كىمنىڭ نامازى قابىل بولمايدى؟
ال، فۋتبولعا ءباس تىگىپ ۇتىپ، ول اقشاعا تاماق الىپ جەسەڭ، دەنەڭە حارام اس بارسا، وقىعان نامازىڭ قابىل بولا ما؟
شىن مانىندە، كىمنىڭ نامازى مەن دۇعاسى قابىل بولاتىندىعى اللا تاعالاعا عانا ايان. الايدا، نامازى قابىل بولمايتىن ادامنىڭ بەلگىلەرى ايتىلعان حاديستەر بار. سولاردىڭ ءبىرى اراق ىشكەن جانە ارام اس جەگەن ادام.
ابدۋللا بين ومار (ر. ا. ): «كىمدە- كىم اراق ىشسە اللا تاعالا ونىڭ قىرىق كۇن نامازىن قابىل ەتپەيدى. ەگەر تاۋبە ەتسە اللا تاعالا ونى كەشىرەدى. ەگەر قايتا ىشسە اللا تاعالا ونىڭ قىرىق كۇن نامازىن قابىل ەتپەيدى.. .[1]»، - دەگەن حاديس ريۋايات ەتكەن.
ءابۋ ھۋرايرا (ر. ا. ): «...ادام ۇزاق ساپار شەگىپ، ءۇستى-باسى شاڭ-توزاڭ بولىپ ەكى قولىن اسپانعا كوتەرىپ: ۋا، راببىم! ۋا، راببىم!، - دەيدى. الايدا، ىشكەن اسى حارام، ىشكەن سۋى حارام، كيگەن كيىمى حارام جانە قورەگى حارام. ونداي ادامنىڭ دۇعاسى قالاي قابىل بولماق؟ ![2]»، - دەگەن ريۋايات جەتكىزگەن.
دەمەك، بۇل كۇنا ىستەر ادامنىڭ قۇلشىلىعىنىڭ قابىل بولۋىنا كەدەرگى كەلتىرەدى. ءبىراق، اراق ۇرتتاپ قويعان ادام، ەرتەسىنە ەسىن بىلگەن سوڭ نامازىن وقۋعا مىندەتتى. نامازى قابىل بولماسا دا، قۇلشىلىقتان بوساتىلمايدى.
سونىمەن بىرگە، مىنا حاديستەرگە زەر سالىڭىز. يبن ابباس (ر. ا. ): «ءۇش ادامنىڭ نامازى توبەسىنەن ءبىر سۇيەم دە كوتەرىلمەيدى، ولار: جۇرتقا يمام بولعان، ءبىراق ونى ەل قالاماعان ادام، كۇيەۋى ريزا بولماي تۇنەگەن ايەل جانە تۋىستىق قارىم- قاتىناستى ۇزگەن باۋىرلار[3]»، - دەگەن حاديس ريۋايات ەتكەن.
ءابۋ ھۋرايرا (ر. ا.): «كىسى الپىس جىل ناماز وقىسا دا، ءبىراق ونىڭ ءبىر نامازى قابىل بولمايدى. مۇمكىن، ول رۋكۋعىن تولىق ورىندايدى دا ساجدەسىن تولىققاندى ورىندامايدى نەمەسە ساجدەسىن تولىق ورىندايدى دا رۋكۋعىن تولىققاندى ورىندامايدى[4]»، - دەگەن ريۋايات كەلتىرەدى.
وسى ماعىنالاس حاديستەر قۇران كارىمنىڭ: «...كۇدىكسىز ناماز؛ ارسىزدىقتان، جاماندىقتان تىيادى...[5]»، - دەگەن اياتىنان باستاۋ الادى.
قورىتا ايتقاندا، مۇسىلماننىڭ نامازى مەن دۇعاسى قابىل بولۋىنىڭ باستى بەلگىسى ادال اس جانە كۇنا مەن ارسىزدىقتان تيىلۋى.
[1] تيرميزي
[2] مۋسليم
[3] يبن ماجاھ
[4] اسباھاني
[5] عانكابۋت سۇرەسى، 45-ايات
muslim.kz
