پروكۋراتۋرا: ۇزىناعاشتاعى ءۇش اعايىندىنى ۇرلانعان مىلتىقپەن اتىپ ولتىرگەن

تالدىقورعان. قازاقپارات - جامبىل اۋدانىنا مال ساتۋعا بارىپ، ارتىنشا مۇردەلەرى تابىلعان ۇزىناعاشتاعى ءۇش اعايىندىنى ۇرلانعان مىلتىقپەن اتىپ ولتىرگەن، دەپ حابارلايدى قازاقپارات ءتىلشىسى.

مىلتىقتى يەسى 2 اي بۇرىن جوعالتقان. بۇل جونىندە الماتى وبلىسى پروكۋراتۋراسى ءبىرىنشى باسقارماسىنىڭ اعا پروكۋرورى الىبەك مىرزابەكوۆ ءمالىم ەتتى.

قازىرگى تاڭدا الماتى وبلىسىندا قارۋ-جاراق توناۋ فاكتىلەرى جيىلەپ كەتكەن. 200 دەن استام قارۋ-جاراق ۇرلانعان قارۋ تىزىمىندە تۇر. وبلىستىق پروكۋراتۋرا قىزمەتكەرلەرىنىڭ ايتۋىنشا، ولاردىڭ ەشقايسىسى تابىلماعان.

نەگىزىنەن قارۋدى جەكە تۇرعىن ۇيلەردەن كەيدە سەيفتەرىمەن قوسا قولدى قىلادى. ۇرلانعان قارۋ تەك قىلمىس جاسالعاندا عانا اشكەرەلەنىپ جاتادى. قازىرگى تاڭدا الماتى وبلىسى تۇرعىندارىنىڭ قولىندا 24 مىڭ بىرلىك قارۋ رەسمي تىركەۋدە تۇر.

الماتى وبلىستىق پروكۋراتۋراسى ءبىرىنشى باسقارماسىنىڭ اعا پروكۋرورىنىڭ ايتۋىنشا، كەز- كەلگەن ازامات وبلىس اراسىندا كوشىپ- قونعان جاعدايدا تۇرعىلىقتى جەرى بويىنشا ىشكى ىستەر ورگاندارىنا بارىپ، قارۋىن تىركەتۋى ءتيىس. سونداي-اق كۇزەت اگەنتتىكتەرىمەن ارنايى كەلىسىم شارتقا وتىرۋ كەرەك. سول كەزدە جوعالعان قارۋدى جىلدام انىقتاۋعا مۇمكىندىك تۋادى.

اۆتور: سامال قابىشەۆا