىنىڭ رەسۋرستارى مەن ۇسىنىستارىن قولدانا وتىرىپ، ارنانى دامىتۋعا جانە وڭتايلاندىرۋعا كۇش سالۋعا بولادى. ارنا كورەرمەندەرى ۇلعايعان سايىن اۆتور YouTube-تان جاڭا مۇمكىندىكتەر مەن قولداۋلار تابا الادى. مىسالى، 10 مىڭ كورەرمەن جيناعان اۆتورلار ارنانى وڭتايلاندىرۋ مەن ودان ءارى دامىتۋعا قاتىستى YouTube مامانىنان تەگىن كەڭەستەر الۋ مۇمكىندىگىنە يە بولادى»، - دەپ جازادى كومپانيا باسپا ءسوز قىزمەتى.

YouTube قولدانۋشىنىڭ ارناسىن جانە ۆيدەوسىن جارنامالىق بلوكتارمەن قامتاماسىز ەتەدى. اقشا ۆيدەو كورگەن ادام سانىنا قاراپ ەمەس، جارناما باننەرلەرىنە كىرگەن ادام سانىنا بايلانىستى تولەنەدى. ءبىراق قازاقستاندىق ۆيدەوبلوگەرلەر بۇنداي ادىستەن كوپ تابىسقا كەنەلە المايسىڭ. بلوگەرلەرگە تىكەلەي جارناما بەرۋشىلەر حابارلاسسا، قوماقتى تابىس تابۋعا بولادى.

ءىلياس ءابدۋليننىڭ جاسى 24 تە. ول - «رەاكسيا» اتتى قازاقستاندىق YouTube-ارنانىڭ نەگىزىن قالاۋشى (https://www.youtube.com/user/IlyasAbdulin) . قازىرگى ۋاقىتتا وعان 460 مىڭعا جۋىق ادام جازىلعان. ونىڭ ينتەرنەت جوباسى جاستاردىڭ ۆيدەوحوستينگتاعى جاڭا ترەندتەرگە دەگەن كوزقاراسىن، رەاكتسياسىن كورسەتەدى. قازاقپارات تىلشىسىنە بەرگەن سۇحباتىندا ءىلياس بۇل سالاعا ءۇش جىل بۇرىن، ا ق ش- تا وقىپ جۇرگەن كەزىندە باستاعانىن ايتتى.

«ەگەر ۆيدەوبلوگ جۇرگىزۋ وزىڭە ۇنايتىن بولسا، سونشالىقتى اۋرەگە سالمايدى. ول كوپ ۋاقىت الادى دەپ ايتپاس ەدىم. بۇل شىعارماشىلىق پروتسەسس جانە وعان كەڭسەدەگى جۇمىس سەكىلدى ۋاقىت ارناۋ قاجەت ەمەس. مەنىڭ ۋاقىتىم كوپ، ءبىراق جالپى شىعارماشىلىق پروتسەسس بولعاندىقتان، جاڭا ۆيدەو، جاڭا جوبا تۋرالى وي- تولعاۋ مەندە ۇزدىكسىز بولادى»، - دەيدى ءىلياس.

ونىڭ ايتۋىنشا، ۆيدەوارنا ونىڭ باستى قاراجات كوزىنە اينالعان. ءبىراق ول YouTube ۇسىنعان سەرىكتەستىك باعدارلاماسىنان ەمەس، وعان تىكەلەي ۇسىنىسپەن كەلەتىن جارناما بەرۋشىلەردەن كوپ پايدا كورەتىن كورىنەدى.

«قازىرگى ۋاقىتتا بۇل ت ۆ، بيلبورد، گازەت پەن جۋرنالعا قاراعاندا، ساپا مەن باعا تۇرعىسىنان كەلگەندە ەڭ وڭتايلى جارنامالاردىڭ ءبىرى بولىپ تابىلادى»، - دەيدى ول.

YouTube-ارناسى 286 مىڭ تۇراقتى كورەرمەن جيناعان تانىمال بيۋتي- ۆيدەوبلوگەر ەۆگەنيا گەين (Jenya Geyn, https://www.instagram.com/jenyageyn) ءوزىنىڭ ارىپتەسىمەن كەلىسىپ وتىر. جەنيا گەين ءوز ارناسىن ءتورت جىلدان بەرى جۇرگىزىپ كەلەدى. نەگىزىنەن ساياحات پەن سۇلۋلىق تاقىرىپتارىندا ۆيدەوونىم تۇسىرەدى.

 «بلوگ جۇرگىزۋ وڭاي شارۋا ەمەس، ۆيدەو دايىنداۋعا، تۇسىرىلىمگە جانە ونى مونتاجداۋعا كوپ ۋاقىت كەتەدى. بۇل - تولىققاندى جۇمىس، وتە كۇردەلى پروتسەسس. بۇل قازىر تابىس اكەلەتىن سۇيىكتى حوببيگە اينالدى. ارنا كورەرمەن جيناسا، «يۋتيۋبەر» ارنادان ءاربىر كورگەن ادام ءۇشىن اقشا تاۋىپ وتىرادى. تەك مونەتيزاتسيانى قوسۋى كەرەك. بۇل فۋنكتسيا قازاقستاندىقتارعا 2015 -جىلدان باستاپ قولجەتىمدى بولدى. ەڭ العاشقى اقشا، ءسىز 100 دوللار جيناعان كەزدە اۋدارىلادى. قوسىمشا ۇسىنىستار پوشتاعا كۇن سايىن تۇسەدى. قازىر مەن تىكەلەي تانىمال برەندتەرمەن جۇمىس جاسايمىن. ولار بلوگەرلەرگە وزدەرى حابارلاسادى»، - دەيدى جەنيا گەين.

«يۋتۋبتان اقشا تابۋعا مۇمكىندىك بار، ءبىراق كوپ ەمەس. يۋتۋبتىڭ ءوزى ۇسىنىپ وتىرعان جارنامادان كاسىپ رەتىندە اينالىساتىنداي پايدا تۇسپەيدى. مىسالى، قازاقستانداعى ەڭ تانىمال يۋتۋب كانالدىڭ ءبىرى، كورەرمەن سانى 1 ميلليونعا جاقىنداپ قالعان «ساشا كەتتىڭ» ءوزى $400  تاپپاۋى مۇمكىن»، - دەيدى 110 مىڭعا تارتا كورەرمەنى بار «جايدارمان» ارناسىنىڭ اكىمشىسى جاناسىل بولاتبەك. (https://www.youtube.com/channel/UCPKHYUnHg3cQoy9tDc54C9A)

 ونىڭ ايتۋىنشا، باستى كەدەرگى - اۋديتوريانىڭ ازدىعى.

 «ءبىز ءونىمدى تەك قازاق ءتىلدى ورتاعا، ورىس تىلىندە بولسا، ت م د- عا عانا تاراتا الامىز. باسقا ورتانى قىزىقتىرۋ ازىرگە بىزدە تەك ساناۋلى كليپتەردىڭ عانا قولىنان كەلىپ وتىر»، - دەپ اتاپ ءوتتى ج. بولاتبەك.

يۋتيۋبەردىڭ سوزىنشە، نەگىزى يۋتۋبتا جارناما جاساۋدىڭ مۇمكىندىكتەرى وتە كوپ. تەك جارناما بەرۋشىلەرگە ازىرگە بۇل سالا قىزىق ەمەستەي كورىنەدى.

 «ۆبلوگينگ ءداۋىرى قازاق ءتىلدى ورتاعا ادەتتەگىدەي كەشەۋىلدەپ ەنىپ كەلە جاتىر. ءبىراق جۇمىس جاساپ جاتقاندار بار. وكىنىشتىسى كوپ جوبالار ۇزاققا بارماي توقتاپ قالادى. مىسالى، جاقسى جۇمىس جاساپ كەلە جاتقان "artishow" كانالىنا جاڭا ءونىم سالىنباعالى 6 اي بولىپتى. ءبىر جىل بۇرىن قۇلشىنىسى، ىزدەنىسى جاقسى ەدى. كوپ جوبالاردىڭ بۇلاي «ولۋىنە» قارالىم سانىنىڭ از بولۋى مەن پايدا اكەلمەۋى سەبەپ. كوبى العاشقى قىزىعۋشىلىعى باسىلعاسىن قالىپ قويادى. كاسىپ رەتىندە نەمەسە حوببي رەتىندە بىرنەشە جىل جالعاستىرىپ كەلە جاتقاندار وتە سيرەك»، - دەيدى ول.

وسىعان قاراماستان، وتاندىق ۆيدەوبلوگەرلەر بۇل سالا قازاقستاندىقتار ءۇشىن اشىق جانە ۇلكەن مۇمكىندىكتەر بەرىپ وتىر. ونىڭ ۇستىنە ول تەك اقشاعا تىرەلىپ وتىرعان جوق، كوبىسى ونى ءومىر ءستيلى دەپ كورەدى.

«ۆيدەوبلوگەرلەر اراسىندا باسەكەلەستىك، قۋانىشىمىزعا وراي، جوق. بۇل سەگمەنتتە بارلىعىنا دا ورىن جەتەدى. مىسالى، كولىك ساتىپ الاتىن بولساڭ، وعان تۇبەگەيلى سالىستىرۋ جاساپ، ابدەن ويلانىپ بارىپ، تاڭداۋ جاسايسىڭ. ال YouTube-تاعى كەز كەلگەن بەينەروليكتى، كەتكەن ۋاقىتىڭدى ەسەپكە المايتىن بولساق، ەش شىعىنسىز- اق قاراي بەرەسىڭ»، - دەيدى ءىلياس ابدۋلين.

 «ءبىز بلوگەرلەرمەن تىعىز ارالاسامىز. برەندتەر ءبىز ءۇشىن ۇيىمداستىرعان شارالاردا باس قوسىپ تۇرامىز. توپ- بلوگەرلەر ءۇشىن ۇيىمداستىرىلعان "تۋسوۆكالاردا" برەندتەر، ادەتتە، ۇشاق بيلەتتەرىن، جاتاتىن ورىندى جانە قالاماقىنى وزدەرى تولەيدى. وتە قىزىق. ءبىز ءوز ارامىزدا جاقسى جولداسپىز، باسەكەلەستىك دەگەن جوق. ءبىر- ءبىرىمىزدى شابىتتاندىرىپ، جىگەرلەندىرىپ وتىرامىز»، - دەپ جالعاستىرادى جەنيا گەين.

وكىنىشكە وراي، قازاقستاندىق پايدالانۋشىلار اراسىندا Youtube قانشالىقتى تانىمال ەكەندىگىن كورسەتەتىن ناقتى دەرەك Google كومپانياسىندا جوق. كومپانيا باسپا ءسوز قىزمەتىنىڭ ايتۋىنشا، YouTube-قا مينۋت سايىن الەم بويىنشا 400 ساعات ۆيدەو- كونتەنت جۇكتەلىپ جاتقاندا، ستاتيستيكا جۇرگىزۋ مۇمكىن ەمەس.

 «وكىنىشكە وراي، ءبىز جەكە مەملەكەتتەر بويىنشا ستاتيستيكانى جۇرگىزبەيمىز، مالىمەتتەر اۋقىمى وتە ۇلكەن. تابىسقا كەلەتىن بولساق، ءاربىر سەرىكتەسپەن جەكە كەلىسىمشارت جاسالادى. ونىڭ تالاپتارى بويىنشا، ونداي مالىمەتتەردى جاريالاۋ تەك ۆلوگەردىڭ قۇقىعى بار. جالپى ستاتيستيكا، وكىنىشكە وراي، جوق»، - دەپ حابارلادى Google قازاقپارات ءتىلشىسىنىڭ جولداعان ساۋالىنا.

 

 

 

 

اۆتور: جاسۇلان جولدىبايەۆ